ന്യൂഡല്ഹി: പാലക്കാട് ആന ചെരിഞ്ഞ സംഭവത്തില് മലപ്പുറം ജില്ലയെ രാജ്യത്തെ ക്രിമിനല് തലസ്ഥാനമാക്കി വിമര്ശിച്ച മേനകാഗാന്ധിക്കെതിരേ ശക്തമായ വിമര്ശനം. ഒരു പ്രത്യേക വിഭാഗത്തിന് ഭൂരിപക്ഷമുള്ള മേഖലയെ ക്രിമിനല് പ്രവര്ത്തനങ്ങളുടെ കേന്ദ്രമാക്കി വിശേഷിപ്പിച്ച് മുന്മന്ത്രി വംശീയ വിദ്വേഷം പരത്തുകയാണെന്നാണ് ആക്ഷേപം. മലപ്പുറത്തെ അക്രമത്തിന്റെ തലസ്ഥാനമാക്കി ചിത്രീകരിക്കുന്ന മേനകാഗാന്ധി സ്വന്തം മണ്ഡലത്തിലെ ക്രൈം റെക്കോഡുകളിലേക്കും തിരിഞ്ഞു നോക്കണമെന്നും ഗോശാലയായി മാറിയിട്ടുള്ള യുപിയില് ഇഞ്ചിഞ്ചായി ചാകുന്ന പശുക്കളെ കാണാതെ പോകരുതെന്നുമാണ് വിമര്ശനം.
നാഷണല് ക്രൈം റെക്കോഡ്സ് ബ്യൂറോ (എന്സിബി)യുടെ 2018 ലെ കണക്കുകള് പ്രകാരം മലപ്പുറത്തെയും മേനകാ ഗാന്ധിയുടെ മണ്ഡലമായ യുപിയിലെ സുല്ത്താന്പൂര് ഉള്പ്പെടുന്ന സുല്ത്താന്പൂര് ജില്ലയിലെയും കുറ്റകൃത്യങ്ങളെ താരതമ്യപ്പെടുത്തിയാണ് മലയാളത്തിലെ ഒരു ഓണ്ലൈന് മാധ്യമം വിമര്ശിച്ചിരിക്കുന്നത്. എന്സിബിയുടെ 2018 ലെ കണക്കുകളില് സുല്ത്താന്പൂര് ജില്ലയില് മാത്രം 55 കൊലപാതകങ്ങള്, ആറ് മനപ്പൂര്വ്വമല്ലാത്ത നരഹത്യകള്, 22 സ്ത്രീധന മരണങ്ങള്, ഇടുപ്പിച്ച ശേഷം വാഹനവുമായി മുങ്ങിയതടക്കം 206 വാഹനാപകടങ്ങള് എന്നിവയാണ്. തട്ടിക്കൊണ്ടു പോകലുകള് 292, കുട്ടികളെ തട്ടിക്കൊണ്ടു പോയത് 65 എന്നിവയുടെ എണ്ണവും ചൂണ്ടിക്കാട്ടിയിട്ടുണ്ട്.
അതേസമയം മലപ്പുറത്ത് കൊലപാതകം 18, മനപ്പൂര്വ്വമല്ലാത്ത നരഹത്യ ഏഴ്, സ്ത്രീധന മരണങ്ങള് രണ്ട്, ഇടുപ്പിച്ച ശേഷം വാഹനവുമായി മുങ്ങിയത് എട്ട്, മൊത്തം അപകടം 313 എന്നിങ്ങനെയാണെന്നും തട്ടിക്കൊണ്ടു പോയ കേസുകള് 24 ലും കുട്ടികളെ തട്ടിക്കൊണ്ടു പോകലുകള് വെറും നാലുമാണെന്നും പറയുന്നു. സ്വന്തം മണ്ഡലം ഉള്പ്പെടുന്ന ജില്ലയുടെ ക്രൈം നിരക്ക് പോലും നോക്കാതെ ഒരു പ്രത്യേക ജില്ലയെ അക്രമത്തിന്റെ കേന്ദ്രമാക്കി കാട്ടാനുള്ള മുന് കേന്ദ്രമന്ത്രിയുടെ വ്യഗ്രത ഒരു പ്രത്യേക വിഭാഗത്തെ ലക്ഷ്യം വെച്ചുള്ളതാണെന്നാണ് വിമര്ശനം.
ഇതേ മാധ്യമം മേനകാഗാന്ധി ആദ്യം കേഴേണ്ടത് ഗോശാലയാക്കി മാറ്റിയിരിക്കുന്ന ബിജെപി ഭരിക്കുന്ന യുപിയിലെ ചാകുന്ന പശുക്കളെ ഓര്ത്ത് വേണമെന്നും പറയുന്നു. ദൈവമാതാവ് എന്ന സങ്കല്പ്പത്തില് പശുക്കളുടെ വില്പ്പന നിരോധിച്ച യുപി അവയെ കൃഷിയിടങ്ങളിലെ അതിര്ത്തിയില് മുള്ളുവേലിയില് കുരുങ്ങിയും വാഹനം ഇടിച്ചും മരിക്കാന് വിടുകയാണെന്നും വിമര്ശിക്കുന്നു. പ്രായമായ കന്നുകാലികളെ വില്ക്കാന് കഴിയാതായതോടെ കര്ഷകര് പശുക്കളെ സാമ്പത്തീക നഷ്ടം സഹിച്ചും ഉപേക്ഷിക്കുകയാണ്. അവ തെരുവിലും പാടത്തും പറമ്പിലും കയറി കൃഷി നശിപ്പിച്ചും വിലസുമ്പോള് നാട്ടുകാര് തല്ലിയോടിക്കുന്നി. ചിലത് വലിയ കൃഷിഭൂമിയില് വലിച്ചു കെട്ടിയിരിക്കുന്ന മുള്ളുവേലിയില് കുരുങ്ങി മുഖവും വയറും കുടുങ്ങി ചോരവാര്ന്ന് ചാകുന്നു. വഴിയിലൂടെ അലസമായി പോകുന്ന പശുക്കള് വാഹനമിടിച്ച് ചാകുന്നു. അവ മനുഷ്യര്ക്കും അപകടമുണ്ടാക്കുന്നു എന്നും ചൂണ്ടിക്കാട്ടുന്നു.
പാലക്കാട് ആന ചെരിഞ്ഞ സംഭവത്തില് മലപ്പുറത്തെ മേനകാഗാന്ധി വിമര്ശിക്കുന്നത് കരുതിക്കൂട്ടിയാണെന്ന വിമര്ശനം ഇതിനകം തന്നെ ശക്തമാണ്. ആന ചെരിഞ്ഞ വിഷയത്തില് മലപ്പുറം ക്രിമിനല് പ്രവര്ത്തനങ്ങള്ക്ക് പേര് കേട്ടതാണെന്നും കേരളത്തില് ആനകള്ക്കും മറ്റു മൃഗങ്ങള്ക്കുമെതിരേ അതിക്രമങ്ങള് നടക്കുകയാണെന്നും പറയുന്നു. മേനകയുടെ ട്വീറ്റിന് നിരവധി പേര് വിമര്ശനത്തോടെ പ്രതികരിച്ചിട്ടും ടിവി ചാനലുകളില് നല്കിയ അഭിമുഖത്തില് വരെ ആരോപണങ്ങള് കടുപ്പിച്ചിരുന്നു.
