ന്യൂഡല്ഹി: മുംബൈ ബാന്ദ്രയിലെ 'കറാച്ചി ബേക്കറി' വിഷയത്തില് ബിജെപി ഏറ്റുപിടിക്കുന്നു. ഒരിക്കല് അഖണ്ഡ ഭാരത്തിന്റെ ഭാഗമാകേണ്ട ഇടമാണ് കറാച്ചി എന്ന് മഹാരാഷ്ട്ര മുന് മുഖ്യമന്ത്രി ദേവേന്ദ്ര ഫഡ്നാവീസ് പറഞ്ഞു. പാകിസ്താന് നഗരമായതിനാല് മൂംബൈയിലെ പലഹാരക്കടയുടെ പേരിലെ കറാച്ചി എന്ന പദം ഒഴിവാക്കാന് ശിവസേനാ നേതാവ് ആവശ്യപ്പെട്ടതുമായി ബന്ധപ്പെട്ടുള്ള ചോദ്യത്തിന് വാര്ത്താ ഏജന്സിയായ പിടിഐ യോടായിരുന്നു ഫഡ്നാവീസിന്റെ പ്രതികരണം.
ചോദ്യത്തിന് ''അവിഭക്ത ഭാരതത്തില് വിശ്വസിക്കുന്നവരാണ് നമ്മള്. അതുകൊണ്ടു തന്നെ ഒരിക്കല് കറാച്ചി ഇന്ത്യയുടെ ഭാഗമായി മാറുമെന്നാണ് താന് കരുതുന്നത്.'' എന്നായിരുന്നു ഫഡ്നാവീസിന്റെ മറുപടി. ബാന്ദ്രയിലെ ഒരു പലഹാരക്കടയുടെ 'കറാച്ചി സ്വീറ്റ്സ്' എന്ന പേരാണ് ശിവസേനയെ ചൊടിപ്പിച്ചത്. കഴിഞ്ഞ ദിവസം ശിവസേനാ നേതാവ് കടയുടമയോട് പേരിലെ കറാച്ചി എന്ന പദം എടുത്തു മാറ്റണമെന്നും നിങ്ങള് പാകിസ്താനില് വേരുകളുള്ള ആളാണെങ്കിലും ഇവിടെ പാകിസ്താനുമായി ബന്ധപ്പെട്ട ഒരു പദം മുംബൈയില് ഉപയോഗിക്കുന്നത് ശരിയല്ലെന്നും പേരു മാറ്റണമെന്നും ആവശ്യപ്പെടുന്നതിന്റെ വീഡിയോ വൈറലായി മാറിയിരുന്നു.
ഇതിന് പിന്നാലെ കറാച്ചി സ്വീറ്റ്സും കറാച്ചി ബേക്കറിയും മുംബൈയില് 60 വര്ഷമായി പ്രവര്ത്തിക്കുന്നതാണ്. അവര് പാകിസ്താനുമായി ഒരു ബന്ധപ്പെട്ട ഒരു കാര്യവും ചെയ്യുന്നില്ല. പേര് ഒന്നു മാറ്റാന് പറഞ്ഞു. അത്രേയുള്ളൂ...സംഭവത്തില് ശിവസേന എന്ന പാര്ട്ടിക്ക് ഒരു പങ്കുമില്ലെന്നും അത് പാര്ട്ടിയുടെ ഔദ്യോഗിക നിലപാട് അല്ലെന്നായിരുന്നു ശിവസേനാ മേധാവി സഞ്ജയ് റൗത്തിന്റെ പ്രതികരണം. അതേസമയം കറാച്ചി എന്ന പേര് മാറ്റാന് നിര്ദേശിച്ചില്ലെന്നും എന്തെങ്കിലും മറാത്തി നാമം കടയ്ക്ക് കൊടുക്കാമായിരുന്നില്ലേ എന്ന് ചോദിക്കുക മാത്രമാണ് ചെയ്തതെന്നും വീഡിയോയില് കാണപ്പെടുന്ന ശിവസേനാ നേതാവ് നിതിന് നന്ദഗോണ്കര് പറഞ്ഞു.
കടയുടെ പേരില് നിന്നും കറാച്ചി എടുത്തുമാറ്റണമെന്നും കറാച്ചിയുമായി ബന്ധപ്പെട്ട ഒരു പേരും മുംബൈയില് പാടില്ലെന്നും എല്ലാം മാറ്റാനുള്ള സമയം ഞങ്ങള് നല്കുകയാണെന്ന് ശിവസേന നേതാവ് വീഡിയോയില് പറയുന്നത്. ഹിന്ദുവോ മുസ്ലീമോ ഏതുവേണമെങ്കിലും നിങ്ങള് ആകട്ടെ. പക്ഷേ മുംബൈയില് കറാച്ചി എന്നൊരു പേര് കേള്ക്കാനിട വരരുത്. ഈ പേര് തന്നെ നിങ്ങള് പാകിസ്താനില് നിന്നുമാണ് വന്നതെന്ന് അര്ത്ഥമാക്കുന്നുണ്ട്. നിങ്ങളുടെ പാരമ്പര്യം കറാച്ചിയില് നിന്നായിരിക്കാം. വിഭജനത്തിന് ശേഷം നിങ്ങള് ഇവിടെ വന്നതുമായിരിക്കാം. നിങ്ങള്ക്ക് ഇവിടെ താമസിക്കുകയോ ബിസിനസ് ചെയ്യുകയോ ആകാം. പക്ഷേ ഈ പേര് ഉപയോഗിക്കാന് പാടില്ല.''
''ഞങ്ങള്ക്ക് കറാച്ചിയുമായി വലിയ പ്രശ്നങ്ങളുണ്ട്. ഞങ്ങളുടെ സൈനികരെ പാകിസ്താന് കൊന്നു. നിങ്ങള് ഈ പേരാണ് റജിസ്റ്റര് ചെയ്തിരിക്കുന്നതെങ്കില് അത് ക്യാന്സല് ചെയ്യണം. ഭീകരരുടെ രാജ്യം എന്ന നിലയില് കറാച്ചി എന്ന പേര് തന്നെ ഞങ്ങള് വെറുക്കുന്നു. ബിഎംസിയില് പോയി പേരുമാറ്റുക. ഇത് ഞങ്ങളുടെ അപേക്ഷയാണ്. അതിനായി നിങ്ങള്ക്ക് ഞങ്ങള് സമയം തരും.'' ശിവസേന നേതാവ് ഭീഷണി മുഴക്കുന്നു. ബാന്ദ്രാ കറാച്ചി എന്ന പേരല്ലാതെ കറാച്ചിയുമായി ബന്ധപ്പെട്ട് ഒരു കാര്യവും കട ചെയ്യുന്നില്ലെന്ന് കടയുടമ പറയുന്നുണ്ട്.
കഴിയുന്നതും വേഗത്തില് പേരു മാറ്റണമെന്നും കടയുടെ പേരുമാറ്റി മറാത്തി പേരിട്ടാല് താന് നേരിട്ട് ഇവിടെ വന്ന് പലഹാരം വാങ്ങുമെന്നും സൈന്ബോര്ഡിലും പേരു മാറ്റണമെന്നും ശിവസേനാ നേതാവ് പറയുന്നുണ്ട്. ഈ സംഭവത്തിന് പിന്നാലെ കടയുടമ കടയുടെ പേരും അത് വെച്ചിട്ടുള്ള ഹോര്ഡിംഗ്സും പത്രം വെച്ചു മറച്ചിരിക്കുകയാണ്.
