ചെന്നൈ: എംജിആറിന്റെ പിന്ഗാമിയായി സിനിമയില് നിന്നും തമിഴ്രാഷ്ട്രീയത്തില് ഇടപെടാനൊരുങ്ങുന്ന സുപ്പര്താരം കമല്ഹാസന് ചെന്നൈയില് അലന്തൂര് മണ്ഡലത്തില് നിന്നും ജനവിധി തേടിയേക്കുമെന്ന് റിപ്പോര്ട്ട്. ചെന്നൈയ്ക്ക് പുറമേ കോയമ്പത്തൂരിലെയോ മധുരയിലോ ഒരു മണ്ഡലത്തില് കൂടി താരം മത്സരിച്ചേക്കും. എഐഎഡിഎംകെ - ബിജെപി, ഡിഎംകെ - കോണ്ഗ്രസ് സഖ്യം തെരഞ്ഞെടുപ്പ് ലക്ഷ്യമിട്ട് വലിയ പ്രചരണ പരിപാടികള് തുടങ്ങിക്കഴിഞ്ഞിരിക്കെ തന്റെ നേതൃത്വത്തില് ഒരു മൂന്നാം മുന്നണിക്കായുള്ള ശ്രമവും കമല് നടത്തുന്നുണ്ട്.
അലന്തൂര് അല്ലെങ്കില് മൈലാപ്പൂര്, ടി.നഗര്, വാളാചേരി എന്നീ മണ്ഡലവും ചെന്നൈയില് പരിഗണിക്കുന്നുണ്ട്. താരം അലന്തൂരില് മത്സരിക്കുമെന്ന് ലക്ഷ്യമിട്ട് മക്കള് നീതി മയ്യം പ്രവര്ത്തകര് ഇവിടെ കമലിനായി പ്രചരണം ആരംഭിച്ചിട്ടുണ്ട്. കമല്ഹാസന് ഇവിടെ മത്സരിക്കണമെന്ന് താല്പ്പര്യപ്പെടുന്നവര് നല്കിയിട്ടുള്ള ഫോണ് നമ്പറില് വിളിച്ച് താരത്തിന് പിന്തുണ അറിയിക്കണമെന്ന് ജില്ലാ സെക്രട്ടറിമാര് ആരാധകരോട് ആവശ്യപ്പെട്ടിട്ടുണ്ട്. കഴിഞ്ഞ ദിവസം എഐഎഡിഎംകെ യെയും ഡിഎംകെ യെയും ശക്തമായി വിമര്ശിച്ച കമല് ഒരു മൂന്നാം മുന്നണിയുടെ ശ്രമവും തുടങ്ങിയിട്ടുണ്ട്.
എഐഎഡിഎംകെ നേതാവ് ജയലളിതയും ഡിഎംകെയെ നയിക്കാന് കരുണാനിധിയും ഇല്ലാത്ത ആദ്യ തെരഞ്ഞെടുപ്പാണ് തമിഴ്നാട്ടില് നടക്കുന്നത്. അതിനിടയില് സഖ്യമുണ്ടാക്കാന് ഡിഎംകെയില് നിന്നും അനൗദ്യോഗിക ക്ഷണം കിട്ടിയിട്ടുണ്ടെന്ന് താരം നേരത്തേ പറഞ്ഞിരുന്നു. എന്നാല് എല്ലാം താഴെ തട്ടുകളിലാണ് നടന്നിട്ടുള്ളതെന്നും ഉയര്ന്ന നേതൃത്വം സമീപിച്ചാല് മാത്രമേ ആലോചന നടത്തുകയുള്ളെന്നും കമല് പറഞ്ഞു. കഴിഞ്ഞ ദിവസം കമല് എഐഎഡിഎംകെയും ഡിഎംകെയും അഴിമതിക്കാരാണെന്നും ഇവര് തമ്മിലുള്ള വ്യത്യാസം വളരെ നേര്ത്തതാണെന്നും പറഞ്ഞിരുന്നു.
മക്കള് നീതി മയ്യം പാര്ട്ടി ഡല്ഹിയിലെ ആംആദ്മി പാര്ട്ടിയുമായി സഖ്യമുണ്ടാകുമോ എന്ന ചോദ്യത്തിന് പാര്ട്ടിയുടെ ഒന്നാം വാര്ഷികത്തില് പങ്കെടുത്തയാളാണ് ഡല്ഹി മുഖ്യമന്ത്രിയും എഎപി നേതാവുമായ അരവിന്ദ് കെജ്രിവാള് എന്നും അദ്ദേഹം തന്റെ പ്രസംഗം തുടങ്ങിയത് തന്നെ ആള്ക്കാരോട് പാര്ട്ടിക്ക് വേണ്ടി വോട്ടു തേടിക്കൊണ്ടായിരുന്നു എന്നും പറഞ്ഞു. ശനിയാഴ്ച രജനീകാന്തുമായി കമല് കൂടിക്കാഴ്ച നടത്തിയിരുന്നു. രജനി പാര്ട്ടിയില് എത്തുമോ എന്ന ചോദ്യത്തിന് അനാരോഗ്യം മൂലം രാഷ്ട്രീയത്തിലേക്ക് ഇല്ലെന്ന് പറഞ്ഞയാളെ എങ്ങിനെ പാര്ട്ടിയിലേക്ക് ക്ഷണിക്കുമെന്നും കമല് ചോദിച്ചു.
