ന്യൂഡല്ഹി: കോവിഡിന്റെ രണ്ടാം ഘട്ടത്തില് രോഗം പ്രചരിച്ചതിന് ഏറെ പഴി കേട്ട നിസാമുദ്ദീന് തക് ലീഗില് പങ്കെടുത്തവര് ഡല്ഹിയില് പ്ളാസ്മാ ദാനത്തിന് തയ്യാറായി രംഗത്ത്. തക് ലീഗില് പങ്കെടുത്തതിലൂടെ രോഗം പിടിപെടുകയും പിന്നീട് രോഗവിമുക്തരാകുകയും ചെയ്തവരാണ് ഇവര്. 25 പേര് പ്ളാസ്മ നല്കുകയും ചെയ്തു. നിസാമുദ്ദീന് മര്ക്കസില് കഴിഞ്ഞ മാസം നടന്ന പരിപാടിയില് പങ്കെടുത്ത 350 പേരാണ് മുമ്പോട്ട് വന്നിരിക്കുന്നത്.
നരേലാ, സുല്ത്താന്പുരി എന്നിവിടങ്ങളിലെ ക്വാറന്റൈന് കേന്ദ്രത്തില് നിന്നും രോഗ വിമുക്തി നേടിയവരാണ് പ്ളാസ്മാ ദാനത്തിന് എത്തിയതെന്നാണ് ആരോഗ്യ വിഭാഗം പറയുന്നത്. തിങ്കളാഴ്ച രാത്രി ആരോഗ്യമന്ത്രി സത്യേന്ദര് ജെയിന് ക്വാറന്റൈന് കേന്ദ്രത്തില് എത്തി ഇവരെ സന്ദര്ശിക്കുകയും ചെയ്തു. നിസാമുദ്ദീന് മര്ക്കസില് തക് ലീഗില് പങ്കെടുത്ത 2,300 പേരെയാണ് നിരീക്ഷണത്തിലാക്കിയത്. ഇവരില് 1,080 പേര്ക്ക് വൈറസ്ബാധ സ്ഥിരീകരിക്കുകയും ചെയ്തിരുന്നു. ഇവരില് പലരും ഇപ്പോള് രോഗമുക്തി നേടുകയും ആശുപത്രി വിടുകയും ചെയ്തിട്ടുണ്ട്.
കോവിഡ് ബാധയില് നിന്നും മോചിതരായവര് മറ്റുള്ളവര്ക്കും രോഗവിമോചിതരാകാന് പ്ളാസ്മാ ദാനത്തിന് തയ്യാറാകണമെന്ന് അടുത്തിടെ ഡല്ഹി മുഖ്യമന്ത്രി അരവിന്ദ് കെജ്രിവാള് പറഞ്ഞിരുന്നു. വൈറസിന് മതമില്ലെന്നും ജനങ്ങള് പ്ളാസ്മാ ദാനത്തിന് മുമ്പോട്ട് വരണമെന്നായിരുന്നു കെജ്രിവാളിന്റെ ആഹ്വാനം. 18 നും 60 നും ഇടയില് പ്രായത്തിനിടയില് പ്രമേഹമോ രക്തസമ്മര്ദ്ദമോ ഇല്ലാത്തവരോ ആയവര്ക്ക് കോവിഡ് ഭേദമായി രണ്ട് പരിശോധനകള്ക്ക് വിധേയമായവര്ക്ക് മൂന്നാഴ്ച കഴിഞ്ഞാല് പ്ളാസ്മാ ദാനത്തിന് തയ്യാറാകാമെന്ന് ആരോഗ്യ വിദഗ്ദ്ധര് പറയുന്നു.
ഡല്ഹിയില് പ്ളാസ്മാ തെറാപ്പി അനേകര്ക്ക് ഗുണമാകുന്നുണ്ട്. മാക്സ് ഹോസ്പിറ്റലിലെ 49 കാരനിലാണ് തെറാപ്പി ആദ്യം പരിശോധിച്ചത്. ഇയാള് ഞായറാഴ്ച ആശുപത്രി വിടുകയും ചെയ്തിരുന്നു.
