കൊച്ചി: സ്വര്ണക്കടത്തുകേസിലെ പ്രതിയായ സ്വപ്നാ സുരേഷ് പ്രളയദുരിതാശ്വാസ സഹായത്തിലും വെട്ടിപ്പ് നടത്തിതായി തെളിഞ്ഞു. യു.എ.ഇ.യില്നിന്നുള്ള സഹായഫണ്ടില് നിന്നാണ് ഇവര് കോടിക്കണക്കിന് രൂപ വെട്ടിപ്പ് നടത്തിയത്.
യു.എ.ഇ.യിലെ സന്നദ്ധസംഘടന കേരളത്തിലെ ഭവനനിര്മാണത്തിനായി 20 കോടിയോളം രൂപ നല്കിയിരുന്നു. ഈ പണമാണ് തിരിമറി നടത്തിയത്. അതേ സമയം, 1.38 കോടി രൂപമാത്രമാണ് ഇടനിലക്കാരിയായി നേടിയതെന്നാണ് സ്വപ്നയുടെ മൊഴി. സ്വപ്നയുടെ മൊഴി കസ്റ്റംസ് പരിഗണിച്ചിട്ടില്ല. ഇതേ കുറിച്ച് കൂടുതല് അന്വേഷണം നടത്താനാണ് തീരുമാനം.
സ്വപ്നയുടെ അക്കൗണ്ടിലേക്ക് 1.35 ലക്ഷം ഡോളര് വന്നതായി കസ്റ്റംസ് കണ്ടെത്തിയിരുന്നു. ഇതിനുപുറമേ 50,000 ഡോളര്കൂടി തനിക്ക് മറ്റു രീതിയില് പ്രതിഫലം കിട്ടിയതായി സ്വപ്ന മൊഴിനല്കിയിട്ടുണ്ട്. എന്നാല്, കഴിഞ്ഞവര്ഷം യു.എ.ഇ.യിലെ പ്രമുഖ സന്നദ്ധസംഘടന കേരളത്തിന്റെ പുനര്നിര്മാണത്തിനായി 20 കോടി രൂപയാണ് ആദ്യഘട്ടമെന്ന നിലയ്ക്ക് നല്കിയത്.
പണം നല്കിയ സംഘടനയുടെ ധാരണാപത്രം കേരളവും സന്നദ്ധസംഘടനാ പ്രതിനിധികളും ഒപ്പുവെച്ചിരുന്നു. മുഖ്യമന്ത്രി പിണറായി വിജയന്റെ സാന്നിധ്യത്തിലായിരുന്നു ഇത്. യു.എ.ഇ. കോണ്സുല് ജനറല് ജമാല് ഹുസൈന് അല്സാബിയും ചടങ്ങിലുണ്ടായിരുന്നു. ഇതിലും സ്വപ്ന ഇടനിലക്കാരിയായിരുന്നെന്നാണ് കരുതുന്നത്.
കോണ്സുല് ജനറലിനും അറ്റാഷെയ്ക്കും സമാനമായതോതില് വിഹിതം കിട്ടിയിരുന്നതായും സ്വപ്ന കസ്റ്റംസിനോടു വെളിപ്പെടുത്തി. ഇത്തരത്തില് കിട്ടിയ പണം കണക്കില്പ്പെടുത്താനാണ് എം. ശിവശങ്കര് വഴി തിരുവനന്തപുരത്തെ ചാര്ട്ടേഡ് അക്കൗണ്ടന്റിന്റെ സഹായം തേടിയത്. അതുകൊണ്ട് തന്നെ കൂടുതല് വിശദാംശങ്ങള്ക്കായി ശിവശങ്കറിനെ വീണ്ടും ചോദ്യംചെയ്തേക്കും.
