പെണ്കുട്ടികളുടെ വിവാഹ പ്രായം ഉയര്ത്തുന്നത് സംബന്ധിച്ച് വലയി ചര്ച്ചകളാണ് നടക്കുന്നത്. സോഷ്യല് മീഡിയകളിലും ചര്ച്ചകള് നടക്കുന്നുണ്ട്. കഴിഞ്ഞ ദിവസം ഡോ. നെല്സണ് ജോസഫും തന്റെ അഭിപ്രായം ഫേസ്ബുക്ക് കുറിപ്പിലൂടെ അറിയിച്ചിരുന്നു. ഇതിന് ചില ആങ്ങളമാര് കുറിച്ച കമന്റുകള്ക്ക് ഇപ്പോള് അദ്ദേഹം തന്നെ മറുപടി പറഞ്ഞിരിക്കുകയാണ്.
നെല്സണ് ജോസഫിന്റെ മറുപടി കുറിപ്പ്;
ഓങ്ങളമാരുടെ ചോദ്യങ്ങളും അവയ്ക്കുള്ള മറുപടികളും ??
ഓങ്ങളയെന്താന്നാരിക്കും...ഓണ്ലൈന് ആങ്ങള ലോപിച്ചതാണ്..
പെണ്കുട്ടികളുടെ വിവാഹപ്രായത്തെക്കുറിച്ച് എഴുതിയ കുറിപ്പില് ചില നിഷ്കളങ്കമായ ചോദ്യങ്ങളും പരിഭവങ്ങളും കാണുകയുണ്ടായി.
അവയില് തിരഞ്ഞെടുത്ത ' കുത്തുകള്ക്കുള്ള ' മറുപടികള് ചുരുക്കിയെഴുതുന്നതാണ്.
ഫസ്റ്റ് ക്വസ്റ്റ്യന് ഒരു തേങ്ങ....ദതല്ല, തേങ്ങലാണ്.
രാജ്യത്തിന്റെ ഭരണകര്ത്താക്കളെ തിരഞ്ഞെടുക്കാന് പതിനെട്ട് വയസ് മതി. പക്ഷേ സ്വന്തം ഭര്ത്താവിനെ തിരഞ്ഞെടുക്കാന് പതിനെട്ട് വയസ് പോരാ എന്ന്...
എന്തോ? എങ്ങനേ?
സ്വയം തിരഞ്ഞെടുക്കാന്...അല്ലിയോ? ഈ പറയുന്ന പെണ്കുട്ടികളില് ഏതെങ്കിലുമൊരാള് സ്വയം ഭര്ത്താവിനെ തിരഞ്ഞെടുത്ത് നോക്കട്ടെ..
' പ്ഫാ.....ഒരുമ്പെട്ടോളേ...കുടുമ്പത്തിന്റെ മാനം കളയാനായിട്ട് ഓരോന്ന് കുരുത്തോളും...മതി നിന്റെ പഠിത്തോം കോപ്പും എല്ലാം...ഇനി ഈ പെരയ്ക്ക് വെളീലെറങ്ങിയാല് മുട്ടുകാല് രണ്ടും...'
അല്ലേ?
നമ്മുടെ ഭാവനയിലെ സ്വയം തിരഞ്ഞെടുപ്പ് ഏതാണ്ട് ഇങ്ങനെയാണ്...
' നിന്നെ കാണാന് ഒരു കൂട്ടര് വരുന്നുണ്ട്...അവരങ്ങ് വന്നേച്ച് പോവട്ടെ ' ....ഭും....ഒരു ബോംബ്..ചോദ്യമില്ല, പറച്ചിലില്ല, സമ്മതം വാങ്ങലില്ല...മുന് കൂട്ടി പറയുന്നുപോലുമുണ്ടാവില്ല..
നെക്സ് ഡേ
' നല്ല കൂട്ടരാടീ.... ഇനി ഇതുപോലെ ഒരെണ്ണം വന്നോളണമെന്നില്ല.. നമുക്കിതങ്ങ് ഉറപ്പിക്കാം അല്ലേ? '
ഒ.കെ.... ബൈ...
അടുത്ത സംശയം സ്വയം തിരഞ്ഞെടുക്കാനുള്ള അവകാശം ഇന്ത്യന് പൗരനില്ലേ എന്നതാണ്. ഇപ്പോള് പഠിക്കേണ്ട, വിവാഹം മതിയെന്ന് പറയാനും വിവാഹം കഴിഞ്ഞായാലും പഠിച്ചാല് മതിയെന്ന് പറയാനും ഒക്കെയുള്ള...സ്വാതന്ത്ര്യം.
വളരെ മികച്ച ഒരു ചോദ്യമാണ്. തീര്ച്ചയായും സ്വാതന്ത്ര്യം വേണം. ഒരൊറ്റക്കുഴപ്പമേയുള്ളു. എത്ര പെണ്ണുങ്ങള്ക്ക് ഈ സ്വാതന്ത്യ്രം അനുഭവിക്കാന് കഴിഞ്ഞിട്ടുണ്ടാവും?
' അമ്മേ...എനിക്കിപ്പം കല്യാണമൊന്നും വേണ്ട...പഠിച്ചാ മതി...'
ഉത്തരങ്ങള്...
' ഓ...അതിപ്പൊ കല്യാണം കഴിഞ്ഞായാലും പഠിക്കാന്നേ....'
' പ്രായം മുന്നോട്ടാ....ഓര്മ വേണം...'
' നിനക്ക് താഴെയൊള്ളതുങ്ങളെക്കൂടി ഓര്ക്കണ്ടേ? '
' ഞങ്ങടെ കണ്ണടയുന്നേന് മുമ്പ്....'
ഒറ്റ വാക്കില് ഇമോഷണല് ബ്ലാക് മെയിലിങ്ങ്....സ്വാതന്ത്ര്യമാണേയ്..
ക്ലാസിക് ചോദ്യമുണ്ട്...' പൗരന്മാരുടെ പ്രായപൂര്ത്തി അംഗീകരിച്ചു അവര്ക്ക് വോട്ടവകാശം നല്കുന്ന സര്ക്കാര് ശേഷം അവരുടെ വിവാഹ കാര്യത്തില് ഇടപെടുന്നത് എന്തിനാണ് '
ഹോ...ഉത്തരം മുട്ടിപ്പോയി....
ഡോ..ഡോ...രാജ്യം ഭരിക്കേണ്ടത് ആരാന്ന് തീരുമാനിക്കാന് കെല്പുള്ള (അല്ല, അങ്ങനാല്ലോ മുമ്പ് പറഞ്ഞത്) ആളുകളുടെ വിവാഹക്കാര്യത്തില് നിങ്ങള് ഇടപെടാറില്ലേ?
എത്ര പെണ്കുട്ടികള് പൂര്ണമായും വിവാഹത്തില് അവരുടെ ഇഷ്ടവും തീരുമാനവും എടുത്തിട്ടുണ്ടാവും? ഉത്തരമൊന്നും പറയേണ്ട...ചുമ്മാ ആലോചിച്ചാല് മതി...വിവാഹപ്രായം കുറയ്ക്കണമെന്ന് പറയാനാണെങ്കിലും പെണ്ണിനെ ഒരു വ്യക്തിയായി കണ്ടല്ലോ....
സന്തോഷമായി...
വലിയ മാളികകളില് താമസിക്കുന്നവര്ക്ക് പാവപ്പെട്ടവന്റെ ആധി അറിയില്ല. അങ്ങനെയുള്ള പാവപ്പെട്ടവര് പെണ്കുട്ടിയെ ഒരാളെ ഏല്പ്പിച്ചു സമാധാനത്തോടെ ഉറങ്ങാന് കാത്തിരിക്കുകയാണെന്ന് മറ്റൊരാള്.
പെണ്ണ് ഒരു ബാദ്ധ്യതയാണെന്നും നഷ്ടം മാത്രമുണ്ടാക്കുന്ന ഒരു കമ്മോഡിറ്റിയാണെന്നും ഇതിലും നൈസായിട്ട് എങ്ങനെ പറഞ്ഞ് വയ്ക്കാനാണ്. ഇജ്ജാതി ഡയലോഗൊക്കെ അടിക്കുന്നത് എന്ത് തേങ്ങ അറിഞ്ഞിട്ടാണോ ആവോ?
രാജകുമാരനും രാജകുമാരിയും സുഖമായി കഴിഞ്ഞെന്ന് അവസാന വാചകം പറഞ്ഞ് പുസ്തകം അടയ്ക്കാന് ഇത് മുത്തശ്ശിക്കഥയല്ല അനിയാ....
ഒരു ഒറ്റമുറി വീട്ടിലാണ് പതിനഞ്ച് വയസ് കഴിയുന്നത് വരെ ഞാന് താമസിച്ചത്. മാളികയൊക്കെ കണ്ടിട്ടുണ്ട്. അകത്തു കിടന്ന് ഉറങ്ങിയിട്ടില്ല.
അന്ന് പ്ലസ് ടു കഴിഞ്ഞ് ഏതെങ്കിലുമൊരുത്തിയുടെ കയ്യില് പിടിച്ചേല്പിക്കണം എന്നോ മറ്റോ അപ്പനും അമ്മയും ആലോചിച്ചിരുന്നെങ്കിലോ?....പെണ്കുട്ടികളെ കെട്ടിച്ച് ഭാരമൊഴിവാക്കണം എന്നല്ലാതെ പഠിച്ച് ജോലി നേടണം എന്ന് തലയില് തെളിയില്ല അല്ലിയോ?
മറ്റിടങ്ങളിലെ സ്ത്രീകള് നേട്ടങ്ങള് കൊയ്യുമ്പൊ ഇവിടുള്ളോരെന്താ ഒന്നും ഉണ്ടാക്കാത്തത് എന്ന് ആലോചിച്ചിട്ടുണ്ടോ? പതിനെട്ട് വയസില് കുടുംബഭാരമെടുത്ത് തലയില് വച്ചുകൊടുത്താല് മതി...നേട്ടം താനേ വരും...
' ജോലി ഇല്ലാതെയും മക്കളെ നോക്കിയും അതില് നിന്നുള്ള സന്തോഷം അനുഭവിക്കുന്ന എത്രയോ സ്ത്രീകള്.'....സ്റ്റേറ്റ്മെന്റാണ്...കിളിയെ പിടിച്ച് കൂട്ടിലിട്ടിട്ട് എന്ത് ഭംഗിയുള്ള പാട്ട് എന്ന് പുകഴ്ത്തുന്നപോലുണ്ട്.
തെരഞ്ഞെടുക്കാനുള്ള അവകാശത്തെക്കുറിച്ച് ഒരുപാട് പേര് പറഞ്ഞ് വാദിക്കുന്നത് കണ്ടു.
സ്വന്തം ഇഷ്ടത്തിനു പഠിക്കാന് അനുവാദമില്ല.
ഇഷ്ടമുള്ള ജോലി ചെയ്യാന് അനുവാദമില്ല.
ശമ്പളം സ്വന്തം ഇഷ്ടത്തിനു ചിലവാക്കാന് അനുവാദമില്ല.
ഇഷ്ടമുള്ള വസ്ത്രം ധരിക്കാന് അനുവാദമില്ല.
ഇഷ്ടമുള്ളയാളെ വിവാഹം കഴിക്കാന് അനുവാദമില്ല.
സമയം ഇഷ്ടമുള്ളവരോടൊപ്പം ചിലവഴിക്കാന് അനുവാദമില്ല.
പുറത്ത് ഇറങ്ങാന് വിലക്ക്..
ആണ് കൂട്ടുകാര്ക്ക് വിലക്ക്..
പ്രൊഫൈല് പിക്ചറിടാന് വരെ വിലക്കുള്ളിടങ്ങളുണ്ട്..
അവസാനം എല്ലാറ്റിനും ഒരു ന്യായീകരണവും...നിന്റെ നന്മയ്ക്ക് വേണ്ടിയാണ് എന്ന്...
എന്തോന്ന് നന്മ?
എന്തോന്ന് സ്വാതന്ത്ര്യം?
എന്തോന്ന് തിരഞ്ഞെടുക്കാനുള്ള അവകാശം?
നിങ്ങളാണ് തിരഞ്ഞെടുക്കുന്നതും നിയന്ത്രിക്കുന്നതും വേലികെട്ടുന്നതുമൊക്കെ..ഇപ്പൊ തിരഞ്ഞെടുക്കാനുള്ള അവകാശം പ്രസംഗിക്കുന്നത് കാണുമ്പൊ ചിരി വരുന്നു..
ഏറ്റവും ദുരന്തം ഏറ്റവും അവസാനത്തേക് വച്ചതാണ്.
' പതിനാറാം വയസ്സില് തന്തയില്ലാത്ത കുട്ടിയുടെ അമ്മ എന്ന് പാശ്ചാത്യ നാടുകളില് കേള്ക്കുന്നത് ഇരുപതാം വയസ്സ് വരെ നമ്മുടെ നാട്ടില് ഉണ്ടായിക്കൊണ്ടിരിക്കും. '
എന്തോന്ന് പറയാന് !!!
