ജയ് സാല്മേര്: രാജ്യസുരക്ഷ തന്നെയാണ് പ്രധാന കാര്യമെന്നും അതിന് വെല്ലുവിളി ഉയര്ത്തുന്നവര്ക്ക് തക്ക മറുപടി നല്കുമെന്നും പ്രധാനമന്ത്രി നരേന്ദ്രമോഡി. സൈന്യം തന്റെ കുടുംബമാണെന്നും അതുകൊണ്ടാണ് ദീപാവലി എല്ലാത്തവണയും സൈനികര്ക്കൊപ്പം ചെലവഴിക്കുന്നതെന്നും പറഞ്ഞു. രാജസ്ഥാനിലെ ലോംഗേവാലയിലെ ജെയ് സാല്മേറില് സൈനികര്ക്കൊപ്പം ദീപാവലി ആഘോഷത്തിനെത്തിയ മോഡി ദീപാവലി സന്ദേശത്തിലാണ് ഇക്കാര്യം വ്യക്തമാക്കിയത്.
പാകിസ്താന്റെ വെടിനിര്ത്തല് ലംഘനവും ഇന്ത്യ നല്കിയ തിരിച്ചടിയും അഞ്ചു സൈനികര് ഉള്പ്പെടെ 11 പേരുജെ ജീവന് നഷ്ടമായ സംഭവത്തിന്റെ പിറ്റേന്നാണ് പ്രധാനമന്ത്രിയുടെ സൈനിക ക്യാമ്പ് സന്ദര്ശനം. ഇന്ത്യ വിവിധ രാജ്യങ്ങളുമായി നീണ്ട അതിര്ത്തികള് പങ്കിടുന്ന രാജ്യമാണ്. എന്നാല് എല്ലാ ഇന്ത്യാക്കാരുടെയും മനസ്സില് നില്ക്കുന്ന ഒരു അതിര്ത്തി പോസ്റ്റ് ഉണ്ട് അത് ലോംഗേവാലയാണ്. ലോംഗേവാലയിലെ പോരാട്ടം എല്ലാ ഇന്ത്യാക്കാരന്റെയും മനസ്സിലേക്ക് എപ്പോഴും ഓടിയെത്താറുണ്ട്. 1971 ല് നടന്ന ലോംഗേവാല യുദ്ധത്തിന് അടുത്ത വര്ഷം അമ്പതാണ്ട് തികയുന്ന സാഹചര്യത്തിലാണ് പ്രധാനമന്ത്രി ലോംഗേവാലയെ ഓര്മ്മിച്ചത്.
പാകിസ്താന് ഇന്ത്യന് സൈന്യം തക്ക മറുപടി നല്കിയെന്നും സന്ദേശത്തില് അദ്ദേഹം പറഞ്ഞു. കഴിഞ്ഞ തവണ സിയാച്ചിനില് ദീപാവലി ആഘോഷിക്കാന് എടുത്ത തീരുമാനത്തെ പലരും വിമര്ശിച്ചിരുന്നു എന്നാല് സൈനികരാണ് രാജ്യത്തിന്റെ ഏറ്റവും വലിയ സമ്പത്തെന്ന് താന് കരുതുന്നതായും സൈനികരുടേത് സമാനതകളില്ലാത്ത ധൈര്യമാണെന്നും മോഡി പറഞ്ഞു. താന് എല്ലാവര്ക്കും മധുരം കൊണ്ടുവന്നിട്ടുണ്ട്. പക്ഷേ അത് ഞാന് കൊണ്ടുവന്നതല്ല 130 കോടി ഇന്ത്യാക്കാര് നല്കുന്നതാണെന്നും മോഡി പറഞ്ഞു. സൈനികരുടെ സന്തോഷം കാണുമ്പോള് തന്റേയും സന്തോഷം ഇരട്ടിക്കുന്നു. എല്ലാ ഇന്ത്യാക്കാരുടേയും ദീപാവലി ആശംസകള് സൈനികര്ക്ക് നല്കുന്നു.
സൈനികരുെട കുടുംബാംഗങ്ങള്ക്കും ആശംസ നേരുന്നു. മധുരത്തിനൊപ്പം രാജ്യത്തിന്റെ സ്നേഹവും സൈനികര്ക്ക് നല്കുന്നതായും പറഞ്ഞു. 2014 ല് അധികാരത്തില് എത്തിയ ശേഷം എല്ലാത്തവണയും നരേന്ദ്രമോഡി ദീപാവലി ആഘോഷം നടത്തിയിരുന്നത് സൈനികര്ക്കൊപ്പമാണ്. പ്രതിരോധ വിഭാഗത്തിലെ ബിപിന് റാവത്ത്, കരസേനാ മേധാവി എംഎം നരവനേ, ബിഎസ്എഫ് ഡയറക്ടര് ജനറല് രാകേഷ് അസ്താന എന്നിവരും പ്രധാനമന്ത്രിയെ അനുഗമിച്ചു.
