അഭിമുഖത്തിലെ തന്റെ ആ പരാമര്ശം പാര്വതി ഉള്പ്പെടെ പലരും തെറ്റിദ്ധരിച്ചിരിക്കുകയാണെന്നും താന് ആരെയും അധിക്ഷേപിച്ചിട്ടില്ലെന്നും ഇടവേള ബാബു. താരസംഘടനയായ 'അമ്മ'യില് നിന്ന് നടി പാര്വതി തിരുവോത്ത് രാജിവച്ചതിനു പിന്നാലെയാണ് ഇടവേള ബാബുവിന്റെ ഈ വിശദീകരണം.
അമ്മ നിര്മിക്കുന്ന ട്വിന്റിട്വിന്റി മോഡല് സിനിമയില് ഭാവനയുണ്ടാമുമോ എന്ന ചോദ്യത്തിന് നല്കിയ ഉത്തരമാണ് വിവാദമായത്. 'മരിച്ച് പോയവരെ തിരിച്ച് കൊണ്ടുവരാനാകില്ലെന്നും അതുപോലെ രാജി വച്ചവരും സിനിമയില് ഉണ്ടാകില്ലെന്നു'മായിരുന്നു ഇടവേളബാബു നല്കിയ മറുപടി
ഇടവേള ബാബുവിന്റെ പ്രസ്താവനയ്ക്ക് പിന്നാലെയുള്ള പാര്വതിയുടെ രാജി പ്രഖ്യാപിച്ചുകൊണ്ടുള്ള പാര്വതിയുടെ കുറിപ്പ്:
''2018 ല് എന്റെ സുഹൃത്തുക്കള് A.M.M.A-യില് നിന്ന് പിരിഞ്ഞു പോയപ്പോള് ഞാന് സംഘടനയില് തന്നെ തുടര്ന്നത് തകര്ന്നുകൊണ്ടിരിക്കുന്ന സിസ്റ്റത്തിനകത്തു നിന്ന് കൊണ്ട് അതിനെ നവീകരിക്കാന് കുറച്ചു പേരെങ്കിലും വേണം എന്നു തോന്നിയതു കൊണ്ടാണ്. പക്ഷെ A.M.M.A ജനറല്സെക്രട്ടറി ഇടവേള ബാബുവിന്റെ അഭിമുഖം കണ്ടതിനു ശേഷം, സംഘടനയില് എന്തെങ്കിലും ഒരു മാറ്റം ഉണ്ടാകും എന്ന പ്രതീക്ഷ ഞാന് ഉപേക്ഷിക്കുന്നു.
ഈ സംഘടന തഴഞ്ഞ ഒരു വനിത അംഗത്തെ മരിച്ചുപോയ ഒരാളുമായി താരതമ്യപ്പെടുത്തികൊണ്ടു അയാള് പറഞ്ഞ വെറുപ്പുളവാക്കുന്നതും ലജ്ജാവഹവുമായ വാക്കുകള് ഒരിക്കലും തിരുത്താനാവില്ല. ആലങ്കാരികമായി പറഞ്ഞതല്ലേ എന്ന് Mr ബാബു കരുതുന്നുണ്ടാവും. പക്ഷെ അത് കാണിക്കുന്നത് അയാളുടെ അറപ്പുളവാക്കുന്ന മനോഭാവത്തെയാണ്. അയാളോട് പുച്ഛം മാത്രമാണ് ഉള്ളത്. മാധ്യമങ്ങള് ഈ പരാമര്ശം ചര്ച്ച ചെയ്തു തുടങ്ങുന്ന നിമിഷം മുതല് അയാളെ അനുകൂലിച്ച് മറ്റു പല സംഘടനാ അംഗങ്ങളും വരും. കാരണം സ്ത്രീകളുമായി ബന്ധപ്പെട്ട ഏതൊരു പ്രശ്നവും നിങ്ങള് കൈകാര്യം ചെയ്ത അതേ മോശമായ രീതിയിലാണ് ഇതും സംഭവിക്കുക എന്ന് എനിക്ക് ഉറപ്പുണ്ട്.
ഞാന് A.M.M.A യില് നിന്നും രാജി വയ്ക്കുന്നു. അതോടൊപ്പം ഇടവേള ബാബു രാജി വെയ്ക്കണം എന്ന് ഞാന് ശക്തമായി ആവശ്യപെടുന്നു. മനസ്സാക്ഷിയുള്ള എത്ര അംഗങ്ങള് ഈ ആവശ്യം ഉന്നയിച്ച് മുന്നോട്ട് വരും എന്ന് ആകാംക്ഷയോടെ ഞാന് നോക്കി കാണുന്നു.
