കോട്ടയം : കോട്ടയം ജില്ലാ പഞ്ചായത്തിലേക്കുള്ള യു.ഡി.എഫ്. സീറ്റ് വിഭജനത്തില് ധാരണയായപ്പോള് കേരള കോണ്ഗ്രസ് ജോസഫ് വിഭാഗത്തിനു നേട്ടം. കേരളാ കോണ്ഗ്രസ് ജോസ് വിഭാഗത്തിന്റെ മുന്നണി മാറ്റത്തിനു ശേഷം നടക്കുന്ന തദ്ദേശ തെരഞ്ഞെടുപ്പില് ശ്രദ്ധാകേന്ദ്രമായി മാറിയിരിക്കുകയാണ് കോട്ടയം ജില്ലാ പഞ്ചായത്ത്.
മുന് തെരഞ്ഞെടുപ്പുകളില് എല്.ഡി.എഫും ബി.ജെ.പിയും പ്രചരണം ആരംഭിച്ചശേഷമാണു യു.ഡി.എഫിലെ സീറ്റ് തര്ക്കം പരിഹരിക്കുക. ഇത്തവണ മുതിര്ന്ന നേതാക്കള് ഇടപെട്ടതോടെ യു.ഡി.എഫിലെ സീറ്റ് ധാരണ വേഗത്തിലാകുകയായിരുന്നു.
കഴിഞ്ഞ തവണത്തെ ജനപ്രതിനിധികളില് ബഹുഭൂരിപക്ഷവും ജോസ് വിഭാഗത്തില്നിന്നായിരുന്നു. എന്നിട്ടും ഇരുപത്തിരണ്ടംഗ ജില്ലാ പഞ്ചായത്തില് ഇക്കുറി ഒമ്പതു സീറ്റ് ജോസഫ് വിഭാഗത്തിനു നല്കാനാണ് യു.ഡി.എഫ്. തീരുമാനം. ഇതു വലിയ നേട്ടമായാണു ജോസഫ് വിഭാഗം വിലയിരുത്തുന്നത്. ഇത്രയും സീറ്റ് നല്കുന്നതില് കോണ്ഗ്രസിലെ ഒരു വിഭാഗത്തിന് നീരസമുണ്ടെങ്കിലും മുതിര്ന്ന നേതാക്കള് എടുത്ത തീരുമാനമായതിനാല് അംഗീകരിക്കുകയായിരുന്നു.
എന്നാല് ഇടതുമുന്നണിക്കൊപ്പമുള്ള ജോസ് വിഭാഗത്തെ ലക്ഷ്യമാക്കിയാണ് ജോസഫ് വിഭാഗത്തിന് 9 സീറ്റ് നല്കിയതെന്നാണ് രാഷ്ട്രീയ നിരീക്ഷകരുടെ വിലയിരുത്തല്. ജനപ്രതിനിധികളുടെ എണ്ണം കുറവായിട്ടും ജോസഫ് വിഭാഗത്തിന് യു.ഡി.എഫില് ലഭിച്ച പ്രാതിനിധ്യം ജോസ് വിഭാഗത്തിന് ഇടതുമുന്നണിയില്നിന്നും ലഭിച്ചില്ലെങ്കില് അത് ജോസ് വിഭാഗത്തിനുളളില് അതൃപ്തിക്കു കാരണമാകും. ഇതുകൂടി ലക്ഷ്യമിട്ടാണ് യു.ഡി.എഫ്. ജോസഫ് വിഭാഗത്തിനു കൂടുതല് സീറ്റുകള് നല്കിയത്.
ഒരിക്കലും കിട്ടാനിടയില്ലാത്ത കോട്ടയം ജില്ലാ പഞ്ചായത്ത് ഭരണം, ജോസ് കെ. മാണിയെ ഒപ്പം നിര്ത്തി പിടിച്ചെടുക്കാനുളള ശ്രമത്തിലാണ് ഇടതുമുന്നണി. ജില്ലാ പഞ്ചായത്തില് ആധിപത്യം നേടാന് കഴിഞ്ഞാല് നിയമസഭാ തെരഞ്ഞെടുപ്പില് പ്രതിഫലിക്കുമെന്നാണ് നേതൃത്വത്തിന്റെ വിലയിരുത്തല്.
ഈ ലക്ഷ്യത്തോടെയാണു യു.ഡി.എഫുമായി തെറ്റിപ്പിരിഞ്ഞ ജോസ് വിഭാഗത്തെ ഇരുകൈയും നീട്ടി ഇടതുമുന്നണി സ്വീകരിച്ചത്. തുടക്കത്തില് സി.പി.ഐ. ഉയര്ത്തിയ എതിര്പ്പുകള്പോലും വകവെയ്ക്കാതെയാണ് സി.പി.എം., ജോസ് വിഭാഗത്തെ മുന്നണിയിലെടുക്കുന്നതിന് മുന്കൈയെടുത്തത്.
കഴിഞ്ഞ തവണ യു.ഡി.എഫിനൊപ്പം നിന്നപ്പോള് കോട്ടയം ജില്ലാ പഞ്ചായത്തില് ലഭിച്ച അത്രയും സീറ്റുകള് തന്നെ ഇടുതുമുന്നണിയും നല്കണമെന്നായിരുന്നു ജോസ് വിഭാഗത്തിന്റെ ആവശ്യം. ഇതിന് സി.പി.എം. നേരത്തെ സമ്മതം അറിയിച്ചിരുന്നെന്നു ജോസ് വിഭാഗം നേതാക്കള് ചൂണ്ടിക്കാട്ടുന്നു. ഇതനസുരിച്ച് 11 സീറ്റുകള് ജോസ് വിഭാഗത്തിന് നല്കണം.
ഇത്രയും സീറ്റുകള് ജോസ് വിഭാഗത്തിനു നല്കിയാല് സി.പി.ഐ. അടക്കമുള്ള മറ്റു ഘടകകക്ഷികള് എതിര്പ്പുയര്ത്തുമെന്നതാണു സി.പി.എമ്മിനെ കുഴക്കുന്നത്.
ഷാലു മാത്യു
