ലണ്ടന്: അസാധാരണ സംഭവങ്ങള് അരങ്ങേറിയ ഇംഗഌഷ് പ്രീമിയര് ലീഗില് മാഞ്ചസ്റ്റര് യുണൈറ്റഡ് ഗോള്മഴ സൃഷ്ടിച്ച് റെക്കോഡ് ഇട്ടപ്പോള് ആഴ്സണലിനെ വോള്വ്സ് അട്ടിമറിച്ചു. മാഞ്ചസ്റ്ററിന്റെ എതിരാളികളായ സൗത്താംപ്ടണിന്റെ രണ്ടു പേര് ചുവപ്പു കാര്ഡ് കണ്ട് പുറത്തായ മത്സരത്തിലാണ് മാഞ്ചസ്റ്റര് യുണൈറ്റഡ് ഗോള്മഴ തീര്ത്തത്. സമാന രീതിയില് രണ്ടു പേര് ചുവപ്പുകാര്ഡ് കണ്ട് പുറത്തായത് മുതലാക്കി വോള്വ്സ് കരുത്തരായ ആഴ്സണലന് അട്ടിമറിക്കുകയും ചെയ്തു.
സൗത്താംപ്ടണെതിരേ ഒമ്പതു ഗോളുകളാണ് മാഞ്ചസ്റ്റര് വലയിലാക്കിയത്. രണ്ടാം മിനിറ്റില് തന്നെ സൗത്താംപ്ടന്റെ ജാങ്കേവിറ്റ്സ് ചുവപ്പുകാര്ഡ് കണ്ടു പുറത്തായത് മുതലാക്കിയ മാഞ്ചസ്റ്റര് വാന്ബിസേക്കയില് തുടങ്ങി 87 ാം മിനിറ്റില് ബ്രൂണോ ഫെര്ണാണ്ടസിന്റെ ഗോള് വരെ എട്ടു ഗോളുകള് പൂര്ത്തിയാക്കി. 86 ാം മിനിറ്റില് ബെഡ്നാരേക്കും ചുവപ്പ് കാര്ഡ് കണ്ടതോടെ കളത്തില് ഒമ്പതുപേരായി ചുരുങ്ങിയ സൗത്താംപ്ടണെ ഇഞ്ചുറി സമയത്ത് ജെയിംസ് നേടിയ ഗോളില് ഒമ്പത് ഗോളുകള് തികച്ചു. 18 ാം മിനിറ്റില് വാന് ബിസ്സാക്കയാണ് ആദ്യം ഗോളടിച്ചത്. പിന്നാലെ 25 ാം മിനിറ്റില് റാഷ്ഫോര്ഡ് ഗോള് നേടി. മുന്നാം ഗോള് രണ്ടാംപകുതിയില് ചുവപ്പ് കാര്ഡ് കണ്ട രണ്ടാമന് ബെഡ് നാരേക്കിന്റെ ദാനഗോളായിരുന്നു. ഇരട്ടഗോളടിച്ച മാര്ഷ്യലിന്റെ വകയായിരുന്നു രണ്ടാം പകുതിയിലെ ആദ്യഗോള്. 69 ാം മിനിറ്റില് പിന്നാലെ 71 ാം മിനിറ്റില് മക് ടൊമിനേയും ഗോള് നേടി. 90 ാം മിനിറ്റില് മാര്ഷ്യല് രണ്ടാംഗോള് നേടിയതിന് പിന്നാലെ ജെയിംസ് പട്ടിക പൂര്ത്തിയാക്കുകയും ചെയ്തു.
കളിയുടെ 75 ശതമാനം പന്തവകാശവും മാഞ്ചസ്റ്റര് യുണൈറ്റഡിനായിരുന്നു. കഴിഞ്ഞ സീസണില് ലെസ്റ്റര് സിറ്റിയോടും ഇതേ സ്കോറിന് തോറ്റ സൗത്താംപ്ടണ് തുടര്ച്ചയായി രണ്ടാം സീസണിലാണ് സ്വന്തം മൈതാനത്ത് 9-0 ന് തോല്ക്കുന്നത്. അതേസമയം 1995 ല് ഇപ്സ്വിച്ച ടൗണിനെ ഇതേ സ്കോറില് തോല്പ്പിച്ച തങ്ങളുടെ പഴയ റെക്കോഡിലേക്ക് മാഞ്ചസ്റ്റര് വീണ്ടും ഉയര്ന്നു. അതേസമയം ആന്റര്ലെക്ടിനെ 10-0 ന് തോല്പ്പിച്ച് പടുകൂറ്റന് സ്കോറിലുള്ള ജയം മാഞ്ചസ്റ്റര് യുണൈറ്റഡ് നേരത്തേ നേടിയിട്ടുണ്ട്. പ്രീമിയര് ലീഗില് ഒമ്പത് ഗോള് വിജയം നേടിയിട്ടുള്ള ഏക ടീമും മാഞ്ചസ്റ്റര് യുണൈറ്റഡാണ്.
രണ്ടു കളിക്കാര് ചുവപ്പ് കാര്ഡ് കണ്ടു പുറത്താകുന്നതിന്റെ ദുര്വ്വിധി ഇന്നലെ ആഴ്സണലിനെയും പിന്തുടര്ന്നു. ഒന്നാം പകുതിയുടെ ഇഞ്ചുറി സമയത്ത് ഡേവിഡ് ലൂയിസ് ചുവപ്പ് കാര്ഡ് കണ്ടതോടെ പത്തുപേരായി ചുരുങ്ങിയ ആഴ്സണലിന് കൂനിന്മേല് കുരു എന്ന പോലെ രണ്ടാം പകുതിയില് 72 ാം മിനിറ്റില് ഗോളി ലെനോയും ചുവപ്പുകാര്ഡ് കണ്ടു പുറത്തായി. രണ്ടു പകുതികളില് ഒമ്പതു പേരായി മാറിയ ആഴ്സണലിനെ വോള്വ്സ് നെവെസിന്റെയും ജാവോ മൗട്ടീഞ്ഞോയുടെയും ഗോളുകളില് അട്ടിമറിക്കുകയും ചെയ്തു. പെപ്പെയുടെ ഗോളില് 32 ാം മിനിറ്റില് ആദ്യം മുന്നിലെത്തിയതിന് പിന്നാലെയാണ് ആഴ്സണല് രണ്ടുഗോള് വഴി തോല്വി ഏറ്റുവാങ്ങിയത്. അട്ടിമറി വീരന്മാരായ വോള്വ്സ് ഈ വര്ഷം നേടുന്ന ആദ്യ വിജയമാണ് ഇത്. നേരത്തേ ഡിസംബര് 15 ന് അവര് ചെല്സിയെയും പരാജയപ്പെടുത്തിയിരുന്നു.
