ന്യൂഡല്ഹി: 500 ന്റെയും 100 ന്റെയും നോട്ടുകള് വഴിയിലിട്ട് വഴിയാത്രക്കാര് അതെടുക്കുന്നതിനിടയില് അവരുടെ ബാഗ് മോഷ്ടിച്ചു കൊണ്ടു പോകുകയും ചെയ്തിരുന്ന മോഷ്ടാക്കളെ യാത്രക്കാരന് ഓടിച്ചിട്ടു പിടിച്ച് പോലീസിന് കൈമാറി. വടക്കന് ഡല്ഹിയിലായിരുന്നു പണമെറിഞ്ഞു പണം ഉണ്ടാക്കുന്ന കള്ളന്മാര് കുടുങ്ങിയത്. വഴിയാത്രക്കാരന്റെ ബാഗുമായി ഓടിയ മോഷ്ടാക്കളെ യാത്രക്കാരന് ഓടിച്ചിട്ടു പിടിച്ച് ബാഗ് പിടിച്ചുവാങ്ങി.
തിങ്കളാഴ്ച വൈകുന്നേരം 57 വയസ്സുള്ള പദം പ്രകാശ് ഗൗതമിന്റെ അരികിലാണ് മോഷ്ടാക്കളുടെ അടവ് പൊളിഞ്ഞത്. ഹര്ഷ് വിഹാറിലെ വീട്ടില് നിന്നും കമലാ മാര്ക്കറ്റിലേക്ക് ഗൗതം ബൈക്കില് വരുമ്പോള് ഗീതാകോളനി ഫ്ളൈ ഓവറില് 500 ന്റെ നോട്ട് വഴിയില് കിടക്കുന്നത് കണ്ടു. വാഹനം നിര്ത്തി പണം എടുത്ത് ബാഗിലേക്ക് ഇടുകയും മോട്ടോര് ബൈക്ക് തൊട്ടടുത്ത വന്ന് നില്ക്കുകയും ബാഗ് തട്ടിപ്പറിക്കുകയും ചെയ്തു. ഗൗതമിന്റെ ബാഗില് ഈ സമയത്ത് 1500 രൂപ ഉണ്ടായിരുന്നു. വിടാന് കൂട്ടാക്കാതിരുന്ന ഗൗതം പിന്നാലെ പോകുകയും പിടിച്ചുപറിക്കാരില് നിന്നും ബാഗ് തിരിച്ചുപിടിക്കുകയും ചെയ്തു.
പോലീസിനെ വിളിക്കുകയും അവരെ പിടിച്ചുവെച്ച് ഒടുവില് കൈമാറുകയും ചെയ്തു. നിസാമുദ്ദീന്, അലി എന്നിവരാണ് പോലീസിന്റെ പിടിയിലായത്. ഈ വിദ്യ ഉപയോഗിച്ച് ഇരുവരും അനേകരുടെ പണം തട്ടിയെടുത്തിട്ടുണ്ടെന്ന് പോലീസ് പറഞ്ഞു. പലരും പ്രതികരിക്കാനോ ഇവരെ പിന്തുടരാനോ റിസ്ക്ക് എടുക്കാനോ തുനിഞ്ഞിരുന്നില്ല. തട്ടിയെടുത്തിരുന്ന പണം തന്നെയാണ് ഇവര് പരിപാടിക്കായി ഉപയോഗിച്ചിരുന്നതും.
