കാക്കനാട്: തദ്ദേശ തെരഞ്ഞെടുപ്പില്‍ സംസ്ഥാനത്താദ്യമായി റൊബോട്ടിന്റെ സേവനം. പോളിങ് ബൂത്തിലെത്തുന്ന ഓരോ വോട്ടറുടെയും ശാരീരിക ഊഷ്മാവ് പരിശോധിച്ച് െകെകളില്‍ സാനിെറ്റെസര്‍ ഒഴിച്ചു കൊടുക്കുന്ന ജോലിയാണു സായാബോട്ടി ഇന്നലെ ചെയ്തത്. തൃക്കാക്കര നഗരസഭ കമ്യൂണിറ്റി ഹാളിലെത്തിയ വോട്ടര്‍മാര്‍ക്കെല്ലാം സായ കൗതുക കാഴ്ചയായി.
‘‘താങ്കള്‍ ശരിയായി മാസ്‌ക് ധരിച്ചിട്ടല്ല. കൂട്ടം കൂടി നില്‍ക്കരുത്, സാമൂഹിക അകലം പാലിക്കണം...’’ എന്നിങ്ങനെ നിര്‍ദേശം നല്‍കാനും റൊബോട്ട് തയാറായി. കോവിഡ് പ്രതിരോധ പ്രവര്‍ത്തനം കൂടുതല്‍ മെച്ചപ്പെടുത്താന്‍ റൊബോട്ടിന്റെ സേവനം ഉപയോഗപ്പെടുത്താമെന്ന ആശയം കലക്ടര്‍ എസ്. സുഹാസിന്റേതായിരുന്നു. നാല്പതു സെക്കന്‍ഡിനുള്ളില്‍ പരിശോധന പൂര്‍ത്തിയാക്കി വോട്ടര്‍മാരെ ബൂത്തിനുള്ളിലേക്ക് കടത്തിവിടുന്ന ചുമതല നിര്‍വഹിച്ചതും സായാബോട്ടിയായിരുന്നു.
പോലീസ്, ആശുപത്രികള്‍ തുടങ്ങിയ ഇടങ്ങളില്‍ റൊബോട്ടിന്റെ സേവനം പരീക്ഷിച്ചിട്ടുണ്ട്. തെരഞ്ഞെടുപ്പില്‍ റൊബോട്ട് സേവനം എന്ന ആശയം എറണാകുളത്തെ സ്റ്റാര്‍ട്ടപ്പ് കമ്പനിയായ അസിമോവ് റൊബോട്ടിക്‌സ് എന്ന സ്ഥാപനമാണ് യാഥാര്‍ത്ഥ്യമാക്കിയത്. എസ്. ജയകൃഷ്ണനാണ് ഈ സ്റ്റാര്‍ട്ടപ്പ് കമ്പനിയുടെ ഡയറക്ടര്‍. ആലപ്പുഴ സ്വദേശിയായ അദ്ദേഹം എറണാകുളത്താണു താമസം.
Comments