ലണ്ടന് : ബ്രിട്ടനില് കൊറോണ വൈറസുമായി ബന്ധപ്പെട്ട പ്രതിസന്ധി ഉടന് അവസാനിക്കില്ലെന്നും ഒരു വര്ഷക്കാലം വരെ കൂടി നീണ്ടു നില്ക്കുമെന്ന് വിദഗ്ദ്ധരുടെ റിപ്പോര്ട്ട്. 2021 മാര്ച്ച് - ഏപ്രില് വരെ കൊറോണയുടെ ആഘാതം നീണ്ടു നില്ക്കുമെന്നും രാജ്യത്തെ 80 ശതമാനത്തോളം പേരെയും രോഗം ബാധിക്കുമെന്നും എന്എച്ച്എസ് കണക്കുകള് ദി ഗാര്ഡിയന് ദിനപ്പത്രം പുറത്തുവിട്ടു. 2021 വരെ രോഗത്തിന്റെ പ്രതിസന്ധി നീണ്ടാല് 7.9 ദശലക്ഷത്തോളം (15 ശതമാനം) ആള്ക്കാരെ ചികിത്സിക്കേണ്ടി വരുമെന്നും പറയുന്നു.
അടുത്ത 12 മാസം കൂടി വൈറസ് ബാധ നീണ്ടു നില്ക്കുമെന്നും പ്രതിസന്ധി എന്എച്ച്എസ്, പോലീസ്, ഫയര്ഫോഴ്സ് എന്നിവരെയെല്ലാം ബാധിക്കുമെന്നും പറഞ്ഞിട്ടുണ്ട്. അതേസമയം ഇത്തരം റിപ്പോര്ട്ടുകള് ആള്ക്കാരെ ഭീതിയിലാക്കുമെന്നും വിദഗ്ദ്ധര് പറയുന്നു. ഇതുവരെ യുകെ യില് 40,279 പേര്ക്കാണ് രോഗ പരിശോധന നടത്തിയത്.
ഇതില് 38,907 പേരുടെയും ഫലം നെഗറ്റീവായിരുന്നു. ഇവരില് 1,372 പേരുടെ ഫലമാണ് പോസിറ്റീവായത്. കഴിഞ്ഞ ദിവസം 24 മണിക്കൂറിനുള്ളില് ഉണ്ടായ 14 മരണങ്ങള് ഉള്പ്പെടെ 35 മരണമാണ് യുകെയില് റിപ്പോര്ട്ട് ചെയ്തിരിക്കുന്നത്്. രോഗം സംശയിക്കപ്പെടുന്ന സാഹചര്യത്തില് ഇംഗ്ളണ്ടിലും വെയ്ല്സിലും സ്വമേധയാ ക്വാറന്റൈന് വിധേയമാകാത്തവര് ജയിലില് കിടക്കുകയോ 1000 പൗണ്ട് പിഴ ഈടാക്കുകയോ ചെയ്യേണ്ടി വരും. സംശയത്തില് സ്വമേധയാ ഐസൊലേഷന് തയ്യാറാകാതിരിക്കുന്നവര്ക്ക് എതിരേ നടപടിയെടുക്കാന് പോലീസിന് അനുമതി നല്കിയിട്ടുണ്ട്. വൈറസ്ബാധയേറ്റവര് രക്ഷപ്പെടാന് ശ്രമിച്ചാല് നിര്ബ്ബന്ധിത തടവില് ഐസോലേഷനിലേക്ക് അയയ്ക്കും.
ക്രിമിനല് കുറ്റം ചുമത്തി 1000 പൗണ്ട് പിഴയിടും. പിഴയടയ്ക്കാന് കൂട്ടാക്കാതിരുന്നാലും ജയിലിലിടും. 70 വയസ്സിന് മുകളില് പ്രായമുള്ളവര് രോഗം ഇല്ലെങ്കില് പോലും നാലു മാസത്തോളം വെളിയില് ഇറങ്ങരുതെന്നും വീടിനുള്ളില് കഴിയണമെന്നും നിര്ദേശമുണ്ട്. കോവിഡ് ബാധയേറ്റവര് കൂടുന്ന പശ്ചാത്തലത്തില് ചികിത്സയ്ക്കായി ചില ഹോട്ടലുകളും താല്ക്കാലിക ആശുപത്രികളായി മാറ്റിയിട്ടുണ്ട്. ബിസിനസിനെയും കൊറോണ ബാധിച്ചതോടെ വന്കിട സൂപ്പര്മാര്ക്കറ്റുകള് ഭീതിയില്ലാതെ സാധനം വാങ്ങാന് എത്താന് ഇടപാടുകാര്ക്ക് തുറന്ന കത്തെഴുതിയിരിക്കുകയാണ്.
യൂറോപ്പില് ഉടനീളമായി അതിര്ത്തികളും ബാറുകളും റസ്റ്റോറന്റുകളും അടച്ചതോടെ 100 ദശലക്ഷം പേരാണ് വീടിനുള്ളില് കഴിയുന്നത്. അവസാനമായി പോളണ്ടും സെര്ബിയയും ഇന്നലെ അതിര്ത്തി അടച്ചു. ജര്മ്മനിയില് ഓഡര് റിവര് വഴിയുള്ള ആള്ക്കാരുടെ വരവിന് നിരോധനം ഏര്പ്പെടുത്തിയിട്ടുണ്ട്. അടുത്ത സുഹൃത്തുക്കള് ആണെങ്കിലും ഫ്രാന്സ്, ഓസ്ട്രിയ, സ്വിറ്റ്സര്ലന്റ്, ലക്സംബര്ഗ്, ഡന്മാര്ക്ക് എന്നിവിടങ്ങളില് നിന്നുള്ള ആള്ക്കാരുടെ വരവിന് നിയന്ത്രണം ഏര്പ്പെടുത്തുകയും ചെയ്തു. അടിയന്തിരാവസ്ഥ പ്രഖ്യാപിച്ചിരിക്കുന്ന സ്ളോവാക്യയില് ഭക്ഷണശാലകള്, ബാങ്കുകള്, പെട്രോള് പമ്പുകള്, പോസ്റ്റോഫീസ്, മരുന്നുകടകള് എന്നിവ ഒഴികെയുള്ള എല്ലാ കടകളും ഇന്ന് മുതല് അടഞ്ഞു കിടക്കും.
സ്പെയിനുമായുള്ള അതിര്ത്തി പോര്ച്ചുഗല് അടച്ചു. സ്പെയിനില് ഭക്ഷണം വാങ്ങാനുള്ള നീണ്ട ക്യൂ ഒഴിച്ചാല് മറ്റൊന്നുമില്ല. അയര്ലന്റില് ചൊവ്വാഴ്ച സെന്റ് പാട്രിക് ഡേ ആഘോഷിക്കാന് ഇരിക്കെ എല്ലാ പബ്ബുകളും ബാറുകളും രണ്ടാഴ്ചത്തേക്ക് അടച്ചു. നെതര്ലന്റില് എല്ലാ സ്കൂളുകളും ഡേ കെയര് സെന്ററുകളും റെസ്റ്റോറന്റുകളും ബാറുകളും ഏപ്രില് 6 വരെ അടഞ്ഞു കിടക്കും. മയക്കുമരുന്ന് വില്പ്പനയും സെക്സും നിയമാനുസൃതമായ ഇവിടെ മാരിജുവാന വില്ക്കുന്ന കോഫി ഷോപ്പുകളും സെക്സ് ക്ളബ്ബുകളും വരെ നിയന്ത്രണത്തില് പെടുന്നു.
