ദുബായ് : മങ്കാദിങ് ചെയ്യുന്നതിന് മുന്പ് മുന്നറിയിപ്പ് നല്കണം എന്ന വാദത്തെ വിമര്ശിച്ച് ഇന്ത്യന് മുന് നായകന് സുനില് ഗാവസ്കര്. സിക്സ് പറത്തുന്നത് മുന്പ് ബാറ്റ്സ്മാന് ബൗളര്ക്ക് മുന്നറിയിപ്പ് നല്കാറുണ്ടോ എന്നാണ് ഇവിടെ ഗാവസ്കര് ചോദിക്കുന്നത്. ദേശിയ മാധ്യമത്തിന് നല്കിയ അഭിമുഖത്തിലായിരുന്നു ഗാവസ്കറുടെ പ്രതികരണം.
ബൗണ്സറും, ഗൂഗ്ലിയും എറിയാന് പോവുന്നതിന് മുന്പ് ബൗളര് ബാറ്റ്സ്മാന് മുന്നറിയിപ്പ് നല്കാറുണ്ട്? പിന്നെ എന്തിനാണ് ബാറ്റ്സ്മാന് മുന്നറിയിപ്പ് നല്കുന്നത്. ക്യാപ്റ്റന് എന്ന നിലയില് ഞാന് അത് ബൗളര്ക്ക് വിടും. അത് ബൗളര് തീരുമാനിക്കേണ്ടതാണ്. എന്റെ ബൗളറെ ഞാന് 100 ശതമാനവും പിന്തുണക്കും, ഗാവസ്കര് പറഞ്ഞു.
ക്രിക്കറ്റില് മാന്യതയുടെ അതിര് വരമ്പുകള് നിര്ണയിക്കുന്നത് ആരാണെന്നും ഗാവസ്കര് ചോദിക്കു. കളി ജയിക്കാന് എന്തും ചെയ്യുന്നവരാണ് ഓസീസ് കളിക്കാര്. അവരും മാന്യതയുടെ അതിര്വരമ്പുകള് ലംഘിക്കുന്നില്ലെന്ന് അവകാശപ്പെടുന്നവരാണ്. മാന്യതയുടെ അതിര്വരമ്പ് എന്നെല്ലാമുള്ള പ്രയോഗങ്ങള് തികച്ചും സാങ്കല്പ്പികമാണെന്നും ഗാവസ്കര് അഭിപ്രായപ്പെട്ടു.
നോണ് സ്ട്രൈക്കര് ബൗളറെ നോക്കിയാണ് ക്രീസില് നിന്ന് പുറത്തേക്ക് ഇറങ്ങേണ്ടത്. അല്ലാതെ ഫിഞ്ച് ചെയ്തത് പോലെ ബാറ്റ്സ്മാനെ നോക്കിയല്ല. ഇവിടെ കാര്യങ്ങള് വ്യക്തമാണ്. നോബോള് നോക്കാന് ഇപ്പോള് തേര്ഡ് അമ്പയറുണ്ട്. അതുപോലെ നോണ്സ്ട്രൈക്കര് ക്രീസ് വിടുന്നുണ്ടോ എന്നും അമ്പയര് നോക്കണം. ക്രീസില് നിന്ന് നേരത്തെ നോണ്സ്ട്രൈക്കര് പുറത്തിറങ്ങുന്നുണ്ട് എങ്കില് ഒരു റണ്സ് പിന്വലിക്കണം, ഗാവസ്കര് പറഞ്ഞു.
വിനു മങ്കാദിങ്ങിന്റെ പേര് ഇതിന് ഉപയോഗിക്കുന്നതിനേയും ഗാവസ്കര് വിമര്ശിച്ചു. നോണ് സ്ട്രൈക്കര്മാര് ഇങ്ങനെ പുറത്താവുന്ന രീതിയെ മഹാനായ ബൗളറുടെ പേരിനൊപ്പം ചേര്ന്ന് വിളിക്കുന്നത് ഒഴിവാക്കണം. അദ്ദേഹത്തിന്റെ പേര് ഉപയോഗിക്കുന്നത് വിനു മങ്കാദിനെ അപമാനിക്കുന്നതിന് തുല്യമാണ്. ഇന്ത്യന് മാധ്യമങ്ങളും ഈ പദം ഉപയോഗിക്കുന്നത് അമ്പരപ്പിക്കുന്നതായി ഗാവസ്കര്.
