ന്യുയോര്ക്ക്: കൊവിഡ് പ്രതിരോധ പ്രവര്ത്തനങ്ങള്ക്കായി 800 മില്യണ് ഡോളര് സഹായം പ്രഖ്യാപിച്ച് ഗൂഗിള് സി.ഇ.ഒ സുന്ദര് പിച്ചൈ. പ്രതിരോധ രംഗത്ത് പ്രവര്ത്തിക്കുന്ന ചെറുകിട, ഇടത്തരം വാണിജ്യ സംരംഭങ്ങള്, സര്ക്കാരുകള് തുടങ്ങിയവയ്ക്ക് ഗൂഗിളിന്റെ ധനസഹായം കൈമാറും. ഔദ്യോഗിക ബ്ലോഗിലൂടെയാണ് സുന്ദര് പിച്ചൈ ഇക്കാര്യം അറിയിച്ചത്.
കൊറോണ വൈറസ് ലോകമെങ്ങും വഷളായിക്കൊണ്ടിരിക്കുകയാണ്. ഇത് സമൂഹത്തെയും ജീവിതത്തെയും പ്രതികൂലമായി ബാധിക്കുന്നു. ഈ വെല്ലുവിളികള് നേരിടുന്നതിന് കൊറോണ പ്രതിരോധത്തിന്റെ മുന് നിരയിലുള്ള ചെറുകിട, ഇടത്തരം വാണിജ്യ സംരംഭങ്ങള്, ആരോഗ്യ സംഘടനകള്, സര്ക്കാരുകള്, ആരോഗ്യ പ്രവര്ത്തകര് എന്നിവയെ പിന്തുണയ്ക്കുന്നതിനായി ഞങ്ങള് 800 മില്യണ് ഡോളര് പ്രഖ്യാപിക്കുന്നു- സുന്ദര് പിച്ചൈ വ്യക്തമാക്കി.
ലോകാരോഗ്യ സംഘടനയെ സഹായിക്കുന്നതിനും ആഗോള തലത്തില് കൊറോണ വൈറസ് വ്യാപനം തടയുന്നത് സംബന്ധിച്ച നിര്ണ്ണായക വിവരങ്ങള് നല്കുന്ന പ്രാദേശിക സമൂഹത്തെ സഹായിക്കുന്നതിന് നൂറിലധികം സര്ക്കാര് ഏജന്സികള്ക്ക് 25 കോടി ഡോളറിന്റെ പരസ്യ ഗ്രാന്റ് ഗൂഗിള് നല്കും. ചെറുകിട, ഇടത്തരം വാണിജ്യ സംരംഭങ്ങള്ക്ക് ദുരിതാശ്വാസ ഫണ്ടുകള്, മറ്റ് സ്രോതസുകള് എന്നിവയെക്കുറിച്ച് പൊതു പ്രഖ്യാപനങ്ങള് നടത്തുന്നതിന് ഗൂഗിള് 2 കോടി ഡോളര് പരസ്യ ഗ്രാന്റ് നല്കും.
ലോകമെങ്ങുമുള്ള ധനകാര്യ സ്ഥാപനങ്ങളെയും എന്.ജി.ഒ സംഘടനകളെയും പിന്തുനണയ്ക്കുന്നതിന് 200 ദശലക്ഷം ഡോളര് നിക്ഷേപ ഫണ്ട് നല്കും. കൊവിഡ് 19നെ പ്രതിരോധിക്കുന്നതിനുള്ള പുതിയ മാര്ഗങ്ങള് കണ്ടെത്തുക, രോഗ പ്രതിരോധത്തിനുള്ള ചികിത്സയും വാക്സിനുകളും കണ്ടുപിടിക്കുന്നതിന് വേണ്ടിയുള്ള പഠനം നടത്തുന്ന ഗവേഷകര്ക്കും സ്ഥാപനങ്ങള്ക്കും 20 ദശലക്ഷം ഡോളര് സഹായവും പ്രഖ്യാപിച്ചിട്ടുണ്ട്.
