ലഖ്നൗ: അയോധ്യയിൽ രാമക്ഷേത്ര നിര്മാണം അനുവദിച്ച സുപ്രീം കോടതി വിധിയുടെ ഭാഗമായി മോസ്ക് നിര്മിക്കാൻ സര്ക്കാര് അനുവദിച്ച സ്ഥലത്തിൻ്റെ വിശദാംശങ്ങള് പുറത്ത്. സ്ഥലത്ത് നടത്താനിരിക്കുന്ന നിര്മാണ പ്രവര്ത്തനങ്ങളുടെ വിശദാംശങ്ങള് പള്ളി നിര്മാണത്തിനായി രൂപീകരിച്ച ട്രസ്റ്റിലെ ഒരു ഭാരവാഹിയെ ഉദ്ധരിച്ച് വാര്ത്താ ഏജൻസിയായ പിടിഐ ആണ് പുറത്തു വിട്ടത്.
അയോധ്യയിലെ ധാന്നിപൂര് ഗ്രാമത്തിൽ പള്ളി നിര്മാണത്തിനായി അനുവദിച്ച അഞ്ചേക്കര് ഭൂമിയിൽ ഒരു ആശുപത്രിയും മ്യൂസിയവും ഉള്പ്പെടെ നിര്മിക്കുമെന്നാണ് റിപ്പോര്ട്ട്. "ധാന്നിപ്പൂരിൽ നിര്മിക്കുന്ന പള്ളി ഉള്പ്പെടുന്ന സമുച്ചയത്തിൽ ആശുപത്രി, ഇന്തോ - ഇസ്ലാമിക് റിസര്ച്ച് സെൻ്ററിന്റെ ഭാഗമായ ഒരു മ്യൂസിയം തുടങ്ങിയ സൗകര്യങ്ങളുണ്ടായിരിക്കും. 15000 ചതുരശ്ര അടി വലുപ്പമാണ് മോസ്കിനുണ്ടാകുക. ബാക്കി സ്ഥലത്ത് മറ്റു നിര്മാണങ്ങള് നടത്തും."
ഇന്തോ ഇസ്ലാമിക് കൺച്ചറൽ ഫൗണ്ടേഷൻ സെക്രട്ടറിയും വക്താവുമയ അത്താര് ഹുസൈൻ വാര്ത്താ ഏജൻസിയോട് പറഞ്ഞു. രാമക്ഷേത്രത്തോളം തന്നെ വലുപ്പം മോസ്കിനും ഉണ്ടായിരിക്കും എന്നാണ് റിപ്പോര്ട്ട്. റിട്ടയേഡ് പ്രൊഫസറും പ്രസിദ്ധ ഭക്ഷണനിരൂപകനുമായ പുഷ്പേഷ് പന്ത് ആയിരിക്കും മ്യൂസിയത്തിൻ്റെ ക്യൂറേറ്റര് എന്നും അദ്ദേഹം അറിയിച്ചു. "പ്രശസ്ത ഭക്ഷണ നിരൂപകനായ പുഷ്പേഷ് പന്ത് മ്യൂസിയം ക്യൂറേറ്റ് ചെയ്യാനുള്ള സമ്മതം ഇന്നലെയാണ് നല്കിയത്."
സംസ്ഥാന സര്ക്കാര് അനുവദിച്ച അഞ്ചേക്കര് സ്ഥലത്ത് മോസ്ക് ഉള്പ്പെടെയുള്ള നിര്മാണ പ്രവര്ത്തനങ്ങള് നടത്താനായി ഉത്തര് പ്രദേശ് സുന്നി സെൻട്രൽ വഖബ് ബോര്ഡ് രൂപീകരിച്ച ട്രസ്റ്റാണ് ഇന്തോ - ഇസ്ലാമിക് കള്ച്ചറൽ ഫൗണ്ടേഷൻ.
ഡൽഹി ജാമിയ മിലിയ സര്വകലാശാലയിലെ പ്രൊഫസറായ എസ് എം അക്തര് ആയിരിക്കും പദ്ധതിയുടെ കൺസള്ട്ടൻ്റ് ആര്ക്കിടെക്റ്റ് എന്നും ട്രസ്റ്റ് സെക്രട്ടറി വ്യക്തമാക്കിയിട്ടുണ്ട്. ഇന്ത്യയുടെ മൂല്യങ്ങളുടെയും ഇസ്ലാമിൻ്റെ ആത്മാവിന്റെയും സംയോജനമായിരിക്കും മോസ്ക് സമുച്ചയമെന്ന് മുൻപ് എസ് എം അക്തര് വാര്ത്താ ഏജൻസിയെ അറിയിച്ചിരുന്നു.
വര്ഷങ്ങള് നീണ്ട നിയമയുദ്ധത്തിനു ശേഷം കഴിഞ്ഞ വര്ഷം നവംബര് ഒൻപതിനായിരുന്നു തര്ക്കഭൂമിയിൽ രാമക്ഷേത്ര നിര്മാണം അനുവദിച്ച് സുപ്രീം കോടതി ബെഞ്ച് വിധി പുറപ്പെടുവിച്ചത്. പകരമായി മസ്ജിദ് നിര്മിക്കാനായി അയോധ്യയിൽ തന്നെ അഞ്ചേക്കര് സ്ഥലം സംസ്ഥാന സര്ക്കാര് കണ്ടെത്തി നല്കണമെന്നും കോടതി ഉത്തരവിട്ടിരുന്നു. കഴിഞ്ഞ ഓഗസ്റ്റ് അഞ്ചിന് പ്രധാനമന്ത്രി നരേന്ദ്ര മോദി അയോധ്യ രാമക്ഷേത്രതതിന് തറക്കല്ലിട്ടിരുന്നു.
1992നാണ് സ്ഥലത്ത് പുരാതന രാമക്ഷേത്രം നിലനിന്നിരുന്നു എന്ന് ആരോപിച്ച് 'കര്സേവകര്' അയോധ്യയിലെ ബാബ്റി മസ്ജിദ് തകര്ത്തത്.
