കല്പ്പറ്റ: ഇന്ത്യയിലെ പ്രമുഖ ഐ.ടി. ഹബുകളിലൊന്നായ ബംഗളൂരുവില് കോവിഡ് വ്യാപനം രൂക്ഷമാകുന്നതിനിടെ മലയാളികള് കൂട്ടത്തോടെ ജോലി സ്ഥലത്തു നിന്ന് കേരളത്തിലേക്ക് പാലായനം ചെയ്യുന്നു. ദിവസവും 2000ത്തിലധികം പേര്ക്ക് വരെ കോവിഡ് ബാധിക്കുന്ന അവസ്ഥയിലേക്ക് കാര്യങ്ങള് എത്തിയതോടെ ബംഗളൂരുവില് ലോക്ഡൗണ് കര്ക്കശമാക്കിയിരിക്കുകയാണ്. ഇതോടെ സുരക്ഷിത സ്ഥാനം തേടി മലയാളികള് കുടുംബമടക്കം കേരളത്തിലേക്കൊഴുകാന് തുടങ്ങി. ഇതിനിടെ ഇങ്ങനെ വരുന്നവരില് പലരും കോവിഡ് സുരക്ഷാ മാനദണ്ഡങ്ങള് ലംഘിച്ച് ടൗണുകളിലിറങ്ങി കറങ്ങി നടക്കുന്നത് കേരളത്തില് കോവിഡ് വ്യാപനം രൂക്ഷമാക്കുമെന്ന ആശങ്കയും ഉയര്ന്നു.
കഴിഞ്ഞ ഏതാനും ദിവസങ്ങളായി മുത്തങ്ങ ചെക്ക് പോസ്റ്റിലൂടെ വയനാട് വഴി കേരളത്തിലേക്ക് പ്രവേശിക്കുന്നവരുടെ എണ്ണം വര്ധിച്ചു. ഇന്നലെ രാവിലെ തന്നെ കര്ണാടക അതിര്ത്തിയിലെ മുത്തങ്ങ കോവിഡ് കെയര് സെന്ററില് രണ്ട് കിലോമീറ്ററിലധികം ദൂരത്തിലാണ് വാഹനങ്ങളുടെ നിര പ്രത്യക്ഷപ്പെട്ടത്. ജൂലൈ 14ന് 713 വാഹനങ്ങളിലായി 2162 ആളുകളാണ് കേരളത്തിലേക്ക് കടന്നത്. അതിര്ത്തി ചെക്ക് പോസ്റ്റില് സജ്ജീകരിച്ചിരിക്കുന്ന കോവിഡ് കെയര് സെന്ററില് വച്ച് ആളുകളെ വൈദ്യ പരിശോധനക്ക് വിധേയമാക്കിയശേഷമാണ് കേരളത്തിലേക്ക് കടത്തിവിടുന്നത്. മറ്റ് സംസ്ഥാനങ്ങളില് നിന്നെത്തുന്ന വാഹനങ്ങളില് പോലീസിന്റെ വഴിക്കണ്ണ് സ്റ്റിക്കര് പതിക്കുകയും ചെയ്യും.
വഴിക്കണ്ണ് സ്റ്റിക്കര് പതിച്ച വാഹനങ്ങളിലുള്ളവര് എട്ടുമണിക്കൂറിനുള്ളില് ലക്ഷ്യ സ്ഥാനത്തെത്തി വീടുകളിലോ സൗകര്യപ്രദമായ മറ്റ് ഇടങ്ങളിലോ ക്വാറന്റൈനില് കഴിയണമെന്നാണ് അധികൃതര് നിര്ദേശിക്കുന്നത്. ഇവര് മറ്റെവിടെയും തങ്ങാനോ മറ്റുള്ളവരുമായി സമ്പര്ക്കം പുലര്ത്താനോ പാടില്ല. എന്നാല് ചെക്ക്പോസ്റ്റ് കടന്ന് കേരളത്തിലേക്ക് പ്രവേശിച്ചുകഴിഞ്ഞാല് പലരും ടൗണുകളിലിറങ്ങി കറങ്ങി നടക്കുന്നതും കടകളിലെത്തി ആളുകളുമായി സമ്പര്ക്കം പുലര്ത്തുന്നതുമാണ് ആശങ്ക സൃഷ്ടിക്കുന്നത്. കഴിഞ്ഞദിവസം കര്ണാടകയില് നിന്നെത്തി ബത്തേരി ടൗണില് കറങ്ങി നടന്ന എട്ട് യാത്രക്കാരെയും ഇവരുടെ വാഹനവും പോലീസ് കസ്റ്റഡിയില് എടുത്തിരുന്നു. വഴിക്കണ്ണ് സ്റ്റിക്കര് പതിച്ച് വരുന്നവരെ കടകളില് പ്രവേശിപ്പിക്കരുതെന്നും ഇത്തരക്കാരെക്കുറിച്ച് വിവരമറിയിക്കണമെന്നും ആവശ്യപ്പെട്ട് ടൗണുകളില് ബോധവത്ക്കരണം നടത്തിക്കൊണ്ടിരിക്കുകയാണ് പോലീസ്.
ഇതിനിടെ പച്ചക്കറി എടുക്കാനും മറ്റ് വ്യാപാര ആവശ്യങ്ങള്ക്കുമായി വാഹനങ്ങളുമായി കര്ണാടകയിലെത്തുന്ന മലയാളികള് കൂടുതല് സമയം അവിടെ തങ്ങുന്നതും ക്രമസമാധാന പ്രശ്നങ്ങള്ക്ക് കാരണമായിട്ടുണ്ട്. മലയാളികളുടെ വാഹനം കര്ണാടക്കാര് തടഞ്ഞുവെക്കാന് തുടങ്ങിയതോടെ കര്ണാടകയിലെത്തുന്ന കേരള രജിസ്ട്രേഷന് വാഹനങ്ങള് വളരെ പെട്ടന്ന് തന്നെ തിരിച്ചുമടങ്ങാന് നിര്ദേശം നല്കണമെന്ന് ആവശ്യപ്പെട്ട് കര്ണാടക ചാമ്രാജ്നഗര് ജില്ലാ കലക്ടര് വയനാട് കലക്ടര്ക്ക് കഴിഞ്ഞദിവസം കത്തയച്ചിരുന്നു. കൂടുതലും പച്ചക്കറി വാഹനങ്ങളാണ് വയനാട് മുഖേനെ കര്ണാടകയിലെ ചാമരാജ്നഗര് ജില്ലയിലെ വിവിധ പ്രദേശങ്ങളിലെത്തുന്നത്.
