ബെംഗളൂരു: മയക്കുമരുന്നുമായി ബന്ധപ്പെട്ട് ഇന്ത്യയെ ഞെട്ടിച്ചു കൊണ്ടിരിക്കുന്ന സാന്ഡല്വുഡില് റെയ്ഡിന്റെ വിവരവും പ്രതികള്ക്ക് നേരത്തേ തന്നെ കിട്ടി. റെയ്ഡിന്റെ വിവരം ചോര്ന്ന കാര്യം അറ്സ്റ്റ് ചെയ്യപ്പെട്ടിരിക്കുന്ന രാഗിണി ദ്വിവേദിയുടെ സുഹൃത്ത് രവിശങ്കര്, ബിസിനസുകാരന് പ്രശാന്ത് രംഗ എന്നിവര് തമ്മിലുള്ള മൊബൈല് ചാറ്റില്നിന്നാണ് കണ്ടെത്തിയത്.
പ്രതികള്ക്ക് വിവരം നല്കിയത് പേലീസില് നിന്നു തന്നെയുള്ള സുഹൃത്ത് ബന്ധങ്ങളില് നിന്നുമാണെന്നാണ് വിലയിരുത്തല്. ആഴ്ചകള്ക്ക് മുമ്പ് തന്നെ റെയ്ഡിന്റെ കാര്യം പ്രതികളെ പോലീസിലെ ഇവരുടെ ചാരന്മാര് കൈമാറിയെന്നാണ് വിവരം.
ലഹരിമരുന്നു കേസില് അറസ്റ്റിലായിരിക്കന്ന രാഗിണി ദ്വിവേദി, സഞ്ജന ഗല്റാണി, ലഹരിപ്പാര്ട്ടികള് സംഘടിപ്പിക്കുന്ന വിരണ് ഖന്ന എന്നിവരുടെ വീടുകളിലാണ് സെന്ട്രല് െ്രെകംബ്രാഞ്ച് (സി.സി.ബി.) റെയ്ഡ് നടത്തിയത്. രാഗിണി ദ്വിവേദിയുടെ റിമാന്ഡ് റിപ്പോര്ട്ടിലാണ് സി.സി.ബി. റെയ്ഡ് വിവരം ചോര്ന്നതായി വെളിപ്പെടുത്തിയത്. രവിശങ്കറും പ്രശാന്ത് രംഗയും തമ്മില് 23 സന്ദേശങ്ങളാണ് കൈമാറിയത്.
ഇവര് തന്നെയാണ് പഞ്ചനക്ഷത്ര ഹോട്ടലുകളിലും റിസോര്ട്ടുകളിലും നിശാക്ലബ്ബുകളിലും നടന്ന പാര്ട്ടികളിലേക്ക് ലഹരിമരുന്ന് എത്തിച്ചതും. ജോയന്റ് പോലീസ് കമ്മിഷണര് സന്ദീപ് പാട്ടില് റെയ്ഡിന് തയ്യാറെടുക്കുന്നുണ്ടെന്ന് റെയ്ഡിന് രണ്ടു മാസം മുമ്പ് തന്നെ രവിശങ്കറിനും പ്രശാന്ത് രംഗയ്ക്കും സന്ദേശം കിട്ടിയിരുന്നു. ആഫ്രിക്കക്കാരന് ലോംപെപ്പര് സാംബയോട് രവിശങ്കര് ലഹരിമരുന്ന് ആവശ്യപ്പെട്ട വിവരവും മൊബൈലില് നിന്നു ലഭിച്ചു. രവിശങ്കറും ലോം പെപ്പര് സാംബയും തമ്മില് ലഹരിമരുന്നിടപാടിന് 12 തവണ ചാറ്റ് ചെയ്തിരുന്നു എന്നാണ് വിവരം.
വീട്ടില് നടന്ന റെയ്ഡില് ലഹരിമരുന്ന് പടിച്ചെടുത്തിട്ടില്ലെന്ന് നടി രാഗിണി ദ്വിവേദിയുടെ അച്ഛന് കേണല് രാകേഷ് കുമാര് ദ്വിവേദി പറഞ്ഞു. പോലീസുകാര് വീട്ടില് എല്ലായിടത്തും പരിശോധിച്ചെങ്കിലും മയക്കുമരുന്നുകളൊന്നും പിടിച്ചെടുത്തിട്ടില്ല. ലഹരി ഉപയോഗിക്കുന്ന ആളാണെങ്കില് പ്രചാരണത്തിന് സര്ക്കാര് മകളെ ക്ഷണിക്കില്ലായിരുന്നല്ലോ എന്നും അദ്ദേഹം ചോദിച്ചു. എന്നാല് അറസ്റ്റിലായ സഞ്ജന ഗല്റാണി ലഹരി മരുന്ന് ഇടപാടില് ഉള്പ്പെട്ടിട്ടുള്ള 30 പേരുടെ പേരുകള് അന്വേഷണ സംഘത്തിന് നല്കിയതായിട്ടാണ് വിവരം. ചലച്ചിത്ര താരങ്ങളും രാഷ്ട്രീയക്കാരും ഉന്നതോദ്യോഗസ്ഥരുമെല്ലാം വരുന്ന വന് നിരയാണ് അത്.
അരൂര് സ്വദേശി നിയാസ് മുഹമ്മദ് സുഹൃത്താണെന്നും സഞ്ജന സമ്മതിച്ചു. നിയാസ് കേരളത്തില് നിന്നാണ് ലഹരി എത്തിച്ചിരുന്നത്. കോവിഡ് നിയന്ത്രണങ്ങള്ക്കിടയിലും ഇവര് രഹസ്യമായി പാര്ട്ടികള് സംഘടിപ്പിച്ചിരുന്നു. ലഹരിമരുന്ന് ഉപയോഗവുമായി ബന്ധപ്പെട്ട് സഞ്ജനയും രാഗിണിയും നല്കിയ പേരുകള് ഒന്നു തന്നെയാണ്. എം.പി.മാരുടെയും എം.എല്.എ.മാരുടെയും മക്കള് വരെയുണ്ട്. കേസുമായി ബന്ധപ്പെട്ട് മറ്റൊരു പ്രമുഖ നടി കൂടി ഉടന് കുരുങ്ങും. ഇവരുടെ വീട്ടില് റെയ്ഡ് നടത്താനുള്ള നീക്കത്തിലാണ് അന്വേഷണ സംഘമെന്നാണ് വിവരം.
പാര്ട്ടികളില് ലഹരി ഉപയോഗിക്കുന്നവര്, ഇതിനായി മയക്കുമരുന്ന് എത്തിക്കുന്നവര്. ശൃംഖലയെ നിയന്ത്രിക്കുന്നവര് എന്നിങ്ങനെ ലാക്കാക്കിയാണ് അന്വേഷണം. കന്നഡ സിനിമയില്നിന്നുള്ള വിവരശേഖരണത്തിനുശേഷമായിരിക്കും കേരളം അടക്കമുള്ള ഇതരസംസ്ഥാനങ്ങളിലേക്ക് അന്വേഷണം നീളുക.
