ബംഗളുരു: ബംഗളുരു മയക്കുമരുന്ന് കേസില് കന്നഡിയിലെ താരദമ്പതികളായ നടന് ദിഗന്തിനെയും ഐന്ദ്രിത റേയും ചോദ്യംചെയ്യാന് സെന്ട്രല് ക്രൈംബ്രാഞ്ച് ബ്യൂറോ (സി.സി.ബി). ഇന്നു രാവിലെ 11നു ചോദ്യംചെയ്യലിനു ഹാജരാകണമെന്നാവശ്യപ്പെട്ട് ഇരുവര്ക്കും സമന്സ് നല്കി. നടിമാരായ രാഗിണി ദ്വിവേദി, സഞ്ജന ഗല്റാണി എന്നിവരടക്കം 15 പേര്ക്കെതിരേയാണു കേസെടുത്തിട്ടുള്ളത്.
ഇന്നലെ മുന് മന്ത്രിയുമായ ജീവരാജ് ആല്വയുടെ മകനും ബോളിവുഡ് നടന് വിവേക് ഒബ്റോയിയുടെ ഭാര്യാസഹോദരനുമായ ആദിത്യ ആല്വയുടെ ബംഗളുരുവിലെ വസതിയില് സി.സി.ബി. പരിശോധന നടത്തി. ആദിത്യയുടെ ബംഗ്ളൂരുവിനോട് ചേര്ന്നുള്ള നാലേക്കര് സ്ഥലത്ത് പതിവായി ലഹരി പാര്ട്ടികള് നടത്തിയിരുന്നതായി കണ്ടെത്തിയിരുന്നു. ആദിത്യ ഇപ്പോള് ഒളിവിലാണ്.
സഞ്ജനയുമായുള്ള ബന്ധത്തിന്റെ പേരില് കോണ്ഗ്രസ് എം.എല്.എ. സമീര് ഖാനെതിരേ ആരോപണം ഉന്നയിച്ച സിനിമ നിര്മാതാവ് പ്രശാന്ത് സമ്പര്ഗിയെ 18നു വീണ്ടും ചോദ്യം ചെയ്യും. സഞ്ജനയ്ക്കൊപ്പം സമീര് അഹമ്മദ് ശ്രീലങ്കയില് അവധിക്കാലം ചെലവിട്ടെന്ന് സമ്പര്ഗി ആരോപിച്ചിരുന്നു. കേസ് അന്വേഷണം ശ്രീലങ്കയിലെ ചൂതാട്ടകേന്ദ്രങ്ങളിലേക്കും വ്യാപിപ്പിച്ചു.
ബംഗളുരുവില്നിന്നു ശ്രീലങ്കയിലേക്കും തിരിച്ചും ലഹരി മരുന്ന് കടത്തിയതിന്റെ തെളിവുകള് സി.സി.ബിക്കു ലഭിച്ചു. ചൂതാട്ടകേന്ദ്രം നടത്തിപ്പില് പങ്കാളികളായ ബംഗളുരുവിലെ മൂന്ന് വ്യവസായികളെ കേന്ദ്രീകരിച്ചാണ് അന്വേഷണം. നേരത്തെ അറസ്റ്റിലായ നടി രാഗിണി ദ്വിവേദിയെ ബംഗളുരു മജിസ്ട്രേട്ട് കോടതി14 ദിവസത്തേക്ക് റിമാന്ഡ് ചെയ്തു. ഇവരെ പാരപ്പന അഗ്രഹാര ജയിലിലേക്ക് മാറ്റി.
സുശാന്ത് സിങ് രജ്പുത്ത് കേസില് വീണ്ടും വിവാദ പരാമര്ശങ്ങളുമായി നടി കങ്കണ റണാവത്ത്. സുശാന്ത് കേസിലും ബോളിവുഡിലെ ലഹരി ഇടപാടിലും മഹാരാഷ്ട്ര മുഖ്യമന്ത്രി ഉദ്ധവ് താക്കറെയുടെ മകനും മന്ത്രിയുമായ ആദിത്യ താക്കറെയ്ക്ക് ബന്ധമുണ്ടെന്ന് അവര് ആരോപിച്ചു. തന്നെ വിമര്ശിച്ച ബോളിവുഡ് താരങ്ങളെയും അവര് വിമര്ശിച്ചു. മുംബൈയില്നിന്നു ജന്മനാടായ ഹിമാചല് പ്രദേശിലേക്കു മടങ്ങുന്നതിനുമുമ്പാണു നടി പുതിയ ആരോപണം ഉന്നയിച്ചത്.
സുശാന്തിന്റെ കൊലപാതകികളെയും ബോളിവുഡിലെ ലഹരി മാഫിയയെയുംകുറിച്ചുള്ള വിവരങ്ങള് പുറത്തുകൊണ്ടുവന്നു എന്നതാണു മുഖ്യമന്ത്രി ഉദ്ധവ് താക്കറെയുടെ പ്രശ്നമെന്നും അവര് പറഞ്ഞു. ഇതിനിടെയാണു കുറച്ചുപേര് കാരണം ചലച്ചിത്ര മേഖലയെ ഒന്നടങ്കം അപമാനിക്കുന്നതിനോട് യോജിപ്പിപ്പില്ലെന്നു അമിതാഭ് ബച്ചന്റെ ഭാര്യയും മുന് നടിയുമായ ജയ ബച്ചന് രാജ്യസഭയില് പ്രതികരിച്ചത്. സമാജ്വാദി പാര്ട്ടിയുടെ പ്രതിനിധിയാണു ജയ. പാലു കൊടുത്ത കൈക്കു തന്നെകൊത്തുന്ന തരത്തിലാണ് ചിലരുടെ പെരുമാറ്റമെന്നും അവര് പറഞ്ഞു.
ബോജ്പുരി, ഹിന്ദി നടനും ഉത്തര്പ്രദേശില്നിന്നുള്ള ബി.ജെ.പി. എം.പിയുമായ രവി കിഷനാണ് ഇന്നലെ പാര്ലമെന്റില് വിഷയം ഉന്നയിച്ചത്. ഇതോടെയാണു ജയക്കെതിരേ കങ്കണ തിരിഞ്ഞത്. തന്റെ സ്ഥാനത്ത് ജയയുടെ മകള് ശ്വേതയായിരുന്നുവെങ്കില് ഇതേ നിലപാട് സ്വീകരിക്കുമായിരുന്നോയെന്ന് അവര് ആരാഞ്ഞു. മകളെ ചെറുപ്പത്തില് തന്നെ അടിച്ചവശയാക്കി മയക്കുമരുന്ന് നല്കി പീഡിപ്പിച്ചിരുന്നുവെങ്കില് ഇങ്ങനെ പറയുമായിരുന്നോ? അഭിഷേക് ബച്ചന് ഒരുദിവസം തൂങ്ങി മരിച്ചാല് എന്താകും നിങ്ങള് പറയുക.- കങ്കണ പറഞ്ഞു.
