പാലക്കാട്: പാലക്കാട് ജില്ലാ കോണ്ഗ്രസ് കമ്മിറ്റിയില് പൊട്ടിത്തെറി. ജില്ലയിലെ മുതിര്ന്ന നേതാവ് എ.വി ഗോപിനാഥ് ആണ് വിമതശബ്ദമുയര്ത്തുന്നത്. പാലക്കാട് മണ്ഡലത്തില് ഇത്തവണ പരിഗണിക്കണമെന്നാണ് ഗോപിനാഥിന്റെ ആവശ്യം. അല്ലാത്തപക്ഷം ഷാഫി പറമ്പിലിനെതിരെ മത്സരിക്കാനാണ് തീരുമാനം. ഗോപിനാഥ് മത്സരിക്കാനിറങ്ങിയാല് സി.പി.എം പിന്തുണച്ചേക്കുമെന്നും സൂചനയുണ്ട്.
സീറ്റ് നല്കിയില്ലെങ്കില് ഡി.സി.സി അധ്യക്ഷ പദവിയെങ്കിലും ലഭിക്കണമെന്ന നിലപാടിലാണ് ഗോപിനാഥ്. നിലവില് വി.കെ ശ്രീകണ്ഠന് എം.പി തന്നെയാണ് ഡി.സി.സി അധ്യക്ഷന്. 'ഐ' ഗ്രൂപ്പിലെ മുതിര്ന്ന നേതാവായ ഗോപിനാഥിന് ഈ പദവി നല്കണമെന്നാണ് പ്രതിപക്ഷ നേതാവ് രമേശ് ചെന്നിത്തല അടക്കമുള്ളവരുടെ ആവശ്യം. എന്നാല് 'എ' ഗ്രൂപ്പ് നേതാക്കളായ ഉമ്മന് ചാണ്ടിയും ഷാഫി പറമ്പിലും ഇതിന് എതിരു നില്ക്കുന്നുവെന്നാണ് ഗോപിനാഥന്റെ ആരോപണം. ഡി.സി.സി അധ്യക്ഷനായി പരിഗണിക്കാനുള്ള യോഗ്യതപോലുമില്ലെങ്കില് എന്തിന് പാര്ട്ടി പ്രവര്ത്തനവുമായി മുന്നോട്ടുപോകണമെന്നാണ് അദ്ദേഹത്തിന്റെ ചോദ്യം.
25 വര്ഷം പെരിങ്ങോട്ടുകുറിശ്ശി ?ഗ്രാമപഞ്ചായത്ത് പ്രസിഡന്റായിരുന്ന ഗോപിനാഥ് ആലത്തൂരില് നിന്ന് എംഎഎ ആയിട്ടുണ്ട്. 2011ല് പാലക്കാട് മണ്ഡലത്തില് പരിഗണിച്ചത് ഗോപിനാഥിന്റെ പേരായിരുന്നു. പോസ്റ്ററടിച്ച് പ്രചരണവും ആരംഭിച്ച ശേഷമാണ് ഷാഫി പറമ്പിലിനെ ഇവിടെ പരിഗണിക്കുന്നത്. അന്നു മുതല് അവഗണനയാണെന്നും ജില്ലയിലെത്തുന്ന നേതാക്കള് പോലും തന്നെ പരിഗണിക്കുന്നില്ലെന്നുമാണ് ഗോപിനാഥിന്റെ പരാതി.
ഗോപിനാഥിന് പിന്തുണ നല്കുന്നതില് ഇന്നു ചേരുന്ന ജില്ലാ സെക്രട്ടേറിയറ്റില് ചര്ച്ചയായേക്കും. മന്ത്രി എ.കെ ബാലന് അടക്കം ജില്ലയിലെ സി.പി.എം നേതാക്കളുമായി അടുത്ത ബന്ധം പുലര്ത്തുന്നയാളാണ് ഗോപിനാഥ്.
