ജയ്സാല്മര്: പുനര്വിവാഹത്തിന് സമ്മതിക്കാതിരുന്ന വിധവയുടെ മൂക്കും നാക്കും മുറിച്ചെടുത്ത് ഗുരുതരമായി പരിക്കേല്പ്പിച്ചു. രാജസ്ഥാനിലെ ജെയ്സാല്മറില് റിപ്പോര്ട്ട് ചെയ്യപ്പെട്ട സംഭവത്തില് നാലുപേരെ പോലീസ് അറസ്റ്റ് ചെയ്തിട്ടുണ്ട്.
നാലു വയസ്സുകാരനായ ഒരു മകനുള്ള 28 കാരിയെ 15 വയസ്സു മൂപ്പുള്ള ഒരാള്ക്ക് വിവാഹം ചെയ്തു കൊടുക്കാനുള്ള നീക്കമാണ് യുവതി എതിര്ത്തത്. തുടര്ന്നായിരുന്നു അക്രമം. കേസില് ഒളിവില് പോയ മറ്റുള്ളവര്ക്കായി പോലീസ് തെരച്ചില് തുടങ്ങിയിട്ടുണ്ട്.
യുവതിയുടെ സഹോദരന് നല്കിയ പരാതിയുടെ അടിസ്ഥാനത്തിലായിരുന്നു പോലീസ് നടപടി. ഒക്ടോബര് 17 ന് ബസീര്ഖാന് എന്നയാള് സഹോദരിയെ ചിലര് ഗുരുതരമായി പരിക്കേല്പ്പിച്ചെന്ന് ആരോപണം ഉയര്ത്തി പരാതി നല്കുകയായിരുന്നു. ആറ് വര്ഷം മുമ്പാണ് സഹോദരി ഗുഡ്ഡിയെ കോജേ ഖാന് എന്നയാള്ക്ക് വിവാഹം കഴിച്ചു കൊടുത്തത്. ഇവര്ക്ക് നാലു വയസ്സുള്ള ഒരു മകന് കൂടിയുണ്ട്.
അഞ്ചുവര്ഷം മുമ്പ് കോജേ ഖാന് മരണമടഞ്ഞു. തുടര്ന്ന് ഗുഡ്ഡിയെ ബന്ധുക്കള് പുനര്വിവാഹത്തിന് നിര്ബ്ബന്ധിക്കുകയും മാനസീക പീഡനത്തിന് ഇരയാക്കുന്നതും പതിവായി. 15 വയസ്സ് മൂപ്പുള്ളയാളെ വിവാഹം കഴിക്കാന് വീട്ടുകാര് നിര്ബ്ബന്ധിച്ചെങ്കിലും അവര് തയ്യാറായില്ല. തുടര്ന്ന് ഗുഡ്ഡിയും അമ്മയും താമസിക്കുന്ന വീട്ടിലേക്ക് 10 - 15 പേരുടെ സംഘം വാളും വടിയും തോക്കുമെല്ലാമായി എത്തുകയും വീട്ടില് കയറി ആക്രമിക്കുകയുമായിരുന്നു.
അവര് ഗുഡ്ഡിയുടെ മൂക്കും നാക്കും മുറിക്കുകയും കയ്യേറ്റം ചെയ്യുകയും അവരുടെ വസ്ത്രങ്ങള് വലിച്ചു കീറുകയും മാതാവിനെ അക്രമിക്കുകയും ചെയ്തതായി എസ്പി അജയ് സിംഗ് പറയുന്നു. യുവതിയുടെ കരച്ചില് കേട്ട് ഓടിയെത്തിയ ബസീര് കണ്ടത് അക്രമികള് ബൈക്കില് പാഞ്ഞു പോകുന്നതായിരുന്നു. ഉടന് തന്നെ ഇയാള് വിവരം പോലീസിനെ അറിയിക്കുകയും പരിക്കേറ്റ യുവതിയെ ആശുപത്രിയില് പ്രവേശിപ്പിക്കുകയുമായിരുന്നു.
സംഭവത്തില് കേസ് റജിസ്റ്റര് ചെയ്തിട്ടുണ്ടെന്നും അന്വേഷണം തുടങ്ങിയതായും എസ്പി പറഞ്ഞു. കേസിന്റെ ഗൗരവം കണക്കിലെടുത്ത് താന് തന്നെ സംഭവസ്ഥലത്ത് ചെന്നതായും പറഞ്ഞു. കുറ്റവാളികള്ക്കായി തെരച്ചില് നടത്തുകയാണ്.
