കൊച്ചി : ഇടുക്കി രാജാപ്പാറയിലെ വിവാദ ക്രഷര് യൂണിറ്റിന്റെ ഉദ്ഘാടനത്തിനെത്തി ബെല്ലി ഡാന്സ് കളിച്ച ഉക്രൈന് സുന്ദരികളെത്തിയത് ചാര്ട്ടേഡ് വിമാനത്തില്. ഇവര് കൊച്ചിയിലെത്തിയശേഷമാണ് ഇടുക്കി ശാന്തന്പാറയ്ക്കു സമീപം ചതുരംഗപ്പാറയില് തണ്ണിക്കോട് ഗ്രാനൈറ്റ്സിന്റെ പുതിയ ക്രഷറിന്റെ ഉദ്ഘാടനത്തോടനുബന്ധിച്ച് നടത്തിയ നിശാപ്പാര്ട്ടിയില് ബെല്ലി ഡാന്സ് പ്രകടനം നടത്തിയത്.
നിശാപ്പാര്ട്ടിയില് 200 ലിറ്റര് മദ്യം വിളമ്പിയെന്നും വിവരമുണ്ട്. കോവിഡ് നിയന്ത്രണം ലംഘിച്ച് നൂറിലേറെപ്പേര് പങ്കെടുത്ത പരിപാടിക്ക് അനുമതി ആരും അനുമതി നല്കിയിരുന്നില്ല. മദ്യസല്ക്കാരം നടത്താന് പ്രത്യേക ലൈസന്സ് ഉണ്ടായിരുന്നില്ല. പാര്ട്ടി നടത്താന് മദ്യം ലഭിച്ചത് എങ്ങിനെ എന്നതും പോലീസ് അന്വേഷിക്കുന്നുണ്ട്. യുക്രൈന് സുന്ദരികള് എത്തിയത് കോവിഡ് കാലത്ത് വിദ്യാര്ഥികളുമായി എത്തിയ ചാര്ട്ടേഡ് ഫ്ളൈറ്റിലായിരുന്നു. നിരവധി ഇന്ത്യന് വിദ്യാര്ഥികള് യുക്രൈനില് പഠനം നടത്തുന്നുണ്ട്.
ഇവര്ക്കു മടങ്ങുന്നതിനായിട്ടാണ് ചാര്ട്ടേഡ് ഫ്ളൈറ്റ് സജ്ജമാക്കിയത്. യുവതികള്ക്ക് ഓരോരുത്തര്ക്കും അഞ്ചുലക്ഷമായിരുന്നു ഓരോരുത്തര്ക്കും നല്കിയത്. എന്നാല്, ഇത് കുറഞ്ഞ തുകയാണെന്നും സൂചനയുണ്ട്. ചെറിയ തുക പ്രതിഫലത്തിന് വേണ്ടി ഇവര് ഇത്രദൂരം സഞ്ചരിച്ചെത്താന് സാധ്യത കുറവാണ്. പാര്ട്ടി കഴിഞ്ഞശേഷം ഇവര് ഫോര്ട്ട് കൊച്ചിയിലേക്ക് പോയതായിട്ടാണ് സൂചന. ഇവരെ പോലീസ് തേടുന്നുണ്ട്. യുവതികള് ക്വാറന്റൈന് ലംഘിച്ചാണ് നിശാപ്പാര്ട്ടിയില് പങ്കെടുത്തതെന്നും സൂചനയുണ്ട്. വിസാചട്ടം ലംഘിച്ചതായും പോലീസ് സംശയിക്കുന്നു.
നിശാപ്പാര്ട്ടി നടത്തിയ തണ്ണിക്കോട് ഗ്രാനൈറ്റ്സ് ഉടമ കോതമംഗലം ചേലാട് സ്വദേശി റോയ് കുര്യന് അടക്കം 29 പേര് അറസ്റ്റിലാണ്. റിസോര്ട്ടിന്റെ ലൈസന്സും റദ്ദാക്കി. അതിനിടയില് ഉടുമ്പന്ചോല നിശാപാര്ട്ടിയില് നിയമലംഘനം നടത്താന് കുട്ടു നിന്ന ഉദ്യോഗസ്ഥര്ക്ക് കിട്ടിയത് വമ്പന് സ്നേഹോപകാരങ്ങളായിരുന്നെന്ന് മംഗളത്തിന്റെ കട്ടപ്പന ലേഖകനും റിപ്പോര്ട്ട് ചെയ്യുന്നു.
കോവിഡ് നിയന്ത്രണങ്ങള് നിലനില്ക്കെ വിദേശ നര്ത്തകിമാരെ ഉള്പ്പെടെ പങ്കെടുപ്പിച്ച് സ്വകാര്യ റിസോര്ട്ടില് സംഘടിപ്പിച്ച നിശാപാര്ട്ടിയുടെ മറവില് ഉന്നതര് കൈപ്പറ്റിയത് വമ്പന് പാരിതോഷികങ്ങള്. രേഖകളില്ലാതെ ക്രഷര് പ്രവര്ത്തിപ്പിക്കാനും റിസോര്ട്ടില് ആരോഗ്യ പ്രവര്ത്തകരെയും പോലീസിനെയും കബളിപ്പിച്ച് പാര്ട്ടി നടത്താനും അനുവാദം നല്കിയവര്ക്കുള്ള സ്നേഹ സമ്മാനങ്ങള് പാര്ട്ടിക്കിടെ വിതരണം ചെയ്തതായിട്ടാണ് വിവരം. ഇക്കാര്യം പോലീസ് രഹസ്യാന്വേഷണ വിഭാഗത്തിനും വ്യക്തമായിട്ടുണ്ട്. ജില്ലയിലെ ഉന്നത പോലീസ് ഉദ്യോഗസ്ഥനും പാര്ട്ടിയില് പങ്കെടുത്തതായിട്ടുള്ള വിവരം പുറത്തു വന്നിരുന്നു. ഇതിനാല് തന്നെ സ്നേഹ സമ്മാനങ്ങളുടെ വിവരം ഉദ്യോഗസ്ഥര് പുറത്തു വിട്ടിട്ടില്ല.
അനുമതിയില്ലാതെ നടന്ന നിശാപാര്ട്ടിയും ബെല്ലി ഡാന്സും വിവാദത്തിലായതോടെ തണ്ണിക്കോട് മെറ്റല്സ് എന്ന ക്രഷര് യൂണിറ്റിന് റവന്യൂ വകുപ്പ് സ്റ്റോപ്പ് മെമ്മോ നല്കിയിരിക്കുകയാണ്. രേഖകളില്ലാതെ പ്രദേശത്ത് വമ്പന് ക്രഷര് എങ്ങനെ പ്രവര്ത്തനം ആരംഭിച്ചുവെന്ന ചോദ്യമാണ് ഇപ്പോള് ഉയര്ന്നു വരുന്നത്. ഉദ്യോഗസ്ഥരെ ചാക്കിലാക്കാന് ഉടമകള് പണം വാരിയെറിഞ്ഞതിന്റെ സൂചനകളാണ് ഇതെന്ന ആരോപണവുമായി കോണ്ഗ്രസ് അടക്കമുള്ള രാഷ്ട്രീയ പാര്ട്ടികളും രംഗത്തെത്തിയിട്ടുണ്ട്. ഒരു കോടി രൂപ ചാരിറ്റി അടക്കമുള്ള പ്രവര്ത്തനങ്ങള്ക്കും വാദ്ഗാനം ചെയ്തിരുന്നു.
ഇത്തരത്തില് ഉന്നതര്ക്ക് പാരിതോഷികങ്ങള് വാഗ്ദാനം ചെയ്തിരുന്നുവെന്നാണ് രഹസ്യമായി ലഭിക്കുന്ന വിവരം. ഉക്രെയിനില് നിന്നും എത്തിയ നര്ത്തകിമാരെ കോവിഡ് ചട്ടങ്ങള് പാലിക്കാതെയാണ് റിസോര്ട്ടില് എത്തിച്ചത്. ക്വാറിയുടെ പ്രവര്ത്തനം ആരംഭിക്കാന് ഉള്പ്പെടെ ഉടമകള് ഒട്ടേറെ വഴിവിട്ട മാര്ഗങ്ങള് സ്വീകരിച്ചിട്ടുണ്ടെന്ന വിവരവും പുറത്തു വരുന്നുണ്ട്.
ഇത്തരത്തില് സഹായിച്ചവര്ക്കുള്ള പാരിതോഷിക വിതരണത്തിനായിട്ടാണ് റിസോര്ട്ടില് മദ്യസല്ക്കാരവും ബെല്ലി ഡാന്സും ഉള്പ്പടെയുള്ള കലാപരിപാടികള് സംഘടിപ്പിച്ചതെന്നാണ് വിവരം. ഉന്നത ഉദ്യോഗസ്ഥരും രാഷ്ട്രീയ നേതാക്കളും അടക്കമുള്ളവര് പാര്ട്ടിയില് പങ്കെടുത്തിരുന്നു. ഇവരില് ആരൊക്കെ ഉടമകളില് നിന്നും പ്രതിഫലം പറ്റിയിട്ടുണ്ടെന്നതും നിഗൂഡമാണ്.
