ന്യൂഡല്ഹി: കോവിഡ് ബാധിതരുടെ എണ്ണം വര്ദ്ധിക്കുന്നതിനിടയില് പ്രതിരോധ നടപടികള്ക്ക്് ഇന്ത്യയ്ക്ക് സഹായവുമായി ലോകബാങ്ക്. രാജ്യത്ത് രോഗബാധിതരുടെ എണ്ണം 2000 ആകുകയും 53 പേര്ക്ക് ജീവന് നഷ്ടമാകുകയും ചെയ്തിരിക്കുന്ന സാഹചര്യത്തില് നൂറ് കോടി ഡോളറിന്റെ അടിയന്തിര സഹായമാണ് അനുവദിച്ചിരിക്കുന്നത്.
ആഗോളമായി കോവിഡ് വന് ഭീതി ഉയര്ത്തി വികസിക്കുമ്പോള് ഇതിനെതിരേ വികസ്വര അവികസിത രാജ്യങ്ങളുടെ പ്രവര്ത്തനങ്ങളെ സഹായിക്കുന്നതിന്റെ ഭാഗമായിട്ടാണ് നടപടി. ഇന്ത്യയ്ക്ക് പുറമേ പാകിസ്താന്, അഫ്ഗാനിസ്ഥാന്, ശ്രീലങ്ക, മാല്ദീവ് തുടങ്ങിയ ദക്ഷിണേഷ്യന് രാജ്യങ്ങള്ക്കും സഹായമുണ്ട്. കോവിഡ് പ്രതിരോധ നടപടികളുടെ ഭാഗമായിട്ടുള്ള പ്രവര്ത്തനങ്ങള് കുടുതല് കാര്യക്ഷമമാക്കുകയാണ് ലക്ഷ്യം.
രോഗികളെ തിരിച്ചറിയുക, ഇവരുടെ സമ്പര്ക്കം കണ്ടെത്തുക, ശരിയായ രീതിയിലുള്ള വിദഗ്ദ്ധ പരിശോധനകള് സുരക്ഷാ ഉപകണണങ്ങള് പുതിയ ഐസൊലേഷന് വാര്ഡുകള് എന്നിവയുടെ വിസകനം ലക്ഷ്യമിട്ടാണ് സഹായം. കോവിഡ് 19 രോഗികളെ പെട്ടെന്ന് കണ്ടെത്താനുള്ള സൗകര്യങ്ങള് രൂപപ്പെടുത്തല് ഉള്പ്പെടെയുള്ള കാര്യങ്ങള് പറഞ്ഞിട്ടുണ്ട്.
ദക്ഷിണേഷ്യയില് പാകിസ്താന് 200 ദശലക്ഷം ഡോളറും അഫ്ഗാനിസ്ഥാന് 100 ദശലക്ഷം ഡോളറും മാല്ദീവിന് 7.3 ദശലക്ഷം ഡോളറും ശ്രീലങ്കയ്ക്ക് 128.6 ദശലക്ഷം ഡോളറും സഹായം നല്കും. മഹാമാരിയുടെ പശ്ചാത്തലത്തില് ഉണ്ടായിരിക്കുന്ന സാമ്പത്തീക പ്രതിസന്ധിയെ മറികടക്കാനും അടിയന്തിര ആരോഗ്യ പ്രശ്നങ്ങളില് ശ്രദ്ധവെച്ച് മഹാമാരിയെ തകര്ക്കാനുള്ള പദ്ധതികള്ക്ക് പിന്തുണ നല്കാനും അടുത്ത 15 മാസത്തിനുള്ളില് 160 ബില്യണ് ഡോളര് ഗ്രാന്റായി നല്കുന്ന രീതിയാണ് ഇപ്പോള് സ്വീകരിച്ചിരിക്കുന്നത്.
രോഗത്തില് നിന്നും ചുരുങ്ങിയ കാലത്തിനുള്ളില് തന്നെ തിരിച്ചുവരാനും മതിയായ സാമ്പത്തീക വളര്ച്ചയ്ക്കുള്ള സാഹചര്യം സൃഷ്ടിക്കാനും ചെറുകിട, ഇടത്തരം വ്യവസായങ്ങളെ പിന്തുണച്ച് പാവങ്ങളെ സഹായിക്കുകയും ചെയ്യുകയാണ് ഉദ്ദേശം. കോവിഡ് പതിയെ പിടിപെട്ടു കൊണ്ടിരിക്കുന്ന അഫ്ഗാന് കോവിഡ് പടരുന്നത് തടയാനും മഹാമാരിയെ പിടിച്ചു നിര്ത്താനുമാണ് 100 ദശലക്ഷം ഡോളര് അനുവദിക്കുന്നത്. നിരീക്ഷണം പരിശോധനാ സൗകര്യങ്ങള്, ഇന്റന്സീവ് കെയര് ഉള്പ്പെടെയുള്ള അടിയന്തിര സഹായം ശക്തിപ്പെടുത്തലുകളുമാണ് ഉദ്ദേശിക്കുന്നത്.
