കൊച്ചി: പാലാരിവട്ടം പാലം അഴിമതിക്കേസില് മുന് മന്ത്രി ഇബ്രാഹിംകുഞ്ഞിന് ജാമ്യം അനുവദിക്കരുതെന്ന് സര്ക്കാര് ഹൈക്കോടതിയില്. മുസ്ലിം എഡ്യൂക്കേഷന് സൊസൈറ്റി ഇലക്ഷനില് മത്സരിക്കാന് കഴിഞ്ഞ ദിവസം ഇബ്രാഹിംകുഞ്ഞ് അനുമതി തേടിയിരുന്നു. ആരോഗ്യ കാരണങ്ങളാല് ജാമ്യം നല്കാന് അനുവദിക്കുന്നതിനിടെയാണ് ഇലക്ഷനെക്കുറിച്ച് ഇബ്രാഹിംകുഞ്ഞ് കോടതിയെ അറിയിച്ചത്. ഇതോടെ മത്സരിക്കുന്നത് ജയിലില് പോയിട്ടുമാകാമെന്ന് ഹൈക്കോടതി വിമര്ശിച്ചു.
ഇഹ്രാഹിംകുഞ്ഞ് നല്കിയ ജാമ്യപേക്ഷ പറയുന്ന കാര്യങ്ങള് പരസ്പരവിരുദ്ധമാണെന്നാണ് സര്ക്കാര് വാദം. എന്നാല്, ജയിലില് പോയാല് ജീവനോടെ തിരിച്ചു വരാന് പറ്റുമെന്ന് തോന്നുന്നില്ലെന്നും ഇബ്രാഹിം കുഞ്ഞ് കോടതിയില് പറഞ്ഞു. വിദഗ്ധ ഡോക്ടര്മാരുടെ റിപ്പോര്ട്ട് സമര്പ്പിക്കാന് അനുവദിക്കണമെന്നും സര്ക്കാര് റിപ്പോര്ട്ടിന്മേല് മറുപടി നല്കാന് സമയം വേണമെന്നും ഇബ്രാഹിം കുഞ്ഞ് കോടതിയില് അറിയിച്ചു.
ഇരു വാദങ്ങളും കേട്ടശേഷം നോമിനേഷന് നല്കാമെങ്കില് ജയിലില് പോകാനും തയ്യാറാകണം എന്ന് കോടതി വിമര്ശിച്ചു. ആരോഗ്യ കാരണം മാത്രം പരിഗണിച്ചാണ് ജാമ്യം നല്കാന് ആലോചിച്ചത്. പക്ഷേ ഇപ്പോള് നിങ്ങള് ഇലക്ഷന് മത്സരിക്കാന് ഉദ്ദേശിക്കുന്നു. അത് ജയിലില് പോയിട്ടും ആകാമെന്നുമായിരുന്നു കോടതിയുടെ മറുപടി. കേസ് വീണ്ടും പരിഗണിക്കുന്നത് വെള്ളിയാഴ്ചയിലേക്കുമാറ്റി.
