ശ്രീനഗര്: പ്രത്യേക പദവി എടുത്തു മാറ്റുകയും കേന്ദ്രഭരണ പ്രദേശങ്ങളാക്കി മാറ്റുകയും ചെയ്ത ജമ്മു കശ്മീരില് സ്ഥിരതാമസക്കാരാണെന്ന് കാണിച്ച് തഹസീല്ദാര് നല്കിയ സര്ട്ടിഫിക്കറ്റ് കിട്ടിയവരില് ഐഎഎസു കാരനും. സര്ട്ടിഫിക്കറ്റ് കിട്ടിയ 25,000 പേരില് ബീഹാറില് നിന്നുള്ള സീനിയര് ജമ്മു കശ്മീര് ഐഎഎസ് ഉദ്യോഗസ്ഥന് നവീന്കുമാര് ചൗധരിയാണ് ഉള്പ്പെട്ടിരിക്കന്നത്. ഈ സര്ട്ടിഫിക്കറ്റ് കിട്ടുന്ന ആദ്യ ഐഎഎസ് ഉദ്യോഗസ്ഥനും ഇദ്ദേഹം തന്നെയായിരുന്നു.
കേന്ദ്രഭരണ പ്രദേശമായി മാറിയിട്ടുണ്ടെങ്കിലും നാട്ടുകാരല്ലാത്തവര്ക്ക് ജമ്മു കശ്മീരില് ഭൂമി വാങ്ങുന്നതിനും ജോലി ചെയ്യുന്നതിനും, വിദ്യാഭ്യാസത്തിനുമെല്ലാം ഈ സര്ട്ടിഫിക്കറ്റ് ആവശ്യമാണ്. നിലവില് ജമ്മുവിലെ ഗാന്ധി നഗറില് താമസിക്കന്ന നവീന് കെ ചൗധരിക്ക് ബാഹു തഹസീല്ദാര് രോഹിത് ശര്മ്മയാണ് സര്ട്ടിഫിക്കറ്റ് നല്കിയിരിക്കുന്നത്. ആധാര്കാര്ഡിലെ ഫോട്ടോ ഉള്പ്പെട്ട സര്ട്ടിഫിക്കറ്റാണ് നല്കിയിരിക്കുന്നത്. 15 വര്ഷത്തിന് മുകളില് ഇവിടെ താമസിക്കുന്നവര്ക്ക് മാത്രമാണ് സര്ട്ടിഫിക്കറ്റിന് അപേക്ഷിക്കാന് യോഗ്യതയുള്ളൂ.
സ്ഥിരതാമസക്കാരനെന്ന് കാണിക്കുന്ന സര്ട്ടിഫിക്കറ്റിനായി മൊത്തം 33,157 അപേക്ഷകള് ഉണ്ടായിരുന്നു. ഇവരില് 25,000 പേര്ക്ക് സര്ട്ടിഫിക്കറ്റ് കിട്ടി. ജമ്മു മേഖലയില് നിന്നുള്ള 10 ജില്ലകളില് നിന്നും 32,000 അപേക്ഷകള് ഉണ്ടായിരുന്നു. എന്നാല് കശ്മീരില് നിന്നും 720 അപേക്ഷകള് മാത്രമേ ഉണ്ടായിരുന്നുള്ളൂ. കശ്മീരില് പൂല്വാമയില് ആണ് കൂടുതല് സര്ട്ടിഫിക്കറ്റ് നല്കിയത്. 153 എണ്ണം. ശ്രീനഗറില് നിന്നും 65 അപേക്ഷകള് വന്നെങ്കിലും ഒരാള്ക്ക് പോലും സര്ട്ടിഫിക്കറ്റ് നല്കിയില്ല.
ജമ്മുവിലാണ് കൂടുതല് സര്ട്ടിഫിക്കറ്റ് നല്കിയത്. 8,500 പേര്ക്ക് സര്ട്ടിഫിക്കറ്റ് നല്കി. ദോഡ, രാജൗരി എന്നിവിടങ്ങളില് 6,214, പൂഞ്ചില് 6,123, ജമ്മുവില് 2,820 എന്നിങ്ങനെയാണ് നല്കിയത്. പ്രാദേശിക ശൗചാലയ നിര്മ്മാണത്തിനായി പടിഞ്ഞാറന് പാകിസ്താനില് നിന്നും ജമ്മുവിലേക്ക് 1957 ല് കൊണ്ടുവന്നു എന്ന് കരുതപ്പെടുന്ന പാക് അഭയാര്ത്ഥികളും വാത്മീകി സമുദായത്തില് പെടുന്നവരുമായ നൂറുകണക്കിന് പേര്ക്കും സ്ഥിരതാമസ സര്ട്ടിഫിക്കറ്റ് നല്കുകയുണ്ടായി. പൗരാവകാശം നിഷേധിക്കപ്പെട്ടിരുന്ന ഇവര് ആറ് ദശകങ്ങള്ക്ക് ശേഷമാണ് അംഗീകരിക്കപ്പെടുന്നത്. എല്ലാ അവകാശങ്ങളും കിട്ടുമെന്ന് ഇവര്ക്ക് സമരകാലത്ത് ഉറപ്പ് കിട്ടിയിരുന്നെങ്കിലും സര്ക്കാര് ജോലി, കുട്ടികള്ക്ക് വിദ്യാഭ്യാസം തുടങ്ങിയ കാര്യങ്ങളെല്ലാം ഇവര്ക്ക് അന്യമായിരുന്നു.
അപേക്ഷകര്ക്ക് അര്ഹത ഉണ്ടായിട്ടും സര്ട്ടിഫിക്കറ്റ് നല്കാതിരിക്കുന്ന തഹസീല്ദാര്മാരുടെ ശമ്പളത്തില് നിന്നും 50,000 രൂപ പിഴ ഈടാക്കാനും നിര്ദേശമുണ്ട്. അതേസമയം കശ്മീരിന്റെ ഭൂപ്രകൃതി മാറ്റിവരയ്ക്കപ്പെടുമെന്ന് പറഞ്ഞ് പുതിയ നിയമത്തെ പ്രതിപക്ഷം എതിര്ക്കുന്നുണ്ട്. 2020 മെയ് 18 ന് കൊണ്ടു വന്ന നിയമം അനുസരിച്ച് സര്ക്കാര് ഉദ്യോഗസ്ഥര് അല്ലാത്തവര് ഉള്പ്പെടെ വിവിധ വിഭാഗങ്ങളില് പെടുന്ന പ്രദേശവാസികള് അല്ലാത്തവര്ക്ക് സ്ഥിരതാമസ സര്ട്ടിഫിക്കറ്റിന് അപേക്ഷിക്കാനാകും. നേരത്തേ കശ്മീരികള്ക്ക് മാത്രമേ ഇവിടെ ഭൂമി വാങ്ങാനും സര്ക്കാര് ജോലിയ്ക്ക് അപേക്ഷ നല്കാനും കഴിയുമായിരുന്നുള്ളൂ. എന്നാല് 370 ാം വകുപ്പ് എടുത്തുമാറ്റിയത് അനുസരിച്ച് 2019 ആഗസ്റ്റ് 5 മുതല് ഈ സ്ഥിതി മാറി.
