പത്മരാജന് ചിത്രങ്ങളില് എക്കാലത്തേയും മലയാളികളുടെ സ്വകാര്യ ഇഷ്ടമാണ് തൂവാനത്തുമ്പികള് എന്ന ചിത്രം. തൂവാനത്തുമ്പികള് പുറത്തിറങ്ങിയിട്ട് മുപ്പത് വര്ഷം പൂര്ത്തിയായിരിക്കുകയാണ്. മോഹന്ലാല്, സുമലത, പാര്വ്വതി, അശോകന്, സുകുമാരി, ബാബു നമ്പൂതിരി തുടങ്ങിയ വന് താരനിരയാണ് ചിത്രത്തില് അണിനിരന്നത്. ഇപ്പോള് തൂവാനത്തുമ്പികളുടെ ചിത്രീകരണത്തിനിടെ നടന്ന രസകരമായ സംഭവത്തെ കുറിച്ചുള്ള ഓര്മകള് പങ്കുവെക്കുകയാണ് നടന് അശോകന്.
തന്റെ യൂട്യൂബ് ചാനല് പുറത്തുവിട്ട വിഡിയോയിലൂടെയായിരുന്നു ആശോകന് ഓര്മ്മകള് പങ്കുവെച്ചത്. മോഹന്ലാലും ചിത്രത്തിന്റെ വിതരണക്കാരായ ഗാന്ധിമതി ഫിലിംസ് ബാലനും നടന് ബാബുനമ്പൂതിരിയുമൊക്കെ തൂവാനത്തുമ്പികളുടെ വിശേഷം പങ്കുവെക്കാന് വിഡിയോയില് വരുന്നുണ്ട്. തൂവാനത്തുമ്പികള് ഇപ്പോഴും പുതുമ അനുഭവപ്പെടുത്തുന്ന സിനിമയാണ് എന്നാണ് മോഹന്ലാല് പറഞ്ഞത്. തിരക്കഥയിലും സംഭാഷണത്തിനും കഥാപാത്രങ്ങളിലും പുതുമ കൊണ്ടുവന്ന തൂവാനത്തുമ്പികള് പിന്നീട് ഒരു കള്ട്ട് സിനിമയായി മാറിയെന്നും മോഹന്ലാല് പറഞ്ഞു.
'' മോഹന്ലാലിന്റെ ക്ഷമയെക്കുറിച്ച് കൂടുതല് പേര്ക്ക് അറിയില്ല. വടക്കുംനാഥ ക്ഷേത്രത്തില് ഷൂട്ടു ചെയ്യുന്ന സമയത്ത് നിയന്ത്രിക്കാന് സാധിക്കാത്ത രീതിയില് ജനങ്ങളായിരുന്നു. ക്ഷേത്രപരിസരം ആയതിനാല് പൊലീസുകാര്ക്കു പോലും നിയന്ത്രിക്കാന് സാധിക്കാത്ത അവസ്ഥയായിരുന്നു. ബഹളം കാരണം ഷൂട്ടിങ് തടസപ്പെടുന്ന അവസ്ഥയുണ്ടായി. ഇടയ്ക്ക് മോഹന്ലാല് പറയുന്നുണ്ട്. ആരും ബഹളം വയ്ക്കരുതെന്നും ഷൂട്ട് കഴിഞ്ഞാല് താന് വരുമെന്നും. എന്നാല് ജനങ്ങള് ആവേശം മൂത്ത് ബഹളം വെക്കുകയായിരുന്നു.
ഒരു ഷോട്ട് എടുത്തുകഴിഞ്ഞ സമയത്ത് ജനക്കൂട്ടത്തില് നിന്ന് ഒരാള് ഓടിവന്ന് മോഹന്ലാലിന്റെ കൈയില് വലിച്ചുകൊണ്ട് ഒരു തള്ള്. തോളില് കയ്യിടുകയും ഷര്ട്ടില് പിടിക്കുകയുമൊക്കെ ചെയ്തു. മോഹന്ലാല് ഞെട്ടിപ്പോയി. ദേഷ്യം വന്നിട്ട് മോഹന്ലാല് ഓടാന് തുടങ്ങിയ ആവന്റെ കോളറില് കയറി പിടിച്ചു. എന്താടാ ചെയ്തത് എന്ന് ചോദിച്ചു. അവന് നിന്ന് വിറക്കുകയായിരുന്നു അതിനൊപ്പം അവന്റെ മുഖത്ത് ഒരു സന്തോഷവും ഉണ്ടായി. അപ്പോള് അവന് പറഞ്ഞ് കൂട്ടുകാരുമായി പന്തയം വെച്ചാണ് താന് വന്നത് എന്നായിരുന്നു. ലാലേട്ടന്റെ കൈയില് തൊടാന് പറ്റുമോ എന്നായിരുന്നു പന്തയം. ഇതു കേട്ടതോടെ മോഹന്ലാല് കൂള് ആയി, പെട്ടെന്ന് വന്ന ദേഷ്യം പെട്ടെന്ന് പോയി അവനെ സമാധാനിപ്പിച്ചാണ് പറഞ്ഞയച്ചത്.'' - അശോകന് പറഞ്ഞു.
