കോവിഡ് എത്തിയതോടെ എല്ലാ കാര്യങ്ങളിലും മാറ്റം വന്നു. കോവിഡ് മാനദണ്ഡങ്ങള് അനുസരിച്ചാണ് എല്ലാ കാര്യങ്ങളും സജ്ജീകരിക്കുന്നതും ചെയ്യുന്നതുമെല്ലാം. വിവാഹകാര്യത്തിലും വലിയ രീതിയിലുള്ള മാറ്റമാണ് കോവിഡ് വരുത്തിയത്. ആളും ആരവവും ഇല്ലെങ്കിലും വിവാഹം ഭംഗിയായി നടത്താമെന്ന് എല്ലാവരും മനസിലാക്കി. കോവിഡ് മാനദണ്ഡങ്ങള് പാലിച്ച് തന്നെ ഏത് രീതിയില് വിവാഹം അടിപൊളിയാക്കാമെന്നാണ് ഇന്നത്തെ തലമുറ നോക്കുന്നത്.
സാഗരം സാക്ഷിയാക്കി വിവാഹ നിശ്ചയം മനോഹരമായി നടത്തിയിരിക്കുകയാണ് അന്ഷൂള് ചോപ്രയും അദിതിയും. ഫോട്ടോഗ്രാഫറായ കെ.ആര് വിനയന്റെയും ടി.എം. റനിതയുടെയും മകളായ അദിതിയും പശ്ചിമ ഡല്ഹിയിലെ ഇഷീക് ചോപ്രയുടെയും അല്കയുടെയും മകന് അന്ഷൂള് ചോപ്രയും തമ്മിലുള്ള വിവാഹനിശ്ചയമാണ് കടല്ത്തീരത്ത് പ്രഭാത സൂര്യന്റെ സാന്നിദ്ധ്യത്തില് നടത്തിയത്. ഇരുവര്ക്കുമൊപ്പം സുഹൃത്തുക്കള് മാത്രമേ ഉണ്ടായിരുന്നുള്ളൂ.
ഒരു വര്ഷം മുന്പ് നിശ്ചയിച്ച ചടങ്ങുകള് കൊറോണ കാരണം മാറ്റിവെയ്ക്കാന് അന്ഷൂളും അദിതിയും തയ്യാറല്ലായിരുന്നു. എല്ലാവര്ക്കും എത്തിച്ചേരാന് സാധ്യമല്ലാതെ വന്നതോടെ അഡയാറിലെ നടന് മോഹന്ലാലിന്റെ വീടിനോട് ചേര്ന്നുള്ള സ്വകാര്യ ബീച്ചില് സൗകര്യമൊരുക്കി. സൗകര്യം മാത്രം പോരല്ലോ, ചടങ്ങുകള് നടത്തണമല്ലോ. ഇതോടെ അദിതിയുടെ അച്ഛന് വിനയന് ഒരു നിര്ദ്ദേശം പറഞ്ഞു. 'പുലര്ച്ചെ ബീച്ചില് ഇറങ്ങി സൂര്യന് ഉദിക്കുമ്പോള് സൂര്യനെ ധ്യാനിച്ച് പരസ്പരം മോതിരം കൈമാറാം, പരസ്പരം മാലയിടുക...''. എല്ലാ സഹായവുമായി നര്ത്തകി ഉഷാ ബാലാജിയും ചിത്രകാരനായ ബാലകൃഷ്ണന് അനാട്ടും ഒപ്പം ദില്പ്രീത് സിങ്, മെറില് കെ. എബ്രഹാം, മായംഗ് ചൗഹാന്, അര്ജ്ജുന് നാരായണന് എന്നീ സുഹൃത്തുക്കളും ചേര്ന്നതോടെ അന്ഷൂളും അദിതിയും ആഗ്രഹിച്ചതിനേക്കാള് ഭംഗിയായി ചടങ്ങ് പൂര്ത്തിയായി.
