തിരുവനന്തപുരം: യുഎഇ കോണ്സുലേറ്റിന്റെ പേരില് വ്യാജമായി അക്കൗണ്ട് തുടങ്ങി, സ്വപ്നയുടെ നേതൃത്വത്തില് രാജ്യാന്തര സംഘടനകളെ തെറ്റിദ്ധരിപ്പിച്ചു പണമെത്തിച്ചെന്നു സൂചന. നയതന്ത്ര പരിരക്ഷ ലഭിക്കാനാണ് കോണ്സുലേറ്റ് അറിയാതെ ആ പേരില് അക്കൗണ്ട് എടുത്തത്. കോണ്സുലേറ്റില് സ്വപ്നയ്ക്ക് ജോലിയുണ്ടായിരുന്ന സമയത്താണ് അക്കൗണ്ട് തുടങ്ങിയത്.
ജീവകാരുണ്യത്തിന്റെ പേരില് ഇത്തരത്തില് ബാങ്ക് അക്കൗണ്ട് തുടങ്ങി വിദേശത്തു നിന്നു കോടികള് എത്തിച്ചുവെന്നു വിവരം ലഭിച്ചതിനെത്തുടര്ന്ന് എന്ഐഎയും എന്ഫോഴ്സ്മെന്റ് ഡയറക്ടറേറ്റും (ഇഡി) കൂടുതല് അന്വേഷണത്തിലേക്ക് കടക്കുകയാണ്.
2018 ഒക്ടോബര് മുതല് ഈ അക്കൗണ്ടിലേക്ക് കോടികള് എത്തിയതായാണ് വിവരം. കിട്ടുന്ന തുകയില് കുറച്ചുമാത്രം സന്നദ്ധ സംഘടനകള്ക്കു വിതരണം ചെയ്യും. ബാക്കിയുള്ളവ സ്വപ്നയും സംഘവും കൈക്കലാക്കിയെന്നാണു എന്ഐഎയ്ക്കും ഇഡിക്കും ലഭിച്ച വിവരം. കോണ്സുലേറ്റിന്റെ വ്യാജസീലും രേഖകളും സ്വര്ണക്കടത്തു കേസിലെ ഒന്നാം പ്രതി പി.എസ്. സരിത്തിന്റെ വീട്ടില് നിന്നു നേരത്തേ പിടിച്ചെടുത്തിരുന്നു.
