തിരുവനന്തപുരം: സംസ്ഥാനസര്ക്കാരിന്റെ പുതിയ മദ്യനയം ബിവറേജസ് കോര്പ്പറേഷന് അടച്ചു പൂട്ടുന്ന അവസ്ഥയില് എത്തിക്കുമെന്ന് പ്രതിപക്ഷ നേതാവ് രമേശ് ചെന്നിത്തല. സര്ക്കാരിന്റെ കുത്തകയായിരുന്ന മദ്യത്തിന്റെ ചില്ലറ വില്പന പൂര്ണ്ണമായും കൗശലപൂര്വ്വവും സ്വകാര്യമേഖലയ്ക്ക് തീറെഴുതി കൊടുക്കുന്ന നടപടിയാണ് ഇതെന്ന് വാര്ത്താസമ്മേളനത്തില് ആരോപിച്ചു.
അണിയറയില് ബാര് മുതലാളിമാരുമായി ചേര്ന്ന ചര്ച്ചയുടെ അടിസ്ഥാനത്തില് വന് അഴിമതിക്ക് കളമൊരുക്കുകയാണെന്നും പറഞ്ഞു. കേന്ദ്രസര്ക്കാര് ഉത്തരവിറങ്ങിയിട്ടും മദ്യവില്പന ശാലകള് തുറക്കേണ്ടെന്ന തീരുമാനം സര്ക്കാര് കൈക്കൊള്ളുന്നത് ഇതിന്റെ അടിസ്ഥാനത്തിലാണ്. മദ്യവിതരണ മേഖല സ്വകാര്യവത്കരിക്കുന്ന ഓര്ഡിനന്സ് ഉടന് പിന്വലിക്കണമെന്നും രമേശ് ചെന്നിത്തല ആവശ്യപ്പെട്ടു.
നിലവില് ബിവറേജസ് കോര്പറേഷന് ഔട്ടലെറ്റ് തുറക്കണമെങ്കില് നാലു ലക്ഷം രൂപയുടെ ലൈസന്സ് ഫീസ് അടക്കണം. എന്നാല് ഇപ്പോള് തുടങ്ങാന് പോവുന്ന ബാറുകളിലെ ചില്ലറ മദ്യവില്പന ശാലയ്ക്ക് ലൈസന്സ് ഫീസ് അടക്കേണ്ടതില്ല. ഇതാണ് അഴിമതി. മദ്യ ദുരന്തങ്ങളുടെ പശ്ചാത്തലത്തില് 1984ല് ആണ് സംസ്ഥാനത്ത് ബിവറേജസ് കോര്പ്പറേഷന് നിലവില് വന്നതും മദ്യക്കച്ചവടം സര്ക്കാര് ഏറ്റെടുത്തതും. അന്നുവരെ സ്വകാര്യ മേഖലയ്ക്കായിരുന്നു മദ്യവില്പ്പനയുടെ ചുമതല.
അണിയറയില് ബാര് മുതലാളിമാരുമായി ചേര്ന്ന ചര്ച്ചയുടെ അടിസ്ഥാനത്തിലാണ് ഇത്തരമൊരു തീരുമാനമുണ്ടയാത്. മെയ് 1ന് കേന്ദ്ര സര്ക്കാര് മദ്യവില്പനശാലകള് തുറക്കാന് അനുമതി നല്കിയതാണ്. എന്നാല് സിപിഎം സെക്രട്ടറിയേറ്റ് തുറക്കേണ്ടെന്ന് തീരുമാനിച്ചു. കോവിഡന്റെ ഒരു ഘട്ടത്തിലും യോഗം കൂടി സംസ്ഥാന സര്ക്കാരിന് ഒരു നിര്ദേശവും നടത്താത്ത സിപിഎം സംസ്ഥാന സെക്രട്ടറിയേറ്റ് ഈ ആവശ്യത്തിന് യോഗം ചേരുകയും നിര്ദേശം നല്കുകയും ചെയ്തു. ഇത് ബാര് മുതലാളിമാരുടെ കയ്യില് നിന്ന് പിരിവ് ആരംഭിച്ചു കഴിഞ്ഞതിനാലാണ്.
പാര്സലിനായി നിയമഭേദഗതി കൊണ്ടുവരികയാണ് കേരള സര്ക്കാര്. കേന്ദ്രസര്ക്കാര് തൊഴില് നിയമം മാറ്റി എഴുതുന്നു. ഇവിടെ അബ്കാരി നിയമം മാറ്റി എഴുതുന്നു. ഫോണിലും ഓണലൈനിലും മദ്യം കിട്ടുന്ന സ്ഥിതി ഉണ്ടായാല് സാമൂഹ്യമായി മദ്യവ്യാപനം ഉണ്ടാകുകയും ബീവറേജസ് അടച്ചുപൂട്ടിക്കുകയും ചെയ്യും. 12400 കോടി രൂപ സംസ്ഥാന ഖജനാവിലേക്ക് കൊണ്ടുവരുന്ന ബീവറേജസ് കാലാന്തരത്തില് അടച്ചുപൂട്ടും.
സ്വകാര്യ മേഖലയിലെ മൊത്തം ബാറുകള് 955 ആണ്. ബിവറേജസ് 265, കണ്സ്യൂമര് ഫെഡ്ഡിന്റേത് 36, മൊത്തം 301 . 955 ഒട്ട്ലെറ്റുകള് പുതുതായി വരുമ്പോള് സംസ്ഥാന സര്ക്കാരിന്റെ നിയന്ത്രണത്തിലുള്ള ഔട്ട്ലെറ്റുകളുടെ മൂന്നിരട്ടി പുതിയ ഔട്ട്ലെറ്റുകള് വരുകയാണ്. ദുരന്ത കാലത്താണ് സര്ക്കാര് ഇത്തരം നീക്കങ്ങള് നടത്തുന്നത്. പ്രളയ കാലത്ത് ബ്രുവറികളും ഡിസ്റ്റലറികളും അനുവദിക്കാനുള്ള തീരുമാനമെടുത്ത സര്ക്കാര് അന്ന് പ്രതിപക്ഷത്തിന്റെ ശക്തമായ പ്രതിഷേധം നേരിട്ടു. കോവിഡ് 19ന്റെ മറവിലാണ് മദ്യത്തിന്റെ ചില്ലറ വ്യാപാരം സ്വകാര്യവത്കരിക്കാനുള്ള തീരുമാനം കൊണ്ടുവന്നിരിക്കുന്നതെന്നും രമേശ് ചെന്നിത്തല വ്യക്തമാക്കി.
