ശ്രീനഗര് : പുല്വാമ ഭീകരാക്രമണത്തിനായി സ്ഫോടക വസ്തുക്കള് നിര്മിക്കാനുള്ള രാസവസ്തുക്കള് വാങ്ങിയത് ആമസോണിലൂടെയെന്ന് വെളിപ്പെടുത്തല്. എന്ഐഎ അറസ്റ്റു ചെയ്ത വൈസുല് ഇസ്ലാം, മൊഹമ്മദ് അബ്ബാസ് റാത്തര് എന്നിവരെ ചോദ്യം ചെയ്തതില് നിന്നാണ് ഞെട്ടിക്കുന്ന വിവരങ്ങള് പുറത്തു വന്നിരിക്കുന്നത്.
ഇംപ്രൊവൈസ്ഡ് എക്പ്ലോസീവ് ഡിവൈസാണ് പുല്വാമ ഭീകരാക്രമണത്തിനായി ഉപയോഗിച്ചത്. ഇത് നിര്മിക്കാനുള്ള രാസവസ്തുക്കളും ബാറ്ററികളും മറ്റ് സാധനങ്ങളുമാണ് ഇ കൊമേഴ്സ് സൈറ്റായ ആമസോണില് നിന്നും വാങ്ങിയതെന്ന് ഇവര് പറയുന്നു. വൈസുല് ഇസ്ലാമാണ് ഈ സാധനങ്ങള് ഭീകരര്ക്ക് നേരിട്ട് കൊണ്ടുപോയി കൊടുത്തത്.
കഴിഞ്ഞ വര്ഷമായിരുന്നു 40 സിആര്പിഎഫ് ജവാന്മാര് കൊല്ലപ്പെട്ട പുല്വാമ ആക്രമണം നടന്നത്. 2018 ഏപ്രില് മെയ് മാസങ്ങളില് കശ്മീരില് എത്തിയ തീവ്രവാദി സംഘടനയുടെ ഐഇഡി സ്പെഷ്യലിസ്റ്റായ മൊഹമ്മദ് ഉമറിന് താമസ സൗകര്യം ചെയ്തു കൊടുത്തത് ജെയ്ഷ് ഇ മുഹമ്മദിന്റെ പഴയ പ്രവര്ത്തകനായ റാതറാണ്. ഇയാള്ക്കൊപ്പം ചാവേര്, ആദില് അഹമ്മദ് ദര്, സമര് അഹമദ് ദര് പാകിസ്താന്കാരന് കമ്രാന് എന്നിവര്ക്കും റാതര് ഇടം നല്കി. നേരത്തേ അറസ്റ്റിലായ ഹാക്രിപോരയിലെ താരിഖ് അഹമ്മദ് ഷാ, മകള് ഇന്ഷാ ജാന് എന്നിവരുടെ വീട്ടിലാണ് റാതര് ഇവര്ക്കെല്ലാം ഇടം കൊടുത്തത്.
