ഇറാൻ പാഠം പഠിക്കുന്നില്ല; അസാധാരണവും ക്രിയാത്മകവുമായ മാർഗങ്ങൾ തേടി യുഎസ്

വാഷിംഗ്ടൺ: ഇറാനെതിരെ സമ്മർദ്ദം ചെലുത്തുന്നതിനും ശിക്ഷിക്കുന്നതിനുമായി പുതിയതും ക്രിയാത്മകവുമായ അസാധാരണ മാർഗ്ഗങ്ങൾ കണ്ടെത്താൻ യുഎസ് മധ്യപൂർവേഷ്യയിലെ സെൻട്രൽ കമാൻഡ് (സെന്റ്കോം) സൈനിക വിശകലന വിദഗ്ധരോട് ആവശ്യപ്പെട്ടു. ഇറാനുമേൽ പുതിയ ആശയങ്ങൾ തേടിക്കൊണ്ട് ഒരു ഉദ്യോഗസ്ഥൻ കഴിഞ്ഞ ആഴ്ച ഇമെയിൽ വഴി ആശയവിനിമയം നടത്തിയതായി ‘സിഎൻഎൻ’ റിപ്പോർട്ട് ചെയ്യുന്നു.

ഇറാനെ ഒരു കരാറിലെത്തിക്കാൻ ട്രംപിന് മുന്നിൽ പരിമിതമായ മാർഗ്ഗങ്ങൾ മാത്രമാണുള്ളതെന്നാണ് ഈ അസാധാരണ നീക്കം വ്യക്തമാക്കുന്നത്. വ്യോമാക്രമണങ്ങൾ തുടരുന്നുണ്ടെങ്കിലും ഇറാന്റെ ഭൂഗർഭ ആണവ കേന്ദ്രങ്ങൾ പൂർണ്ണമായി തകർക്കാൻ പരമ്പരാഗത ആയുധങ്ങൾക്ക് കഴിയുന്നില്ല. നിലവിലെ സാഹചര്യത്തിൽ വലിയ അപകടസാധ്യതയുള്ള കരസേനാ നീക്കത്തിന് ട്രംപ് തയ്യാറല്ല. വ്യോമാക്രമണം മാത്രംകൊണ്ട് ലക്ഷ്യം കാണാൻ കഴിയില്ലെന്ന് യുഎസ് രഹസ്യാന്വേഷണ ഏജൻസികളും സൈനിക മേധാവികളും നേരത്തെ വ്യക്തമാക്കിയിരുന്നു.

തന്റെ പ്രതീക്ഷകൾ തെറ്റിയതിനാൽ ട്രംപ് വെറുമൊരു പ്രതീകാത്മക വിജയത്തോടെ യുദ്ധം അവസാനിപ്പിക്കാൻ ആഗ്രഹിക്കുന്നതായും റിപ്പോർട്ടുകളുണ്ട്. യുദ്ധത്തിൽ നിന്ന് പിന്മാറാൻ തന്നെ അനുവദിക്കുന്ന പ്രതീകാത്മക വിജയമെന്ന നിലയിൽ, മുമ്പ് ലക്ഷ്യമിട്ട അതേ സ്ഥലങ്ങളിലോ സമാനമായ സ്ഥലങ്ങളിലോ പ്രദർശന രീതിയിലുള്ള ആക്രമണങ്ങൾ നടത്താൻ ട്രംപ് ആലോചിക്കുന്നതായും സ്ഥിരീകരിക്കാത്ത റിപ്പോർട്ടുകളുണ്ട്.