തിരുവനന്തപുരം: ഉപരാഷ്ട്രപതിയെ സ്വീകരിക്കാന് വിമാനത്താവളത്തിലെത്തിയ ജില്ലാ കലക്ടറെയും മേയറെയും തടയുകയും ഇവരുടെയും പൊതുഭരണ വകുപ്പ് അഡീഷണല് ചീഫ് സെക്രട്ടറിയുടെയും കാര് വിമാനത്താവളത്തിനു പുറത്താക്കുകയും ചെയ്ത സംഭവത്തില് അന്വേഷണമില്ല. മുതിര്ന്ന ഉദ്യോഗസ്ഥരുടെ പരാതി ലഭിച്ചതോടെ നേരിട്ടെത്താന് റവന്യു പ്രിന്സിപ്പല് സെക്രട്ടറി ആവശ്യപ്പെട്ടതു സിറ്റി പോലീസ് കമ്മിഷണര് നിരാകരിച്ചു.
അന്വേഷണം ആവശ്യപ്പെട്ട് ആഭ്യന്തരവകുപ്പ് അഡീഷണല് ചീഫ് സെക്രട്ടറി സംസ്ഥാന പോലീസ് മേധാവിക്ക് കത്തു നല്കി. തിരുവനന്തപുരം സിറ്റി ഡെപ്യൂട്ടി പോലീസ് കമ്മിഷണര്, സുരക്ഷാ ചുമതലയുള്ള ഐ.ജി. എന്നിവരില്നിന്ന് വിശദീകരണം വാങ്ങിയശേഷം റിപ്പോര്ട്ട് നല്കാനാണ് ആവശ്യപ്പെട്ടിരിക്കുന്നത്. വിമാനത്താവളത്തില് ഉപരാഷ്ട്രപതിയുടെ സുരക്ഷാച്ചുമതലയുണ്ടായിരുന്ന ഉദ്യോഗസ്ഥനോടും വിശദീകരണം ചോദിക്കണമെന്ന് ആവശ്യപ്പെട്ടിട്ടുണ്ട്.
കലക്ടറുടെ പരാതിയിന്മേല് ചീഫ് സെക്രട്ടറി അന്വേഷണത്തിന് ഉത്തരവിടുകയും റവന്യൂ പ്രിന്സിപ്പല് സെക്രട്ടറി സിറ്റി പോലീസ് കമ്മിഷണര് ബല്റാം കുമാര് ഉപാധ്യായയോടു വിശദീകരണം ആവശ്യപ്പെടുകയും ചെയ്തിരുന്നു. റവന്യു സെക്രട്ടറിക്കു മുന്നില് ഹാജരാകാന് ഉപാധ്യായ തയാറാകാതിരുന്നതോടെയാണ് ഡി.ജി.പിയോടു റിപ്പോര്ട്ട് ആവശ്യപ്പെട്ടിരിക്കുന്നത്. പോലീസ് കമ്മിഷണറുടെ കാറും ടെക്നിക്കല് ഏരിയയില് പ്രവേശിച്ചിരുന്നില്ല.
ഉപരാഷ്ട്രപതിയുടെ സ്വീകരണച്ചടങ്ങിന്റെ പൊതുചുമതലയുണ്ടായിരുന്ന ജില്ലാ മജിസ്ട്രേറ്റ് കൂടിയായ കലക്ടര് നവജോത് ഖോസയെ സ്വീകരണപ്പന്തല് തയാറാക്കിയിരുന്ന ടെക്നിക്കല് ഏരിയയിലേക്കു പോലീസ് കടത്തിവിട്ടില്ല. ചോദ്യം ചെയ്തതിനത്തുടര്ന്ന് കലക്ടറെ കടത്തിവിട്ടെങ്കിലും കാര് പിന്നീട് ടെക്നിക്കല് ഏരിയയ്ക്കു പുറത്താക്കി. ചീഫ് സെക്രട്ടറിക്കുവേണ്ടി സ്വീകരണച്ചടങ്ങിനെത്തിയ പൊതുഭരണവകുപ്പ് അഡീഷണല് സെക്രട്ടറിക്കും ഇതായിരുന്നു അനുഭവം. മേയറുടെ കാര് തടഞ്ഞതിനെത്തുടര്ന്ന് അവര് നടന്നാണു ടെക്നിക്കല് ഏരിയയിലെത്തിയത്.
അതേസമയം, ടെക്നിക്കല് ഏരിയയില് കടക്കാന് അനുവാദമില്ലാതിരുന്ന നിരവധി വാഹനങ്ങള് അവിടെ പാര്ക്ക് ചെയ്തിരുന്നു. ഇതു സുരക്ഷാ വീഴ്ചയാണെന്ന് ആഭ്യന്തരവകുപ്പ് അഡീഷണല് ചീഫ് സെക്രട്ടറി പോലീസ് മേധാവിക്കെഴുതിയ കത്തില് ചൂണ്ടിക്കാട്ടിയിട്ടുണ്ട്. മറ്റു നിരവധി വാഹനങ്ങള് ടെക്നിക്കല് ഏരിയയില് പാര്ക്ക് ചെയ്യാനിടയായ സാഹചര്യം അന്വേഷിക്കണമെന്നും ഈ വാഹനങ്ങളുടെ വിവരം നല്കണമെന്നും കത്തില് ആവശ്യപ്പെട്ടിട്ടുണ്ട്.
ജില്ലാ കലക്ടര്, പൊതുഭരണ അഡീഷണല് ചീഫ് സെക്രട്ടറി എന്നിവര്ക്കുണ്ടായ മോശം അനുഭവത്തിന്മേല് ഇടപെട്ട റവന്യൂ പ്രിന്സിപ്പല് സെക്രട്ടറിയോടും ആഭ്യന്തരവകുപ്പ് കാണിച്ച അവഗണന ഐ.എ.എസ്. വൃത്തങ്ങളില് ചൂടേറിയ ചര്ച്ചയാണ്.
