ന്യൂഡല്ഹി: കാര്ഷിക നിയമങ്ങള്ക്കെതിരെ ഒറ്റയ്ക്ക് നില്ക്കേണ്ടി വന്നാലും പൊരുതുമെന്ന് രാഹുല് ഗാന്ധി. ഡല്ഹിയില് വാര്ത്ത സമ്മേളനത്തില് സംസാരിക്കുകയായിരുന്നു അദേഹം. കേന്ദ്ര സര്ക്കാരിനെ രൂക്ഷമായി വിമര്ശിച്ചുകൊണ്ടാണ് രാഹുല് രംഗത്തെത്തിയത്. രാജ്യത്ത് സംഭവിക്കുന്നത് വലിയ ദുരന്തമാണെന്ന് അദേഹം പറഞ്ഞു. രാജ്യം ഭരിക്കുന്നത് പ്രധാനമന്ത്രിയോട് അടുപ്പമുള്ളവരാണെന്നും നാലഞ്ച് പേരാണ് ഇന്ത്യയുടെ ഉടമസ്ഥര് എന്നും രാഹുല് പറഞ്ഞു.
രാജ്യത്ത് സംഭവിക്കുന്നത് വലിയ ദുരന്തമാണ്. കാര്ഷിക മേഖല കുത്തകവത്കരിക്കുന്നതിനുള്ള നീക്കമാണ് നടക്കുന്നത്. യഥാര്ത്ഥ രാജ്യസ്നേഹികളാണ് കര്ഷകരെന്നും അദേഹം പറഞ്ഞു. വ്യവസായികള് മോദിക്കും കേന്ദ്ര സര്ക്കാരിനും മാധ്യമ പിന്തുണ ഉറപ്പാക്കുന്നു രാഹുല് വിമര്ശിച്ചു.
അര്ണബ് ഗോസ്വാമിയുടെ വാട്സാപ് ചാറ്റുകള് പുറത്തായതുമായി ബന്ധപ്പെട്ട വിവാദത്തിലും രാഹുല് പ്രതികരിച്ചു. വ്യോമസേനയുടെ നീക്കവുമായി ബന്ധപ്പെട്ട രഹസ്യ വിവരം എങ്ങനെയാണ് അര്ണബിന് ലഭിച്ചതെന്നും വിവരം അര്ണബിന് ചോര്ത്തിയവര് നടത്തിയത് ക്രിമിനല് കുറ്റമാണെന്നും രാഹുല് പറഞ്ഞു. വ്യോമസേനയുടെ നീക്കം അര്ണബിന് ലഭ്യച്ചെങ്കില് ഇത് സംബന്ധിച്ച് വിവവരം പാകിസ്ഥാനും കിട്ടി കാണുമെന്നും അദേഹം പറഞ്ഞു.
