കൊല്ക്കത്ത: ഇടതുപക്ഷത്തിനും കോണ്ഗ്രസിനും അപ്പുറത്ത് ശക്തമായി പിടി മുറുക്കിയിരിക്കുന്ന പശ്ചിമ ബംഗാളില് മുഖ്യമന്ത്രി മമതാ ബാനര്ജി സിറ്റിംഗ് സീറ്റില് മത്സരിച്ചാല് ബിജെപി കേന്ദ്രമന്ത്രിയെ എതിരാളിയാക്കും. മമതാബാനര്ജിയുടെ തൃണമൂല് കോണ്ഗ്രസും ബംഗാളില് ഭരണം പിടിക്കാന് കച്ച കെട്ടിയിറങ്ങിയിരിക്കുന്ന ബിജെപിയും ഇന്ന് സ്ഥാനാര്ത്ഥികളെ പ്രഖ്യാപിക്കാനിരിക്കുകയാണ്.
നിലവില് ഭവാനിപ്പൂരിനെയാണ് മമതാബാനര്ജി പ്രതിനിധീകരിക്കുന്നത്. ഇവിടെ തന്നെ വീണ്ടും മത്സരിച്ചാല് ബിജെപി കേന്ദ്രമന്ത്രി ബാബുലാല് സുപ്രിയയെ എതിരാളിയാക്കാനാണ് ഉദ്ദേശിക്കുന്നത്. അതേസമയം ഇത്തവണ മമത നന്ദിഗ്രാമില് നിന്നും മത്സരിക്കുമെന്നാണ് നേരത്തേ പുറത്തു വന്നിരിക്കുന്ന റിപ്പോര്ട്ടുകള്. രണ്ടു സീറ്റിലും മമതയ്ക്ക് നേരിടേണ്ടി വരിക കരുത്തരായ എതിരാളികളെയാകും. നന്ദിഗ്രാമില് മമത മത്സരിക്കാനെത്തിയാല് പഴയ കൂട്ടാളിയും തൃണമൂലില് നിന്നും ബിജെപിയിലേക്ക് മറുകളം ചാടുകയും ചെയ്ത സുവേന്ദു അധികാരിയാകും എതിരാളിയായി വരികയെന്നാണ് പുറത്തുവന്ന റിപ്പോര്ട്ട്. ഇന്ന് കൊല്ക്കത്തയിലെ മമതയുടെ വസതിയില് ടിഎംസി തെരഞ്ഞെടുപ്പ് കമ്മറ്റി യോഗം ചേരാന് തീരുമാനിച്ചിരിക്കുകയാണ്.
തുടര്ച്ചയായി രണ്ടുതവണ മമതാബാനര്ജി ജയിച്ചു കയറിയ മണ്ഡലമാണ് ഭവാനിപ്പൂര്. 2011 ല് സുബ്രതാബക്ഷി ജയിച്ചുകയറിയ തെരഞ്ഞെടുപ്പില് അദ്ദേഹത്തെ രാജി വെയ്പ്പിച്ചായിരുന്നു മമത ആദ്യമായി ഭവാനിപൂരില് മത്സരിച്ചത്. തൊട്ടുപിന്നാലെ 2016 ല് 25,000 വോട്ടുകളുടെ ഭൂരിപക്ഷത്തില് വിജയതുടര്ച്ച നേടി. കോണ്ഗ്രസിന്റെ ദീപാ ദേശ്മുന്ഷിയെയാണ് ഇവിടെ മമത കഴിഞ്ഞ തവണ പരാജയപ്പെടുത്തിയത്്. ഭവാനിപൂരില് സുബ്രതാബക്ഷി ജയിച്ചു കയറിയ 2011 ലെ വോട്ടെടുപ്പില് ബിജെപിയ്ക്ക് കിട്ടിയത് വെറും 5,078 ആയിരുന്നു. അന്ന് രാം ചന്ദ്ര ജെയ്സ്വാളാണ് വന് തോല്വിയാണ് നേരിട്ടത്. എന്നാല് കാലം മാറിയെന്നും ഇപ്പോള് ഇവിടെ ബിജെപിയ്ക്ക് വോട്ടുഷെയര് കൂടിയിട്ടുണ്ടെന്നുമാണ് ബിജെപിയുടെ വിലയിരുത്തല്.
2016 ല് മമതയ്ക്ക് എതിരേ വന്ന ചന്ദ്രകുമാര് ബോസ് ബിജെപിയുടെ വോട്ടുകള് 26,299 ആക്കി കൂട്ടി. 2019 ലെ ലോക്സഭാ തെരഞ്ഞെടുപ്പില് ഭവാനിപൂര് വരുന്ന കൊല്ക്കത്ത ദക്ഷിണ് മണ്ഡലത്തില് ബിജെപി സ്ഥാനാര്ത്ഥി രണ്ടാമത് എത്തിയിരുന്നു. തൃണമൂല് കോണ്ഗ്രസിന്റെ മാലാ റോയ് ഒന്നര ലക്ഷം വോട്ടിന്റെ ഭൂരിപക്ഷത്തിന് ജയിച്ചു കയറിയെങ്കിലും 4,17,927 വോട്ടുകള് നേടി രണ്ടാമത് എത്താന് ബിജെപി സ്ഥാനാര്ത്ഥി ചന്ദ്രകുമാര് ബോസിന് കഴിഞ്ഞിരുന്നു. മാലാറോയിയ്ക്ക് 5,73,119 വോട്ടുകള് കിട്ടി. മൂന്നാമതായി പോയ സിപിഎമ്മിന്റെ നന്ദിനി മുഖര്ജിയ്ക്ക് 1,40,275 വോട്ടും കിട്ടി.
