ലിസ്ബണ്: യൂറോപ്യലെ ചാമ്പ്യന്മാര് ബയേണ് മ്യൂണിക് തന്നെ. നെയ്മറുടെയും ഇക്കാഡിയുടെയും എംബാപ്പെയുടെയും തേരിലേറിയ ഫ്രഞ്ച് കരുത്തന്മാരായ പിഎസ്ജി ജര്മ്മന് കരുത്തായ ബയേണ് മ്യൂണിക്കിനു മുന്നില് 1-0 ന് അടിയറവ് പറഞ്ഞു. കന്നി കിരീടം ലക്ഷ്യമിട്ടെത്തിയ പിഎസ്ജി വീണു. ലിസ്ബണിലെ എസ്റ്റാഡിയോ ഡാ ലൂസ് സ്റ്റേഡിയത്തില് നടന്ന ഫൈനലില് ജര്മ്മന് വമ്പന്മാരായ ബയേണ് മ്യൂണിക് തന്നെ ചാമ്പ്യന്സ് ലീഗ് കിരീടമുയര്ത്തി. ആറാം തവണയാണ് ബയേണ് ചാമ്പ്യന്സ് ലീഗ് കിരീടമുയര്ത്തുന്നത്.
കരുതലോടെയാണ് ഇരു ടീമും മത്സരം ആരംഭിച്ചത്. 59-ാം മിനിറ്റില് കിംഗ്സ്ലി കോമനാണ് ബയേണിനായി വിജയഗോള് നേടിയത്. പത്തൊമ്പതാം മിനിറ്റില് കൈലിയന് എംബാപ്പെയുടെ പാസ് സ്വീകരിച്ച നെയ്മര് തൊടുത്ത ഷോട്ട് ബയേണ് ഗോള്കീപ്പര് മാനുവല് നൂയര് തലനാരിഴയ്ക്കാണ് രക്ഷപ്പെടുത്തിയത്.
11-ാം ചാമ്പ്യന്സ് ലീഗ് ഫൈനലിനാണ് ബയേണ് ലിസ്ബണിലിറങ്ങിയത്. ആകെ കിരീടനേട്ടത്തില് സ്പാനിഷ് വമ്പന്മാരായ ബാഴ്സിലോനയെ(അഞ്ച്) മറികടന്ന ബയേണ്, ആറു കിരീടവുമായി ലിവര്പൂളിനൊപ്പമെത്തി. ഇറ്റാലിയന് ക്ലബ് എസി മിലാനും സ്പെയിനില് നിന്നുള്ള റയല് മാഡ്രിഡും മാത്രമാണ് ബയേണിനു മുന്നില്.
ചാമ്പ്യന്സ് ലീഗില് എട്ടു തവണയാണ് ബയേണും പിഎസ്ജിയും തമ്മില് ഏറ്റുമുട്ടിയത്. എട്ടില് അഞ്ചും ജയിച്ച പിഎസ്ജിക്കായിരുന്നു മുന്തൂക്കം. എന്നാല് കലാശപ്പോരില് അത് വിലപ്പോയില്ല. യുവേഫ റാങ്കില് ഏഴ്ാം സ്ഥാനക്കാരായ പിഎസ്ജി എ ഗ്രൂപ്പ് ജേതാക്കളായി തുടങ്ങിയ തേരോട്ടമാണ് ഫൈനലിലെത്തിച്ചത്. യുവേഫ റാങ്കില് രണ്ടാം സ്ഥാനക്കാരായ ബയേണ് 2012-13 സീസണിലാണ് അവസാനം കിരീടമുയര്ത്തിയത്.
