ഇടുക്കി: മയക്കുമരുന്നു പരിപാടിയുമായി ബന്ധപ്പെട്ട് വാഗമണ്ണില് നിശാപാര്ട്ടി സംഘടിപ്പിക്കപ്പെട്ട റിസോര്ട്ട് സിപിഐ പ്രാദേശിക നേതാവിന്റേതെന്ന സൂചന. ഏലപ്പാറ മുന് പഞ്ചായത്ത് കൂടിയായ ഇദ്ദേഹത്തിന്റെ റിസോര്ട്ടില് മുമ്പും സമാന രീതിയിലുള്ള പാര്ട്ടി നടത്തിരുന്നതായിട്ടാണ് വിവരം. റിസോര്ട്ടില് ഇന്നലെ രാത്രി പൊലീസ് നടത്തിയ റെയ്ഡില് വന് ലഹരിമരുന്നു ശേഖരം പിടിച്ചെടുത്തിരുന്നു.
വാഗമണ് വട്ടപ്പതലിലെ ക്ലിഫ്-ഇന് എന്ന സ്വകാര്യ റിസോട്ടിലാണു റെയ്ഡ് നടന്നത്. ഹെറോയിന്, കഞ്ചാവ്, എല്.എസ്.ഡി. ഉള്പ്പെടെയുള്ള മയക്കുമരുന്നുകള് കണ്ടെടുത്തു. നിശാപാര്ട്ടി സംഘടിപ്പിച്ചത് ഒമ്പത് പേരാണെന്നും കണ്ടെത്തിയിട്ടുണ്ട്. സോഷ്യല് മീഡിയയില് പ്രചാരണം നടത്തിയാണ് ആളെക്കൂട്ടിയത്. പിടിയിലായ അറുപതുപേരും സംസ്ഥാനത്തിന്റെ വിവിധ ഭാഗങ്ങളില് നിന്നെത്തിയവരാണ്. ഇവരെ ചോദ്യം ചെയ്തതില് നിന്നുമാണ് നിര്ണ്ണായക വിവരങ്ങള് പോലീസിന് കിട്ടിയത്. പ്രാദേശിക നേതാവ് ഒളിവിലാണെന്നും വിവരമുണ്ട്.
പോലീസ് നര്ക്കോര്ട്ടിക്സ് വിഭാഗം വിവിധ സ്റ്റേഷനുകളിലെ പോലീസിനെ ഏകോപിപ്പിച്ചായിരുന്നു റെയ്ഡ് നടത്തിയത്. പിടിയിലായ 60 പേരില് 25 പേര് സ്ത്രീകളാണ്. പിടിയിലായവരില് ഒരു സംവിധായകനും ഉണ്ട്. റിസോര്ട്ടുമായി ബന്ധപ്പെട്ട് ലഹരിയിടപാടു നടക്കുന്നതായി പോലീസിന് അറിവു കിട്ടിയിരുന്നു. ആഴ്ചകള് നീണ്ട ആസൂത്രണത്തിനൊടുവിലാണ് ഇന്നലെ രാത്രി പോലീസ് റെയ്ഡ് നടത്തിയത്. മുമ്പും ഇവിടെ സമാന രീതിയില് പാര്ട്ടികള് നടന്നിരുന്നു. അത് പൊലീസ് പിടിക്കുകയും താക്കീത് നല്കി വിട്ടയക്കുകയുമായിരുന്നു.
