ഇരിങ്ങാലക്കുട: മാള സ്റ്റേഷന് പരിധിയിലെ പുത്തന്ചിറ മാണിയംകാവ് ക്ഷേത്രത്തില്നിന്നു തിരുവാഭരണങ്ങള് കവര്ന്ന കേസിലെ മുന് ക്ഷേത്രം മേല്ശാന്തിയായ പ്രതിയെ കുടുക്കാന് കേരള പോലിസിനെ സഹായിച്ചത് കേരള പോലീസ് കെ.9 സ്ക്വാഡിലെ സൂപ്പര് ഹീറോയിന് ഹണി.
സംഭവ സ്ഥലത്തെത്തിയ ഹണി പ്രതി തകര്ത്ത് വലിച്ചെറിഞ്ഞ സിസിടിവി ക്യാമറയുടെ തുമ്പില് നിന്നു തിരുവാഭരണങ്ങള് കവര്ച്ച ചെയ്ത ശ്രീകോവിലിനു മുന്നില്നിന്നു മണം പിടിച്ചു അമ്പലത്തിനു പുറകിലുള്ള ചെറിയ തോടിനടുത്തേക്കും തിരിച്ചു അതേ പറമ്പിലൂടെ മണം പിടിച്ചു തൊട്ടടുത്ത ടാറിട്ട റോഡിലേക്കും കുതിച്ചു പാഞ്ഞു. തുടര്ന്ന് പ്രതിയുടെ മണം തിരിച്ചറിഞ്ഞ ഹണി വലത്തോട്ട് വെട്ടി തിരിഞ്ഞു റോഡിലൂടെ കുറച്ചു ദൂരം സഞ്ചരിച്ച് റോഡിനരികിലുള്ള പ്രതിയുടെ വീടിനരികിലായി മണത്തുനിന്നു.
നായ പോയ വഴിയിലുള്ള സംശയം തോന്നിയ മുന് മേല്ശാന്തിയെ ചോദ്യം ചെയ്ത പോലീസ് പ്രതിയെ തിരിച്ചറിഞ്ഞു. കുറ്റവാളിയുടെ മണം പിന്തുടര്ന്ന് ഹണി നടത്തിയ കൃത്യമായ പ്രവര്ത്തിയിലൂടെ തൃശൂര് റൂറല് കെ.9 സ്ക്വാഡിനും കേരള പോലീസിനും വീണ്ടും അഭിമാന നിമിഷം സമ്മാനിച്ചു.
സീനിയര് സിവില് പോലീസ് ഓഫീസര് സുരേഷ് പി.ജിയുടെ നേതൃത്വത്തില് സി.പി.ഒമാരായ റിജേഷ് എം.എഫ് , അനീഷ് പി.ആര്. എന്നിവരാണ് ഹണിയെ പരിശീലിപ്പിക്കുന്നത്. ഇതിനു മുമ്പ് ഇടശ്ശേരി ജ്വല്ലറി കവര്ച്ചയും,കട്ടന്ബസാര് കൊലപാതകമടക്കം പത്തോളം കേസുകളിലെ പ്രതികളെ ഹണി കുടുക്കിയിട്ടുണ്ട്.
