ന്യൂഡല്ഹി: പാകിസ്ഥാനിലും ചൈനയിലും പോകാന് സമയം കണ്ടെത്തുന്ന പ്രധാനമന്ത്രിക്ക് കാര്ഷിക നിയമങ്ങള്ക്കെതിരെ പ്രതിഷേധിക്കുന്ന കര്ഷകരെ സന്ദര്ശിക്കാന് സമയമില്ലെന്ന് കോണ്ഗ്രസ് ജനറല് സെക്രട്ടറി പ്രിയങ്ക ഗാന്ധി. ഉത്തര്പ്രദേശിലെ സഹാറണ്പൂരില് നടന്ന കിസാന് മഹാപഞ്ചായത്തിനെ അഭിസംബോധന ചെയ്ത് സംസാരിക്കുകയായിരുന്നു പ്രിയങ്ക. കര്ഷകരാണ് അദേഹത്തെ വോട്ട് ചെയ്ത് അധികാരത്തിലേറ്റിയതെന്നും അവരെ സമര ജീവികളെന്ന് വിളിച്ച് അപമാനിച്ചുവെന്ന് പ്രിയങ്ക കുറ്റപ്പെടുത്തി.
സമരം ചെയ്യുന്ന കര്ഷകരെ അവര് തീവ്രവാദികളെന്നും ഭീകരവാദികളെന്നും വിളിക്കുന്നു. കര്ഷകരെ അവര് സംശയിക്കുന്നു. എന്നാല് കര്ഷകര്ക്ക് ഒരിക്കലും രാജ്യത്തിനെതിരെ പ്രവര്ത്തിക്കാനാവില്ല. രാജ്യത്തെ സ്വയംപര്യാപ്തയില് എത്തിച്ച കര്ഷകരെ പുതിയ കാര്ഷിക നിയമങ്ങള് ദുരിതത്തിലേക്ക് തള്ളിവിട്ടു. കേന്ദ്ര സര്ക്കാരിന് അവര് ഉന്നയിക്കുന്ന ആവശ്യങ്ങള് എന്താണെന്ന് മനസ്സിലാക്കാന് കഴിയുന്നില്ല.
അതേസമയം ജനങ്ങള് കൂട്ടം കൂടുന്നത് തടയാന് ജില്ലാ ഭരണകൂടം ഏര്പ്പെടുത്തിയ നിരോധനാജ്ഞ നിലനില്ക്കെയാണ് സഹാറണ്പൂരില് കിസാന് മഹാ പഞ്ചായത്ത് നടന്നത്. പഞ്ചാബിലും ഹരിയാനയിലും കര്ഷകര് നടത്തുന്ന സമരം സഹാറണ്പൂരിലേക്ക് മാറിയതോടെയാണ് ജില്ലാ ഭരണകൂടം നിരോധനാജ്ഞ പ്രഖ്യാപിച്ചത്. ഉത്തര്പ്രദേശിലെ 27 ജില്ലകളില് കോണ്ഗ്രസ് നടത്തിയ ജയ് ജവാന് ജയ് കിസാന് പ്രചാരണ പരിപാടിയുടെ ഭാഗമായാണ് മഹാപഞ്ചായത്ത് സംഘടിപ്പിച്ചത്.
