ന്യൂഡല്ഹി: നോയിഡയിലെ ബോര്ഡിങ്ങ് സ്കൂളില് കഴിഞ്ഞ ദിവസം 14കാരിയെ മരിച്ച നിലയില് കണ്ടെത്തിയ സംഭവത്തില് രൂക്ഷമായ ആരോപണങ്ങളുമായി കുടുംബം. കുട്ടിയെ ബലാത്സംഗം ചെയ്തു എന്നാണ് കുടുംബം ആരോപിക്കുന്നത്. വീട്ടുകാരുടെ അനുവാദമില്ലാതെ മൃതദേഹം സംസ്ക്കരിച്ചുവെന്നും ബന്ധുക്കള് ആരോപിക്കുന്നു.
ഹരിയാനയിലെ മഹേന്ദ്രഗാര്ഹ് സ്വദേശിയായ പെണ്കുട്ടി ജൂലൈ മൂന്നിനാണ് മരിച്ചത് എങ്കിലും സംഭവം കഴിഞ്ഞ ഞായറാഴ്ചയാണ് പുറത്തറിഞ്ഞത്. സംഭവത്തില് നടപടി എടുക്കണമെന്ന് ആവശ്യപ്പെട്ട് ഇപ്പോള് പെണ്കുട്ടിയുടെ കുടുബം മുഖ്യമന്ത്രി മനോഹര് ലാല് ഖട്ടറിന് കത്തയച്ചിരിക്കുകയാണ്. സംഭവ സമയത്ത് ആരും പരാതിപ്പെടാതിരുന്നതിനാല് സംഭവവുമായി ബന്ധപ്പെട്ട് കേസൊന്നും രജിസ്റ്റര് ചെയ്തിട്ടില്ല.
ലോക്ക്ഡൗണ് സമയത്ത കുട്ടി വീട്ടിലായിരുന്നു. ജൂണ് 18നാണ് പിന്നീട് സ്കൂളിലേക്ക് മടങ്ങുന്നത്. ജൂലൈ മൂന്നിന് സ്കൂളില് നിന്ന് വിളിച്ചതനുസരിച്ച് എത്തിയപ്പോള് മകളുടെ മൃതദേഹമാണ് കണ്ടത് എന്ന് വീട്ടുകാര് പറയുന്നു. അധികൃതര് ഫോണുകള് ബലമായി പിടിച്ചുവാങ്ങുകയും മകളുടെ മൃതദേഹം സംസ്കരിക്കാനായി ബലമായി ചില പേപ്പറില് ഒപ്പിടുവിച്ചെന്നും പെണ്കുട്ടിയുടെ മാതാപിതാക്കള് ആരോപിക്കുന്നു.
പോലീസ് സംഭവത്തെക്കുറിച്ച് അറിഞ്ഞത് സോഷ്യല് മീഡിയ വഴിയാണെന്നും പെണ്കുട്ടിയുടെ മൃതദേഹത്തിന് സമീപത്ത് നിന്ന് ആത്മഹത്യാക്കുറിപ്പ് ലഭിച്ചിട്ടുണ്ടെന്നും പെണ്കുട്ടിയുടെ കുടുംബം ഉന്നയിക്കുന്ന ആരോപണങ്ങളെക്കുറിച്ച് ഉടന് അന്വേഷണം നടത്തുമെന്നും അഡീഷണല് ഡെപ്യൂട്ടി കമ്മീഷണര് വ്യക്തമാക്കി.
