ന്യുഡല്ഹി: രാമക്ഷേത്രം, ബാബ്റി മസ്ജിദ് വിഷയങ്ങളിലെ കോണ്ഗ്രസ് നിലപാട് ചര്ച്ചയാകുന്നു. ബാബ്റി മസ്ജിദ് തകര്ത്ത കേസിലെ പ്രതികളെ വെറുതെ വിട്ട കോടതി വിധിയില് കോണ്ഗ്രസ് നേതാക്കളായ സോണിയ ഗാന്ധിയും രാഹുല് ഗാന്ധിയും പ്രിയങ്കാ ഗാന്ധിയും ഇതുവരെ പ്രതികരിച്ചിട്ടില്ല. ബുധനാഴ്ചയാണ് 28 വര്ഷം നീണ്ട കേസില് ലഖ്നൗ സി.ബി.ഐ കോടതി പ്രതികളെ വെറുതെ വിട്ടത്.
ബാബ്റി മസ്ജിദ് തകര്ത്തത് ആകസ്മികമായാണെന്നും ഗൂഢാലോചന നടത്തിയിട്ടില്ലെന്നുമാണ് കോടതിയുടെ കണ്ടെത്തല്. എല്.കെ അദ്വാനി അടക്കമുള്ള നേതാക്കള് അക്രമികളെ പിന്തിരിപ്പിക്കാന് ശ്രമിച്ചുവെന്നും കോടതി കണ്ടെത്തി. ബാബ്റി മസ്ജിദ് പൊളിക്കുന്നതിന്െ്റ ചിത്രങ്ങള് കോടതി തെളിവായി അംഗീകരിച്ചില്ല.
കോടതി വിധി നീതിന്യായ വ്യവസ്ഥയില് ജനങ്ങള്ക്കുള്ള വിശ്വാസം തകര്ക്കുന്നതാണെന്ന് വ്യാപക വിമര്ശനം ഉയര്ന്നിരിക്കെയാണ് പ്രധാനപ്പെട്ട് കോണ്ഗ്രസ് നേതാക്കളുടെ മൗനം ചര്ച്ചയാകുന്നത്. വിധിയെ സംബന്ധിച്ച് സോണിയ, രാഹുല്, പ്രിയങ്ക തുടങ്ങിയ നേതാക്കള് ഇതുവരെ പ്രതികരിച്ചിട്ടില്ല. പൊതുവെ എല്ലാ വിഷയങ്ങളിലും പ്രതികരിക്കുന്ന രാഹുലും പ്രിയങ്കയും അടക്കമുള്ളവര് എന്തുകൊണ്ടാണ് പ്രതികരിക്കാത്തതെന്ന് ചോദിച്ച് ട്വിറ്ററില് നിരവധി പേര് രംഗത്ത് വന്നിട്ടുണ്ട്.
ബാബ്റി വിധിയില് മൗനം പാലിക്കുന്ന പ്രിയങ്ക ഓഗസ്റ്റില് രാമക്ഷേത്രത്തിന് ആശംസ നേര്ന്നതും വിമര്ശകര് ചൂണ്ടിക്കാട്ടുന്നു. ദേശീയ ഐക്യം ഉയര്ത്തിപ്പിടിക്കുന്ന ചടങ്ങായി ഭൂമി പൂജ മാറട്ടെ എന്നാണ് അന്ന് പ്രിയങ്ക ആശംസിച്ചത്.
