കോമരം വെളിപ്പെടുത്തിയതിനെ തുടര്ന്ന് യുവതി ആത്മഹത്യ ചെയ്ത സംഭവത്തില് കോമരത്തെ പോലീസ് അറസ്റ്റ് ചെയ്തിരുന്നു. സംഭവത്തെ കുറിച്ച് ഡോ. സിജെ ജോണ് ചെന്നക്കാട്ട് ഫേസ്ബുക്കില് കുറിച്ച വാക്കുകള് വൈറലാവുകയാണ്. ആവേശിച്ച സൂപ്പര് നാച്യുറല് കക്ഷിയെ അറസ്റ്റ് ചെയ്യാന് വകുപ്പില്ലാത്തത് കൊണ്ട് അതിനു കയറാനും ഈ വിടുവായത്തം വിളമ്പാനും അവസരമുണ്ടാക്കിയ ഉടലിന് പോലീസ് സ്റ്റേഷന് കയറേണ്ടി വന്നു. വിശ്വാസത്തിലധിഷ്ഠിതമായ ഒരു പ്രകടനത്തിലൂടെ കോമരം പറഞ്ഞ കാര്യത്തിന് ആ വ്യക്തിക്ക് ഉത്തരവാദിത്തം ഉണ്ടോയെന്ന സംഗതി കോടതി എങ്ങനെ കാണും എന്ന് നോക്കാം.- അദ്ദേഹം ഫേസ്ബുക്കില് കുറിച്ചു.
ഫേസ്ബുക്ക് കുറിപ്പിന്റെ പൂര്ണരൂപം;
കോമരമായി മാറി ഒരു സ്ത്രീയെ കുറിച്ച് ചൊല്ലിയ വെളിപാടുകള് അവരുടെ ആത്മഹത്യക്ക് കാരണമായിയെന്ന കുറ്റം ചാര്ത്തി ഒരു വ്യക്തിയെ അറസ്റ് ചെയ്ത വാര്ത്ത വായിച്ചു. ആവേശിച്ച സൂപ്പര് നാച്യുറല് കക്ഷിയെ അറസ്റ്റ് ചെയ്യാന് വകുപ്പില്ലാത്തത് കൊണ്ട് അതിനു കയറാനും ഈ വിടുവായത്തം വിളമ്പാനും അവസരമുണ്ടാക്കിയ ഉടലിന് പോലീസ് സ്റ്റേഷന് കയറേണ്ടി വന്നു. വിശ്വാസത്തിലധിഷ്ഠിതമായ ഒരു പ്രകടനത്തിലൂടെ കോമരം പറഞ്ഞ കാര്യത്തിന് ആ വ്യക്തിക്ക് ഉത്തരവാദിത്തം ഉണ്ടോയെന്ന സംഗതി കോടതി എങ്ങനെ കാണും എന്ന് നോക്കാം. ബാധ കയറ്റം മനഃശാസ്ത്ര പരമായ ഒരു പ്രതിഭാസമാണ്.
പ്രതിസന്ധികള് ഉണ്ടാകുമ്പോള് ചില ദുര്ബല മാനസര് സ്വയം അറിയാതെ പ്രേതം ആവേശിച്ചതു പോലെയാകും. മണിചിത്രതാഴിലെ നാഗവല്ലി അതിന്റെ കാല്പ്പനിക രൂപമാണ് .ഒരു സംഭവ കഥ ഇങ്ങനെ. ഒരു യുവതിക്ക് അമ്മായിയമ്മയുമായി വലിയ പ്രശ്നം . ഭര്ത്താവിന് അമ്മയോടുള്ള വിധേയത്വം മൂലം അവള്ക്ക് പ്രതികരിക്കാന് പറ്റാത്ത അവസ്ഥ .അമ്മായിയമ്മ അവസരം മുതലെടുത്തു മരുമകളെ വല്ലാതെ കഷ്ടപ്പെടുത്താന് തുടങ്ങി .അമ്മയ്ക്ക് ആകെ പേടിയുള്ളത് ഭൂത പ്രേതാദികളെ മാത്രം . സഹനത്തിന്റെ നെല്ലിപ്പലക തകര്ന്ന വേളയില്, യുവതി ആ പ്രദേശത്തു തൂങ്ങി മരിച്ച ഒരു പെണ്ണിന്റെ പേരു ചൊല്ലി നാഗവല്ലി സ്റ്റൈലില് തുള്ളി.
അമ്മയായിയമ്മയ്ക്ക് നല്ല തല്ലും കൊടുത്തു. പിന്നെ ഒരു ബോധം കെടല് നടത്തി .കണ്ണ് തെളിഞ്ഞപ്പോള് ഞാനെന്താ ചെയ്തതെന്ന മതിഭ്രമം. ബാധ ഒഴിപ്പിക്കാനുള്ള കര്മ്മങ്ങള് ചെയ്തു.കൂട്ടത്തില് ഒരു മാനസികാരോഗ്യ പരിശോധനക്കായി കൊണ്ട് വരികയും ചെയ്തു. ഒക്കെ ഒരു നാടകമായിരുന്നുവെന്നും, അത് കൊണ്ട് അമ്മായിയമ്മയുടെ പീഡിപ്പിക്കല് ബാധക്ക് മയം വന്നുവെന്നും അവള് തുറന്നു പറഞ്ഞു . പ്രേതത്തെയും, ഈശ്വരമാരെയും ദേഹത്ത് കയറ്റി മനുഷ്യന് ഇങ്ങനെ തന് കാര്യങ്ങളും നടത്താവുന്നതാണ്.വിദ്യാഭ്യാസ നിലവാരം കൂടിയതോടെ മാനസിക പിരിമുറുക്കങ്ങളുടെ ഫലമായി പ്രേതബാധ കാട്ടുന്നവരുടെ തോത് വളരെ കുറഞ്ഞിട്ടുണ്ട്. എന്നാല് ഭക്തിയുടെ ഭാഗമായുള്ള തുള്ളലുകളും തള്ളലുകളും എല്ലാ മത വിഭാഗങ്ങളിലും കൂടുകയാണ് .ആരെയെങ്കിലും ദ്രോഹിക്കുന്ന കൊട്ടേഷന് എടുക്കില്ലെന്ന നൈതീകത നല്ലതാണ്. ഇതൊക്കെ മനുഷ്യരാണ് ചെയ്യുന്നതെന്ന് പൊതു ജനവും ഓര്ത്താല് കൊള്ളാം.പാവം ദൈവങ്ങളും പ്രേതഭൂതാദികളും വെറും മാപ്പ് സാക്ഷികള് .
(സി .ജെ .ജോണ്)
