നിവിൻ പോളി, നയൻതാര എന്നിവരെ കേന്ദ്രകഥാപാത്രങ്ങളാക്കി കഴിഞ്ഞ വർഷം ഓണത്തിന് പുറത്തിറങ്ങി ഹിറ്റടിച്ച ധ്യാൻ ശ്രീനിവാസന്റെ ആദ്യ സംവിധാന സംരംഭമായിരുന്നു 'ലവ് ആക്ഷൻ ഡ്രാമ' എന്ന ചിത്രം. ചിത്രത്തിന്റെ ഒന്നാം വാർഷിക വേളയിൽ ഒരു സന്തോഷ വാർത്ത പ്രേക്ഷകരെ അറിയിച്ചിരിക്കുകയാണ് നിർമാതാക്കളിൽ ഒരാളായ അജു വർഗീസ്.
ഫൺന്റാസ്റ്റിക് ഫിലിംസിന്റെ ബാനറിൽ അജു വർഗീസ്, വിശാഖ് സുബ്രഹ്മണ്യം, ധ്യാൻ ശ്രീനിവാസൻ എന്നിവർ ചേർന്നാണ് ലൗ ആക്ഷൻ ഡ്രാമ നിർമ്മിച്ചിരുന്നത്. ആ ടീം വീണ്ടും ഒന്നിക്കുന്നുവെന്ന വാർത്തയാണ് അജു വർഗീസ് പുറത്ത് വിട്ടിരിക്കുന്നത്. എന്നാൽ പിന്നെ ഒന്നും കൂടെയായാലോ എന്ന് കുറിച്ചുകൊണ്ടാണ് അജു സര്പ്രൈസ് പുറത്തുവിട്ടിരിക്കുന്നത്.
ധ്യാൻ ശ്രീനിവാസൻ സംവിധാനവും ഫൺന്റാസ്റ്റിക് ഫിലിംസ് നിർമാണവും നിർവഹിക്കുന്ന ചിത്രത്തെ കുറിച്ചുള്ള കൂടുതൽ വിവരങ്ങൾ പിന്നീട് പുറത്തുവിടുമെന്നും അറിയിച്ചിട്ടുണ്ട്. അജു വർഗീസ് നായകനാകുന്ന സാജൻ ബേക്കറി സിൻസ് 1962വാണ് അടുത്തതായി പുറത്തിറങ്ങുവാൻ പോകുന്ന ഫണ്ന്റാസ്റ്റിക് ഫിലിംസിന്റെ മറ്റൊരു ചിത്രം. കൂടാതെ സൂപ്പർഹിറ്റ് ചിത്രമായ ഹെലനിലൂടെ വിതരണ രംഗത്തും ഫണ്ന്റാസ്റ്റിക് ഫിലിംസ് സാന്നിധ്യമറിയിച്ചിരുന്നു.
