ന്യൂഡല്ഹി: കേന്ദ്രസര്ക്കാര് ജീവനക്കാര്ക്ക് ആനുകൂല്യങ്ങള് പ്രഖ്യാപിച്ച് കേന്ദ്ര ധനമന്ത്രാലയം. കോവിഡ് സൃഷ്ടിച്ച സാമ്പത്തിക പ്രതിസന്ധിയില് നിന്ന് സമ്പദ്ഘടനയെ കരകയറ്റുന്നതിനാണ് കേന്ദ്ര നടപടി. വരാനിരിക്കുന്ന ഉത്സവ സീസണില് വിപണിയിലേക്ക് കൂടുതല് പണം വരുന്നതിനാണ് കേന്ദ്രസര്ക്കാര് ജീവനക്കാര്ക്ക് ഉത്സവബത്ത അടക്കമുള്ള ആനൂകൂല്യങ്ങള് നല്കിയത്.
അവധി യാത്രാ ബത്തയും മുന്കൂറായി പലിശരഹിത ഉത്സവബത്തയുമാണ് കേന്ദ്രസര്ക്കാര് അനുവദിച്ചത്. പരിഷ്കരിച്ച അവധി യാത്രാ ബത്ത പ്രകാരം ലീവ് എന്ക്യാഷ്മെന്്റ് തുകയും ടിക്കറ്റ് നിരക്കിന് മൂന്ന് മടങ്ങ് തുകയും ഉല്പ്പന്നങ്ങള് വാങ്ങുന്നതിനായി ചെലവഴിക്കാം. 12 ശതമാനം ജി.എസ്.ടി പരിധിയില് വരുന്ന വാങ്ങാനാണ് അനുവദിക്കുകയെന്ന് കേന്ദ്ര ധനമന്ത്രി നിര്മ്മലാ സീതാരാമന് വാര്ത്താസമ്മേളനത്തില് അറിയിച്ചു.
പലിശരഹിത ഉത്സവബത്തയായി പതിനായിരം രൂപയാണ് മുന്കൂര് നല്കുക. ഒറ്റത്തവണയുള്ള ഈ ആനുകൂല്യം പത്ത് തവണകളായി തിരിച്ചടച്ചാല് മതി. പ്രീപെയ്ഡ് റുപേ കാര്ഡിന്െ്റ രൂപത്തിലാണ് പണം നല്കുക. മാര്ച്ച് 31നകം തുക ചെലവഴിക്കണം. ഇതിനായി 4000 കോടി രൂപയുടെ ചെലവാണ് പ്രതീക്ഷിക്കുന്നതെന്നും ധനമന്ത്രി അറിയിച്ചു. 8000 കോടി രൂപ കൂടി അധികമായി വേണ്ടി വരുമെന്നാണ് പ്രതീക്ഷിക്കുന്നതെന്നും ധനമന്ത്രി കൂട്ടിച്ചേര്ത്തു.
സംസ്ഥാനങ്ങള്ക്ക് വായ്പ നല്കാനും തീരുമാനിച്ചിട്ടുണ്ട്. 50 വര്ഷത്തേക്ക് കേന്ദ്രസര്ക്കാര് 12000 കോടി രൂപ പലിശ രഹിത വായ്പ നല്കും. വിപണിയില് 28000 കോടി രൂപയുടെ പണലഭ്യത ഉറപ്പാക്കുമെന്നും കേന്ദ്രമന്ത്രി പറഞ്ഞു.
