ജൂണ് 9 നായിരുന്നു ആസ്സാമിലെ ബാഗ്ജാന് പ്രദേശത്തെ തീനാളം വിഴുങ്ങാന് തുടങ്ങിയത്. ഇപ്പോള് 150 ദിവസമായിട്ടും പ്രദേശത്തെ അഗ്നിബാധയില് നിന്നും രക്ഷിക്കാന് കഴിഞ്ഞിട്ടില്ല. ഇതുവരെ ഇന്ത്യയില് ഉണ്ടായിട്ടുളള ഏറ്റവും വലിയ തീപ്പിടുത്തത്തില് ഇതുവരെ മൂന്ന് പേര് വെന്തു മരിക്കുകയും ഇതിന് പുറമേ ചൂടും പുകയും സൃഷ്ടിച്ച അസ്വസ്ഥകളെ തുടര്ന്ന് 3,000 ഗ്രാമീണര് വീടും കൂടും ഉപേക്ഷിച്ച് അടുത്ത ഗ്രാമത്തിലേക്ക് അഭയം തേടിയെങ്കിലും പലരും മടങ്ങി വന്ന് സ്വന്തം സ്ഥലത്ത് താല്ക്കാലിക വീടുകള് തയ്യാറാക്കി തുടങ്ങിയിട്ടുണ്ട്.
ആസ്സാം സര്ക്കാരിന് കീഴിലെ ഓയില് ഇന്ത്യാ ലിമിറ്റഡിന്റെ എണ്ണക്കിണര് കത്താന് തുടങ്ങിയത് ജൂണ് മുതലായിരുന്നു. ചൂടും പുകയും പൊട്ടിത്തെറി ശബ്ദങ്ങളും പതിവായതോടെ ആരോഗ്യ പ്രശ്നങ്ങളും ഇവിടെ ശക്തമായി. ഉത്ക്കണ്ഠ, മൈഗ്രേന്, വിശപ്പില്ലായ്മ, കണ്ണു നീറ്റല് തുടങ്ങിയവയെല്ലാം നാട്ടുകാര് പറയുന്നു. ഇതുവരെ 2.5 ദശലക്ഷം രൂപ അടിയന്തിര നഷ്പരിഹാരമായി എല്ലാം നഷ്ടപ്പെട്ട 12 കുടുംബങ്ങള്ക്ക് നല്കിയതായി കമ്പനി പറയുന്നു. പ്രദേശത്ത് നിന്നും മാറിത്താമസിക്കാന് നിര്ബ്ബന്ധിതമായിരിക്കുന്ന കുടുംബങ്ങള്ക്ക് മാസംമതാറും 50,000 രൂപ വീതവും നല്കുന്നുണ്ട്. പ്രശ്നത്തിന് പരിഹാരം കാണണമെന്നും നഷ്ടപരിഹാരം നല്കുന്നത് കാലതാമസം വരുത്താതെ വേണമെന്നും ആവശ്യപ്പെട്ട് പ്രക്ഷോഭങ്ങള് ആരംഭിച്ചിട്ടുണ്ട്.
തീപ്പിടുത്തം തുടങ്ങിയതോടെ വീട് പൂര്ണ്ണമായും നഷ്ടമായ ലബന്യാ സൈകിയയ്ക്ക് വീടു മാത്രമല്ല അതിനുള്ളില് ഉണ്ടായിരുന്ന വിലപ്പെട്ട വസ്തുക്കള് പോലും നഷ്ടമായി. വീടും വീടിനടുത്ത് ഉപജീവന മാര്ഗ്ഗമായി ഉണ്ടായിരുന്ന കടയും തീ വിഴുങ്ങിയതോടെ ഇവരും പാലായനം ചെയ്യാന് നിര്ബ്ബന്ധിതമായി. എല്ലാം നഷ്ടപ്പെട്ടാലും മരണപ്പെട്ടുപോയ ഭര്ത്താവിന്റെ ഫോട്ടോഗ്രാഫ് നഷ്ടപ്പെട്ടതിലാണ് ഇവര്ക്ക് വിഷമം.
അച്ഛന്റെ ചിത്രം പോലും കാണാതെ കുഞ്ഞുങ്ങള് വളരുന്നത് അവര്ക്ക് ഏറെ വിഷമമുള്ള കാര്യമാണെന്ന് ഇവര് പറയുന്നു. തങ്ങള്ക്ക് ഇപ്പോള് കിട്ടിയിട്ടുള്ള നഷ്ടപരിഹാരം ദൈനംദിന ചെലവിനുള്ളത് മാത്രമാണെന്നും വീടും കൃഷിയും നഷ്ടമായതിന് നഷ്ടപരിഹാരം കിട്ടിയിട്ടില്ലെന്നും നാട്ടുകാര് പറയുന്നു. പലരും ഇപ്പോള് തീപ്പിടുത്തം നടക്കുന്ന സ്ഥലത്ത് നിന്നും 1.5 കിലോമീറ്റര് അകലത്തിലും മറ്റുമാണ് താമസിക്കുന്നത്.
1967 ല് ആസ്സാമിലെ ശിവസാഗര് ജില്ലയില് എണ്ണക്കിണറിലെ തീപ്പിടുത്തത്തിന് ശേഷം ഉണ്ടാകുന്ന ഏറ്റവും വലിയ തീപ്പിടുത്തമാണ് ഇത്. അന്ന് 90 ദിവസമാണ് തീ നീണ്ടു നിന്നത്. പിന്നീട് ആന്ധ്രാപ്രദേശിലെ പാസര്ലാപുഡിയില് ഉണ്ടായ തീപിടുത്തം നിയന്ത്രിക്കാന് 65 ദിവസമെടുത്തു. 2005 ല് ആസ്സാമിലെ തന്നെ ഡികോം ഏരിയയിലെ എണ്ണക്കിണറിലെ തീപ്പിടുത്തം നിയന്ത്രിക്കാന് വേണ്ടി വന്നത് 20 ദിവസമായിരുന്നു.
