കൊല്ക്കത്ത: തെരഞ്ഞെടുപ്പ് ലക്ഷ്യമിട്ട് ബംഗാളില് ബിജെപി പ്രചരണത്തിനായി സ്ഥിരതാമസമാക്കിയിട്ടുളള കേന്ദ്ര ആഭ്യന്തരമന്ത്രി അമിത്ഷായും ബംഗാള് മുഖ്യമന്ത്രി മമതാ ബാനര്ജിയും തമ്മിലുള്ള പ്രചരണ പോര് പറഞ്ഞുപറഞ്ഞ് അവസാനം കുടുംബത്തിലേക്കും.
കഴിഞ്ഞ ദിവസം നടത്തിയ ബംഗാള് സന്ദര്ശനത്തില് മമതാ ബാനര്ജിയെ വിമര്ശിക്കാന് മരുമകന് തൃണമൂല് എംപി അഭിഷേക് ബാനര്ജിയെ പിടിച്ച അമിത്ഷായ്ക്ക് അദ്ദേഹത്തിന്റെ മകനെ പിടിച്ചായിരുന്നു മമതയുടെ ഉരുളയ്ക്ക് ഉപ്പേരി. ബിജെപി നേതാവ് മരുമകനെ പിടിച്ചപ്പോള് തൃണമൂല് നേതാവ് ബിജെപി നേതാവിന്റെ മകനെ പിടിച്ചു.
ബംഗാളില് കുടുംബവാഴ്ച നടപ്പിലാക്കാനാണ് മമതയുടെ ശ്രമമെന്നും മരുമകനും തൃണമൂല് എംപിയുമായ അഭിഷേക് ബാനര്ജിയെ മുഖ്യമന്ത്രിയാക്കാന് വേണ്ടിയാണ് ശ്രമിക്കുന്നതെന്നുമായിരുന്നു അമിത്ഷായുടെ വിമര്ശനം. എന്നാല് അപ്പന്റെ പദവിയുടെ തണലില് അമിത്ഷായുടെ മകന് പണം വാരുകയാണ് എന്നായിരുന്നു മമത ഉരുളയ്ക്ക് ഉപ്പേരി പോലെ നല്കിയ മറുപടി. ദിലീപ്ഘോഷ് ഇല്ലായിരുന്നെങ്കില് അഭിഷേകിനെ പിന്ഗാമിയായി മമത ഉടന് പ്രഖ്യാപിക്കുമായിരുന്നു എന്നായിരുന്നു അമിത്ഷായുടെ പ്രസ്താവന. ‘‘ നരേന്ദ്രമോഡി സര്ക്കാര് ഗരീബ് കല്യാണിന് വേണ്ടി നില്ക്കുമ്പോള് മമതാ സര്ക്കാര് ഭട്ടീജാ (മരുമക്കത്തായം) കല്യാണിനാണ് നില്ക്കുന്നത്.’’ വ്യാഴാഴ്ചത്തെ ആദ്യ പ്രചരണ വേദിയായ കുച്ച് ബെഹറില് അമിത്ഷാ നടത്തിയ പ്രസംഗത്തില് പറഞ്ഞു. മണിക്കൂറുകള് കഴിയും മുമ്പ് കൊല്ക്കത്തയില് മമതയുടെ മറുപടി വന്നു.
‘‘എന്റെ മരുമകനേക്കുറിച്ച് പറയുന്ന അമിത്ഷായ്ക്ക് സ്വന്തം മകനെക്കുറിച്ച് എന്തു പറയും? അയാള്ക്ക് എങ്ങിനെയാണ് ഇത്രയധികം പണമുണ്ടായത് ? അതിനല്ലേ ആദ്യം മറുപടി പറയേണ്ടത്? ഞങ്ങള് ബംഗാളികള് മോശമാണ്. എന്നാല് എന്നോട് കളിക്കാനാണ് ശ്രമമെങ്കില് നിങ്ങള് തകര്ന്നു പോകുകയേയുള്ളൂ.'' മമത തിരിച്ചടിച്ചു. മുമ്പും ബിജെപി പ്രചരണത്തില് അഭിഷേകിനെ ആക്രമിച്ചിട്ടുണ്ടെങ്കിലും അതേ നാണയത്തില് മമത മറുപടി നല്കുന്നത് ഇതാദ്യമാണ്.
അതേസമയം അടി ഇവിടെ അവസാനിച്ചില്ല. രണ്ടാമത്തെ പരിപാടിയില് ദക്ഷിണ ബംഗാളിലെ ഠാക്കൂര് നഗറില് നടന്ന പരിപാിടയിലും മമതാ ബാനര്ജിയെ ലക്ഷ്യം വെച്ച് അമിത്ഷാ ആക്രമണവുമായി എത്തി. '' ചില സാഹചര്യങ്ങള് കൊണ്ട് എന്റെ ചില മുന് പരിപാടികള് ക്യാന്സല് ചെയ്യേണ്ടി വന്നു. മമതാ ദീദിക്ക് അപ്പോള് വലിയ സന്തോഷമായി. പക്ഷേ ഏപ്രിലില് തെരഞ്ഞെടുപ്പില് തോല്പ്പിക്കുന്നത് വരെ ഞാന് വീണ്ടും വീണ്ടും ഇവിടെ വന്നുകൊണ്ടിരിക്കും.
ഇതിനും മമത അതേ നാണയത്തില് തിരിച്ചടിച്ചു. '' എപ്പോള് വന്നാലും അയാള് ബംഗാളിനെ അപമാനിക്കും. എന്നാലും എപ്പോള് പ്രചരണത്തിന് വന്നാലും ഞങ്ങള് അദ്ദേഹത്തെ സ്വാഗതം ചെയ്യും. എന്തെങ്കിലും ചെയ്യാന് ദീദി ആരേയും നിര്ബ്ബന്ധിക്കുകയുമില്ല. അക്കാര്യം ഉറപ്പാണ്. എന്നാല് ഭീഷണിപ്പെടുത്താന് നോക്കേണ്ട. താന് പേടിക്കുന്നയാളല്ല. മമത തിരിച്ചടിച്ചു.
