കോഴിക്കോട്: പ്രിയതമന്റെ ചേതനയറ്റ മുഖം നിസ്സഹായതയോടെ നോക്കി ആതിര... ഹൃദയം നുറുങ്ങിയ നിമിഷങ്ങള്ക്ക് സാക്ഷിയായി കോഴിക്കോട്ടെ സ്വകാര്യ ആശുപത്രി പരിസരം...
നിധിന്റെ മരണവിവരം ഭാര്യ ആതിര അറിഞ്ഞത് അല്പ്പം മുന്പ് മാത്രമായിരുന്നു. പ്രസവ സമയത്ത് ഒപ്പമുണ്ടായിരുന്ന ഡോക്ടര്മാരുടെ സംഘമാണ് പ്രിയതമന്റെ മരണവിവരം ആതിരയെ അറിയിച്ചത്.
ഇതോടെ പ്രസവത്തെ തുടര്ന്ന് കോഴിക്കോട് സ്വകാര്യ ആശുപത്രിയില് കഴിയുന്ന ആതിര നിധിന്റെ മൃതദേഹം കാണണമെന്ന് ആവശ്യപ്പെട്ടു. ഇതുപ്രകാരം ആംബുലന്സില് മൃതദേഹം ആശുപത്രിയ്ക്ക് മുന്നില് എത്തിക്കുകയും കൊവിഡ് സുരക്ഷാ മാനദണ്ഡങ്ങളെല്ലാം പാലിച്ച് ആതിരയെ കാണിക്കുകയും ചെയ്തു. കണ്ടു നിന്നവരുടെ നെഞ്ചുപൊട്ടുന്ന നിമിഷമായിരുന്നു അത്.
സുരക്ഷ വസ്ത്രങ്ങള് ധരിച്ച് വില്ച്ചെയറിലായിരുന്നു ആതിര നിധിനെ അവസാനമായി കാണാന് എത്തിയത്. ജൂലായ് ആദ്യ വാരമായിരുന്നു പ്രസവം നടക്കേണ്ടിയിരുന്നതെങ്കിലും നിധിന് സുഖമില്ലെന്ന് അറിയിച്ചപ്പോള് തന്നെ ആതിര തളര്ന്ന് വീണിരുന്നു. തുടര്ന്ന് ശസ്ത്രക്രിയയിലൂടെ പെണ്കുഞ്ഞിന് ജന്മം നല്കുകയായിരുന്നു.
ഇന്ന് പുലര്ച്ചെ അഞ്ചിനാണ് ദുബായില് നിന്ന് നെടുമ്പാശേരിയിലേക്കുള്ള വിമാനത്തില് മൃതദേഹം എത്തിച്ചത്. എയര് അറേബ്യയുടെ പ്രത്യേക വിമാനത്തിലാണ് മൃതദേഹം കൊച്ചിയിലെത്തിച്ചത്. വൈകീട്ട് സംസ്കാരം നടത്തും. ഹൃദയാഘാതത്തെ തുടര്ന്ന് തിങ്കളാഴ്ചയാണ് നിധിന് മരിക്കുന്നത്.
