ന്യൂഡല്ഹി: ഹത്രാസിലേക്കുള്ള യാത്രാമദ്ധ്യേ മാധ്യമപ്രവര്ത്തകന് സിദ്ദിഖ് കാപ്പനെ യു.പി പോലീസ് രാജ്യദ്രോഹക്കുറ്റം ചുമത്തി അറസ്റ്റ് ചെയ്തതിനെതിരെ കേരള പത്രപ്രവര്ത്തക യൂണിയന് നല്കിയ ഹര്ജി സുപ്രീം കോടതി നാലാഴ്ചയ്ക്ക് ശേഷം പരിഗണിക്കും. ചീഫ് ജസ്റ്റിസ് എസ്.എ ബോബ്ഡെയുടെ നേതൃത്വത്തിലുള്ള ബെഞ്ചാണ് ഹര്ജിയില് വാദം കേള്ക്കുക.
സിദ്ദിഖ് കാപ്പനെ ഉടന് കോടതിയില് ഹാജരാക്കണമെന്ന് ആവശ്യപ്പെട്ട് ഹേബിയസ് കോര്പ്പസ് ഹര്ജിയാണ് യൂണിയന് നല്കിയത്. എന്നാല് കുടുംബാംഗങ്ങള്ക്ക് മാത്രമേ ഹേബിയസ് കോര്പ്പസ് ഹര്ജി നല്കാനാകൂ എന്ന് കോടതി ചൂണ്ടിക്കാട്ടി. ഇതേതുടര്ന്ന് ഹര്ജി ഭേദഗതി ചെയ്ത് സമര്പ്പിക്കാമെന്ന് യുണിയന് വേണ്ടി ഹാജരായ മുതിര്ന്ന അഭിഭാഷകന് കപില് സിബല് അറിയിക്കുകയായിരുന്നു.
ഹര്ജിയുമായി അലഹാബാദ് ഹൈക്കോടതിയെയാണ് സമീപിക്കേണ്ടതെന്ന് ചീഫ് ജസ്റ്റിസ് ചൂണ്ടിക്കാട്ടി. എന്നാല് കേസില് യു.എ.പി.എ ചുമത്തിയിട്ടുണ്ടെന്നും ഹൈക്കോടതി ഇതിന് ജാമ്യം നല്കില്ലെന്നും കേസ് വര്ഷങ്ങളോളം നീളുമെന്നും കപില് സിബല് കോടതിയെ അറിയിച്ചു.
സിദ്ദിഖ് കാപ്പനെയും മറ്റ് മൂന്ന് പേരെയുമാണ് യു.പി പോലീസ് അറസ്റ്റ് ചെയ്തത്. ഇവര് നാല് പേരും പോപ്പുലര് ഫ്രണ്ട് പ്രവര്ത്തകരാണെന്ന് ആരോപിച്ചാണ് യു.പി പോലീസ് ഇവരെ അറസ്റ്റ് ചെയ്തത്.
