കൊറോണ വ്യാപനത്തിന്റെ ഭീതിയില് മൃഗസംരക്ഷണ മേഖലയിലും പ്രത്യേക മാര്ഗ്ഗനിര്ദേശങ്ങള് പുറപ്പെടുവിച്ചു. ഇന്ത്യന് വെറ്റിനറി അസോസിയേഷന് കേരളയുടെ നിര്ദേശങ്ങള് കൂടി പരിഗണിച്ചാണ് മൃഗസംരക്ഷണ വകുപ്പ് ഡയറക്ടര് പ്രത്യേക മാര്ഗ്ഗനിര്ദേശങ്ങള് പുറപ്പെടുവിച്ചത്. സര്ക്കാര് നിര്ദേശങ്ങള് അനുസരിച്ച് ഉദ്യോഗസ്ഥരുടെ സേവനം ദിവസസേന 50 ശതമാനം എന്ന നിലയില് ഏര്പ്പെടുത്തും.
നിര്ദേശങ്ങള് ഇവയാണ്:
1. മൃഗങ്ങളെ അടിയന്തരിര സാഹചര്യങ്ങളില് മാത്രം പരിശോധനയ്ക്കായി ആശുപത്രിയില് കൊണ്ടുവരിക.
2. ഒഴിവാക്കാനാകാത്ത ഘട്ടങ്ങളില് മാത്രം വെറ്റിനറി ഡോക്ടറെ നിങ്ങളുടെ വീട്ടിലേയ്ക്ക് വിളിയ്ക്കുക.
3. പക്ഷിമൃഗാദികള്ക്ക് രോഗമുണ്ടെങ്കില് വെറ്റിനറി ഡോക്ടറെയോ ബന്ധപ്പെട്ട മറ്റ് ഉദ്യോസ്ഥരെയോ ഫോണില് ബന്ധപ്പെട്ട ശേഷം മാത്രം തുടര് നടപടികള് സ്വീകരിക്കുക.
4. ഉദ്യോഗസ്ഥരുടെ ടെലിഫോണ് നമ്പരുകള് മൃഗാശുപത്രികളിലും സബ്സെന്ററുകളിലും പ്രദര്ശിപ്പിക്കും.
5. പ്രതിരോധ കുത്തിവയ്പ്പുകള്, പൊതുവായുള്ള ആരോഗ്യ പരിശോധന, കൃത്രിമ ബീജാധാനം, ഗര്ഭ പരിശോധന, അടിയന്തിര പ്രാധാന്യമില്ലാത്ത സേവനങ്ങള് എന്നിവ വൈറസ് ഭീതി മാറുന്നതുവരെ നീട്ടിവയ്ക്കാന് ശ്രമിക്കുക.
6. മൃഗങ്ങളെ കൈകാര്യം ചെയ്യുന്നതിനു മുമ്പും ശേഷവും കൈകള് സോപ്പുപയോഗിച്ച് വൃത്തിയാക്കാന് ശ്രദ്ധിക്കുക.
7. ജലദോഷം, തുമ്മല് രോഗലക്ഷണങ്ങളുള്ളവരും വൈറസ് ബാധിതരായവരോട് അടുത്തിടപഴകിയവരും സമീപകാലത്ത് വിദേശ രാജ്യങ്ങളില്നിന്നു വന്നവരും വീട്ടില്ത്തന്നെ ആയിരിക്കാന് ശ്രദ്ധിക്കുക. മൃഗാശുപത്രിയില് വരാതിരിക്കുക.
8. തൊഴുത്തും പരിസരവും വൃത്തിയായും അണുവിമുക്തമായും സൂക്ഷിക്കുക
9 പരിസര ശുചിത്വവും വ്യക്തിശുചിത്വവും പാലിക്കുക
10. രോഗനിയന്ത്രണത്തിനുള്ള സര്ക്കാര് പൊതു നിര്ദേശങ്ങള് ശ്രദ്ധിക്കണം.
