തിരുവനന്തപുരം: മാധ്യമ പ്രവര്ത്തകന് കെ.എം ബഷീറിനെ കാറിടിച്ച് കൊന്ന കേസില് പ്രതിയായ ശ്രീറാം വെങ്കിട്ടരാമന് ഐ.എ.എസിനെ സര്ക്കാര് സര്വീസില് തിരിച്ചെടുത്തു. ആരോഗ്യ വകുപ്പില് കൊവിഡ് സ്പെഷ്യല് ഓഫീസറായാണ് ശ്രീറാമിനെ തിരിച്ചെടുത്തത്. പത്രപ്രവര്ത്തക യൂണിയനെയും സര്ക്കാര് ഇക്കാര്യം അറിയിച്ചിരുന്നു. ശ്രീറാമിനെ തിരിച്ചെടുക്കാതെ മറ്റ് വഴികളില്ലെന്ന് സര്ക്കാര് അറിയിച്ചിരുന്നതായി കേരള പത്രപ്രവര്ത്തക യൂണിയന് വ്യക്തമാക്കി. സസ്പെന്ഷന് നിയമപരമായി നിലനില്ക്കില്ലെന്ന് സര്ക്കാര് അറിയിച്ചു. തിരിച്ചെടുക്കണമെന്ന നിയമോപദേശം ലഭിച്ചിരുന്നു. അതേസമയം വൈകാരികമായ വിഷയമാണെന്നും തിരിച്ചെടുക്കുന്നതില് എതിര്പ്പുണ്ടെന്നും അറിയിച്ചിരുന്നതായും പത്രപ്രവര്ത്തക യൂണിയന് സംസ്ഥാന സെക്രട്ടറി ഇ. എസ് സുഭാഷ് അറിയിച്ചു.
ബഷീറിന്റെ മരണവുമായി ബന്ധപ്പെട്ട് പത്രപ്രവര്ത്തക യൂണിയന് ആവശ്യപ്പെട്ട കാര്യങ്ങള് സര്ക്കാര് ചെയ്തതായി മുഖ്യമന്ത്രിയുടെ ഓഫീസ് പത്രപ്രവര്ത്തക യൂണിയനെ അറിയിച്ചു. കെ.എം ബഷീറിനെ കൊലപ്പെടുത്തിയ കേസില് ശ്രീറാമിനെ ഒന്നാം പ്രതിയാക്കി പോലീസ് കുറ്റപത്രം സമര്പ്പിച്ചു. കേസ് കോടതിയുടെ പരിഗണനയിലാണ്. ഈ സാഹചര്യത്തില് സസ്പെന്ഷനെതിരെ ശ്രീറാം നിയമപരമായി നീങ്ങിയാല് തിരിച്ചടിയാകുമെന്നും നിയമോപദേശം ലഭിച്ചതായും മുഖ്യമന്ത്രിയുടെ ഓഫീസ് പത്രപ്രവര്ത്തക യൂണിയനെ അറിയിച്ചു. അതേസമയം ശ്രീറാമിനെ തിരിച്ചെടുക്കുന്നതുമായി ബന്ധപ്പെട്ട് സര്ക്കാര് ചര്ച്ച നടത്തിയിട്ടില്ലെന്ന് പത്രപ്രവര്ത്തക യൂണിയന് അറിയിച്ചു. സര്ക്കാര് ചര്ച്ചയ്ക്ക് വിളിച്ചിരുന്നു. എന്നാല് തിരുവനന്തപുരത്ത് ഇല്ലാതിരുന്നതിനാല് ചര്ച്ചയില് പങ്കടുക്കാനായില്ലെന്നും യൂണിയന് അറിയിച്ചു.
കഴിഞ്ഞ വര്ഷം ഓഗസ്റ്റ് അഞ്ചിനാണ് ശ്രീറാം ഓടിച്ച കാറിടിച്ച് കെ.എം ബഷീര് മരിച്ചത്. അന്ന് മുതല് ശ്രീറാം സസ്പെന്ഷനിലാണ്. സസ്പെന്ഷനെതിരെ ശ്രീറാം കേന്ദ്ര അഡ്മിനിസ്ട്രേറ്റീവ് ട്രിബ്യൂണലിനെ സമീപിച്ചിരുന്നു. ഐ.എ.എസ് ഉദ്യോഗസ്ഥരും സര്ക്കാരിനോട് ഇക്കാര്യം ആവശ്യപ്പെട്ടിരുന്നു. ഇതേതുടര്ന്നാണ് ഡോക്ടര് കൂടിയായ ശ്രീറാമിനെ കൊവിഡ് 19 പ്രതിരോധ പ്രവര്ത്തനങ്ങളുടെ ചുമതലയുള്ള സ്പെഷ്യല് ഓഫീസറായി നിയമിച്ചത്.
