ബ്രിസ്ബെയ്ന്: ഇന്ത്യ-ഓസ്ട്രേലിയ ടെസ്റ്റ് മത്സരത്തില് ഓസീസ് പേസര്മാര്മാരുടെ ബോളിന്റെ വേഗത ശരിക്കും മനസ്സിലാക്കിയത് ഇന്ത്യന് ബാറ്റ്സ്മാനായ ചേതേശ്വര് പൂജാരയാണ്. ഒന്നും രണ്ടും തവണയല്ല ഓസീസ് പൂജാരയെ എറിഞ്ഞൊതുക്കാന് നോക്കിയത് 11 തവണയാണ് പുജാരയുടെ ശരീരത്തില് പന്ത് കൊണ്ടത്. എന്നാല് ഇതിലൊന്നും വീഴാതെ ഇന്ത്യയുടെ വിജയത്തിനായി ഒരറ്റത്ത് പാറപോലെ ഉറച്ചു നിന്നുകൊണ്ടാണ് പൂജാര മറുപടി നല്കിയത്.
എന്നാല് അഞ്ചാം ടെസ്റ്റില് താന് നേരിട്ട പന്തുകളെ കുറിച്ചും കടന്നുപോയ സാഹചര്യങ്ങളെ കുറിച്ചും പൂജാര തുറന്നു പറയുകയാണ്. വീട്ടില് എല്ലാവരും വളരെ വിഷമത്തോടെയാണ് ഈ മത്സരം കണ്ടിരുന്നത്. തന്റെ ശരീരത്തില് പന്ത് കൊള്ളുമ്പോള് വീട്ടുകാരുടെ പ്രതികരണം എങ്ങനെയായിരുന്നു എന്നും പൂജാര പറഞ്ഞു. പന്ത് ശരീരത്തില് കൊള്ളുമ്പോള് തന്റെ രണ്ടു വയസ്സുള്ള മകളുടെ കണ്ണുകള് ഭാര്യ പൊത്തിപിടിക്കുകയായിരുന്നു.'അച്ഛന് വീട്ടില് എത്തുമ്പോള് ഏറുകൊണ്ട സ്ഥലത്തെല്ലാം ഞാന് ഉമ്മ നല്കും, അച്ഛന്റെ വേദന മാറും' പൂജാരയുടെ മകള് അദിതി പറഞ്ഞു.
മകള് വീഴുമ്പോള് അവള്ക്ക് വേദനയുണ്ടെന്ന് പറയുമ്പോള് ഞാന് ഉമ്മ നല്കുകയാണ് ചെയ്യുന്നത്. അതുകൊണ്ട് എനിക്ക് പരുക്കേറ്റ സ്ഥലങ്ങളില് ഉമ്മ നല്കിയാല് വേദന മാറുമെന്നാണ് അവള് വിചാരിച്ചിരിക്കുന്നതെന്ന് പൂജാര പറഞ്ഞു.
'വിരലില് നീരുണ്ട് രാത്രി നന്നായി ഉറങ്ങാന് സാധിക്കുന്നില്ല. വിരലില് നല്ല വേദനയാണ്. ഉറങ്ങുമ്പോള് തിരിഞ്ഞോ മറിഞ്ഞോ കിടക്കാന് കഴിയില്ല. തോള് വേദനയുണ്ട്. എന്നാല് ഈ വേദനകള്ക്കെല്ലാം ഇടയിലും ടീമിനെ വിജയത്തിലെത്തിക്കുന്നതില് പങ്കു വഹിക്കുന്നതില് ഏറെ സന്തുഷ്ടനാണ്' പൂജാര പറഞ്ഞു.
